¹ Ngatangiza egi, mba ngushigo muza gudi enue nu gikenene. ² Gula ngamihua gikenene, nanyi muko wajiya gu ngusuangu luisa gula ishigo yago wa huwe gikenene mukunda nu ame. ³ Nga sonega gifua mu luholo lu ngatshitshi, hagula egi ha mba nguza gudi enue, nguhuiwa ndo gikenene gudi ago akhadi nayo gu ngusuanguluisa. Ngudi muhaga mutshima mu gusuanguluga guami nu guenu khungi’ agasue. ⁴ Ndaga ya ngamisonegela mukatshi dia lamba nu phashi gu mutshima, nu masoji avula gu meso. Ishigo mukunda nu gumuhua gikenene uvi mukunda nu gumijijiga guzumba guami gudi enue. ⁵ Gula muthu mumoshi udi mubata gikenene, ishigo mukunda nu ame hakhami, uvi enue agasue. ⁶ Ndola idi muhanewa gudi muthu ya luholo ngenyi, idi yatagana. ⁷ Ha fundo dia ndola, idi yatagana gumutotesela nu guhua jingolo hagula egi gakhadigo nu gikenene giavula. ⁸ Ngenyi ngudi gumilundula ha gudijiga mu meso a’athu agasue guzumba guenu gudi muene. ⁹ Ngamisonegela ha gumiphaga gula mudi mua tumaga gu ndaga jiagasue. ¹⁰ Gula mua totesela muthu, ame nji ngudi gumutotesela. Gula ngudi mutotesa indaga, idi gutotesa mukunda nu enue gutuama dia kilisto. ¹¹ idi mukunda hagula mudibembigo ha gubua hamago a Satana, ndaga ya tudi mujiya miheto yenji. ¹² Ngatshima Fumu wangudile, kumbi ngaji gu Tolowa ha gulonga lukuma lua bonga lua kilisto. ¹³ Ngakhalelego nu guhuima ndaga ya ngasangelego phangi ami Tito. Ngenyi nga’abembele nu ngavutugile gu Masedonia. ¹⁴ Uvi lukuma luye gudi Nzambi, yago wana gutuhua gibing mu kilisto, mukunda nu esue tudi mumuanga muagasue vumba diabongo dia gumujiya. ¹⁵ Ndaga ya, mukunda nu Nzambi, tudi vumba diabonga dia kilisto mukatshi dia ago adi aguhuluga nu ago adi muya gu gufua. ¹⁶ Mukunda nu ago adi muya gu gufua, idi vumba dia gufua, didi muhana gufua. Mukunda nu ago mba’ahuluishiwa, idi vumba dia monyo, didi muhana monyo. Nanyi watagana gu ndaga jinyinyi ? ¹⁷ Ndaga ya, esue tushigo gifua ago anadiga mbimbi ya Nzambi mukunda nu iheho yawo. Ha fundo dia ngenyi, tudi muziuela nu matangi abonga gifua atumiwi a Nzambi mu kilisto.