¹ Luenyelu tuashigina guzuela mukunda mbiji (saba) jiago jidi jia guhanewa mulambu gua isongo ( ikhokho), tudi mujiya egi, << agasue tudi nu ujiyi wene wagasue>> ujiyi wazala pha nu gudihala, uvi gisemo giana kuatesa (tunga). ² Gula muthu udi mutangiza egi umujiya ndaga imoshi idi nga muthu khenji gajiya galego, udi nayo ya gujiya. ³ Uvi gula muthu wazumba Nzambi muthu muenyeu udi yagujiwa gudi muene. ⁴ Ngenyi ha gudia ima yago idi muhanewa gudi isongo (ikhokho), tuajiya egi << ha mavu wawa, isongo idi ya gituhu>>, nu << gudi khuta Nzambi mumoshi.>> ⁵ Henyaha gudi avula adi mutamegewa egi << Jinzambi mu dilu nu ha mavu, ndaga ya gudi << jinzambi jiavula nu mufumu>> ⁶ Uvi mukunda nu esue, << Nzambi udi khuta momoshi, Tata; guago gudi muza ima yagasue nu mukunda nu muene tudi nu monyo, nu Fumu momoshi, Yesu - Kilisto, mukunda nu muene ima yagasue idi mukhala nu mukunda nu muene esue tudi mukhal. ⁷ Henyaha, ujiyi wene ushigo gudi athu agasue. Ha ndaga ei ako adiangele gukhala mutshitshila isongo nu akhalele mudia ima yago yakhalele muhanewa milambu gudi zambi jia isongo gifua ndunge (ujiyi) jiene. Matangi awo adi ngenyi aguhengelesewa mukunda nu adi athu aleba. ⁸ Uvi ima ya gudia yajiyilego gutuvutula gua Nzambi. Tushigo mutshita gubola gula tushigo mu idia nga nji gula tua idia. ⁹ Uvi udikhaledi wenu ukhadigo gifua gibingua gu gubua gudi ago adi aleba mu gutshigina. ¹⁰ Gula muthu muko wagumona, yago udi nu ujiyi (ndunge), mudia saba yago yahanewa gudi nzambi jia isongo, wajiya guhana jingolo gudi aleba ha gudia yago idi muhanewa nzambi jia isongo? ¹¹ Ngenyi mukunda nu guvua nu gukotelesa guenu ha ndaga ya diago ya isongo, munetu, mukunda nu aye Kilisto wafuile, udi yagutota. ¹² Ngenyi gula watshita muabola gudi aphangi'aye nji wamonesa matangi awo aleba, watshita muabola gudi Kilisto. ¹³ Henyaha gula ima yenu ya gudia idi gifua gikhakuishilo gudi munetu, mba ngushigo mu idia, nge mbangukhadigo gikhakhushilo gudi panji'ami.