¹ Tusendesenu luko gudilombela esue hakhetu. Tudi luko nu funu ya mukanda ha gudimbela gudi enue ba ? ² Enue mudi mukanda wetu wa gudilombela, wago wasonegewe mu mitshima yetu; mukanda wene udi wa gujiyiwa nu wa gutangewa gudi athu agasue. ³ Nu aye udi mudijiga egi udi mukanda wa kilisto, wago esue tua hanyi, wasonegewe ndo nu meya a gilabi uvi nu givule gia Nzambi ya monyo, holu dia mesa a seso ndo, uvi holu dia mesa a mitshima ya’athu. ⁴ Idi guhaga mutshima tudi nawo gudi Nzambi mu yesu-kilisto ⁵ Ishigo egi tudi ya gutagana esue hakhetu, egi gima mba gizoga gudi esue, uvi matangi etu adi gudi Nzambi. ⁶ Yago udi gututamega egi enya mudimo wa gudivua guhe-guhe gudi gushigo gu mukanda, uvi gu givule ndaga ya mukanda wana shiya uvi givule giana hana monyo. ⁷ Luenyelu, gula mudimo wa gufua wakhalele wagunamiga mu isona holu dia seso, mudimo udi muza mu lukuma lua ngegi, hagula egi enya gu isalele ajiyilego gumona phala ya Mose, mukunda nu lukuma lua phala yenji, lukuma lua masugu azonda. ⁸ Mudimo wa givule, ushigo wa lukuma luakoma ba? ⁹ Gula mudimo wa gubelesewa wakhalele wa lukuma, guvula gutshi mudimo wa ungambi mba ubalega mu lukuma ? ¹⁰ Yagasue yakhalele ya lukuma, ishigo luko ya lutumbu mukunda nu lukuma lua balegele. ¹¹ Ndaga ya, gula yago yakhalele mubalega ya khalele ya lutumbu, na lutumbu tshi mba lukhala gudi yago ishigo mubalega ? ¹² Tudi sha nu gutshigina nu tudi mutshitshila guhuima guakoma. ¹³ Ishigo gifua Mose wakhalele mutshuiga phala hagula egi enya gu isalele amumonyigo luholo gadi, mukunda nu lutumbu ludi mubalega ¹⁴ Uvi ivule yawo, idi ya gutshuigiwa. Unu mangino mulele wene udi guene hadi ene mutanga gikotelo nga gudivua gukulu nu ashigo muzumbula mito ndaga ya, mulele wene udi mutota khuta mu kilisto. ¹⁵ Nga nu muene mangino, gula adi mutumbula Mose, mulele udi mutshuiga mitshima yawo. ¹⁶ Gula muthu wahaga mutshima wenji gudi Fumu, na mulele udi mukatudiwa ¹⁷ Fumu udi givule nu fundo didi givule gia fumu hene hadi guhuima. ¹⁸ Khungi yetu yagasue, phala jia gutugula, tudi mumona lukuma lua Nzambi, tudi ya gubalumuwa mu gifuanesa gia lukuma ludi muza guma guko gifua gudi Fumu yago udi givule.