¹ Luenyelu, mukunda nu ima muangusonegena, gudi muhugo agula yala mungoshi gubandesa ndo mukajienji, ² Uvi mukunda nu gulolewa, yala diagasue akhale nu mukajienji, nu mukhetu wagasue akhale nu mulumienji. ³ Yala udiudi nayo guhua mukajienji yago idi nayo muene nu uhinyinyi mu mahata awo, luholo lumishi nu mukhetu gua mulume'inji. ⁴ Ishigo mukhetu udi nu uhunyinyi gu muila wenji hakhenji, idi mulumi'enji, gashigo nu uhunyinyi wa muila wenji muene hakhenji, udi mukunda nu mukajienji. ⁵ Mushigo nayo guditunyisa gubita (gudikhalesa, gudibungisa mila yenu) khuta gula muadivisa egi tushigo mudibita. Nga gudibandesa mukumbi dingoshi diazonda dimuadihui, ngenyi na muajiya gudihana gu gukombelela. Nu muajiya gudibungisa luko, ngenyi Satana gajiyilego gumilola mukunda nu guleba guenu gua matangi. ⁶ Ngudi gumiwambela ndaga jiji gifua malongo ngudi gumihua, ikhadigo gig=fua mukhuala ngudi gumihua. ⁷ Ngudi mudifelela egi muthu yagasue akhale gifua ame. Uvi muthu yagasue wahetele guhua gua Nzambi, muko mukunda nu yeyi muko mukunda nu iko. ⁸ Gudi ago ashigo mu mahata nu gudi ago adi akhetu agafunda, ngudi muzuela egi idi yabonga ha gusala gawo luholo luago adi gifua ame. ⁹ Uvi gula ajiya gudihinyina, ajiya gungina mu mahata. Ndaga ya yajiya gukhala yabonga ha ene gungina mu mahata, mukunda nu ajiyilego guvua ngina ya mila. ¹⁰ Luenyelu gudi ago adi mu mahata ngudi muhana mukhuala owu, (ishigo ame, uvi Fumu): << Mukhetu gajiyilego gudikaphumuna nu mulumi'enji. ¹¹ Uvi gula muene watshita, udi nayo gukhala hakhenji, gula ndo udi nayo gudilonda nu mulumi'enji. Nu yala gajiyilego gubemba makaji'enji.>> ¹² Uvi gudi ago asala, ngudi muzuela (ame, ishigo Fumu), mukunda nu nga munetu mumoshi yago gashigo muenya gutshigina nu yago udi muene mudivua egi wajiya gukhala nenji. Gajiyilego gumubemba nga gushiya mahata nu muene. ¹³ Nu gula yala udi nu mukhetu yago udi gashigo muenya gutshigina, yago udi muene mumona egi wajiya gumuzula ha gukhala nenji, muene gajiyilego gumubemba (gushiya mahata) nenji. ¹⁴ Ndaga ya yala diago udi gashigo muenya gutshigina wajiya gulomba gudi mukajienji yago udi wabonga udi muenya gutshigina. Mukhetu yago udi gashigo muenya gutshigina, wajiya gubua muenya gutshigina gudi mulumi'enji muenya gutshigina. Gula ngenyi ndo, anenu mbakhala abola, uvi luenyelu adi abonga. ¹⁵ Uvi gula futa diago udi gashiogo muenya gutshigina waya genji, mubembe aye. Mu ngenyi munetu ya yala nga munetu ya mukhetu gajiyilego gukhala ya gujitshigiwa gu mikhuala ya mahata (ufuta) awo. Nzambi watutamegene ha gukhala nu monyo mu guhuima. ¹⁶ Ndaga ya ushigo mujiya, mukhetu mahugo mukunda nu ngenyi wajiya guhuluisa mulumi'aye? Nga muabonga, gifua itshi iwudi mujiya yala mbauwuhuluisa mukaji'aye? ¹⁷ Khuta muthu yagasue asle luholo lua mutombewe gudi Fumu, nu luholo luago lua Nzambi wamutamegele. Yeyi idi mukhuala wami mu Ekelejiya yagasue. ¹⁸ Ngenyi agasue adi agumbiwa gu mukanda hago atamegewe? Ngenyi alodigo gukatula ijiyilo yawo ya mukanda. Muthu udi gashigo muenya gutshigina gula watamegewa ha gutshigina, udi nayo yagumbiwa gu mukanda? Gashigo nayo yaguhagewa mu loji. ¹⁹ Ndaga yabalega gubonga ishigo gumbiwa mukanda, uvi ndaga yabalega gubonga idi gutumaga gu mikhuala ya Nzambi. ²⁰ Muthu yagasue udi nayo gusala gu mudimo wakhalele nawo muene hago Nzambi wamutamegene mu gutshigina. ²¹ Muakhalele ahiga hago Nzambi gamitamegene? Mukhadigo nu gikenene mukunda nu ngenyi. Uvi gula muajiya guzoga mu uhiga, zogenu. ²² Mukunda nu yago watamegewe gua Fumu gifua muhiga udi nu uhuminyinyi nga guzoga mu uhiga mukunda nu Nzambi. Idi luholo luene lumoshi nu yago udi nu uhiminyinyi (diphanda) hago hatamegewe mu gutshigina. Wakhalele muhiga hago Nzambi wagutamegene? Ukhadigo nu gikenene mukunda nu ngenyi.Uvi gula wajiya gusala mu itshita mukunda nu Kilisto. ²³ Muasumbiwe mu mubando wakola hene mukhadigo ahiga a athu. ²⁴ Anetu, nga idi gikhuatshi mukunda nu mudimo wetu hago tuatamegewe, tusale ngenyi. ²⁵ Luenyelu, mukunkunda nu ago adi khenji anginyine mu mahata, ngushigo nga mukhuala gudi Fumu. Uvi ngudi muhana matangi gifua yago udi mukunda nu gisemo gua Nzambi, watagana gu luendu. ²⁶ Uvi mukunda nu malamba adi musagesa, idi yabonga ha muene gusala hakhenji (luholu adi). ²⁷ Udi yagujitshigiwa gudi mukhetu? Ukambigo ha gumutuna. Ushigo nu mukhetu? Ukambigo ha gungina mu mahata. ²⁸ Uvi gula wangina mu mahata, watshitshile ndo gubola. Nu gula ndumbu ya mukhetu ya ngina mu mahata, gatshitshilego gubola. Ndaga idi egi ago adi mungina mu mahata mba akhala nu ndaga jiavula hadi hene nu monyo, nu nga tshigina gumibamba mukunda nu ngenyi. ²⁹ Uvi ngudi muzuela egi, anetu: kumbi didi diahihia. Henyaha ago adi nu akhetu adi nayo gusala gifua ago ashigo nawo. ³⁰ Ago adi mudila ajiya gutshita gifua ago ashigo mudila, ago adi mudisuanguluisa gifua ashigo musuanguluga, nu ago amusumba ima atshite gifua ashigo nu gima. ³¹ Nu ago adi mutshita jindaga nu ima ya ha mavu, atshite gifua ashigo mutshita nga gima ndo mu ndaga jia hamav ima yau, ndaga ya ha mavu idi muya nu guhua. ³² Ngudi nu guzumba egi mukhale gifua muthu gashigo nga nu ndaga ndo. Yala udi ndumbu udi ya gunginyishiwa mu ndaga jia Fumu luholo tshi gumusuanguluisa. ³³ Uvi yago udi mu mahata udi ya gumagesewa mu ndaga jia hamavu nu udi mukamba gusuanguluisa mukaji'enji. ³⁴ (Udi ya gudikapha.) Mukhetu ya ndumbu nga mukhethu yago khenji ajiyile yala ndo wanadilonda gu mudimo wa Fumu nu wanakamba ha gukhala watagana gu muyila nu mu nyuma. Uvi mukhetu ya mahata wanakamba ima ya ha mavu, nu ha gusuanguluisa mulumi'enji. ³⁵ Ngudi muzuela ngenyi mukunda nu gubonga guenu, uvi ishindo mukunda nu ha gumihua woma, uvi mukunda nu yago idi yatagana ha gula mukhale nu gudihana gudi Fumu gashigo nji nu guvungalala nga gumoshi. ³⁶ Uvi, gula muthu mumoshi watangiza egi gashigo muzangula mukaji'enji wago adi mulongesa gu mahata nu ginemua (ndaga wa balega kumbi (wa tula) ), wajiya gutshita gifua mudi muene mutshigina. Ishigo gubola. Wajiya gumuzangula. ³⁷ Uvi gula gashigo mutshigina gumuzula nu gushigo ndaga ya phushi-pushi nu gula wajiya gudibamba, mbautshita muabonga gula gamuzanguilego. ³⁸ Ngenyi yago udi muzula mona mukhetu yago udi watshita muabonga nu yago watomba egi gashigo gumuzangula, wabalega gutshita muabonga. ³⁹ Mukhetu udi yagujitshigiwa gudi mulumi'enji hago hadi muene nu monyo. Uvi gula wafua, mukhetu nu diphanda ha guhagewa nga gudi nanyi, uvi ikhale khuta gudizula gua mu ginzambi. ⁴⁰ Luenyelu, mu matangi ami mbaukhala nu gusuanguluga guavula gula udi gifua muatshigina muene. Ei ngudi mutangiza egi, ngudi nji nu givule giabonga gia Nzambi.