¹ Aphangiami amala nu akhethu, ngajiyilego gumiwambela gifua athu a munyuma, uvi gifua athu a mu uthu, gifua athu agubutshiya guhe-guhe mu Kilisto. ² Ngudi gumihua mele uvi thumba ya gudia ndo. Nu unu luenyelu mushigo gale hehi. ³ Mukunda nu mudi luko enya muila. Idi mukunda nu giphi nu gudinyonga gudi mukatshi dienu, mukhadigo gifua luholo lua uthu nu muwendigo mu luholo lua muila. ⁴ Gula muthu mumoshi wazuela egi: << Ngudi mukunda nu Paula,>> nu muko egi: << Ngudi mukunda nu Apolosa,>> mushigo mujiya egi mudi mukhala gifua enya muila? ⁵ Nani udi Apolosa? Nu nanyi udi Paula? Mukunda atshitshi a mudimo wa nanyi muatshiginyine, Nzambi wa hanene mudimo wa lukuma lua bonga gudi nanyi. ⁶ Ngudi mukuna, Apolosa udi mumbila meya, uvi Nzambi udi mukudisa jimbuto. ⁷ Hene, yago udi mukuna nu udi mumbila meya ashigo nu gima adi gituhu. Uvi Nzambi wana gukudisa jimbuto. ⁸ Luenyelu yago udi mukuna nu udi mubila meya adi luholo lumoshi, nu mungoshi nu mungoshi mba uheta gishimbigo gienji gifua luholo lua mudimo wenji watshitshile muene. ⁹ Mukunda tudi enya mudimo wa Nzambi. Mudi gilanga gia Nzambi, efugiwi ya Nzambi. ¹⁰ Luholo lua ngasa ya Nzambi yago yanguhuiye ngahagele fondasho gifua mutungi yago watema, ngudi muhaga fondasho, muko udi mutunga holu. Uvi muenyewu udi nawo ukhala yago udi yagutema nu musasu hago adi muene mutunga holu. ¹¹ Ndaga ya gushigo nga muthu mumoshi wajiya guhaga fondasho iko gifua yago gahagewe yago udi Yesu Kilisto. ¹² Henyaha yago yagasue udi mutunga holu dia fondasho nu holu, nu jifalanga, ni jiseso jiago jiabonga, nu mitshi, nu muangu, ¹³ mudimo wenji mba ukhala mudijigiwa mumuanya lua lusugu luene. Ndaga ya mbaulolewa mu tshuya tuago tua tuanalola luholo luagasue yatshitshile muthu nu muthu. ¹⁴ Gula yago watshitshile muthu nu muthu yakola, muthu muene mbauheta gishimbigo gienji. ¹⁵ Uvi gula yahia, muene hakhenji mbaumona dilamba diazonda, uvi mbaukhala yaguhuluishiwa mu tshuya. ¹⁶ Mudi mujiya egi mudi gikombelelo (inzo ya Nzambi) nu givule (nyuma) gia Nzambi gianakhala mukatshi dienu? ¹⁷ Gula muthu washiya inza ya Nzambi, Nzambi mba umushiya nji. Ndaga ya inzo ya Nzambi idi santu nu enue nji. ¹⁸ Muthu gadihuigigo. Gula mumoshi mukatshi dienu watangiza egi udi watema, mu lukhama lua ivo yeyi, abue monya maluiyi ngenyi mbaukhala watema. ¹⁹ Mukunda nu gutema gua enya hamavu gudi maluiyi gudi Nzambi. Ndaga idi ya gusonegewa, waza saguisa athu atoma mukatshi << ungilo wawo.>> ²⁰ Holu diayo, Nzambi udi muya egi matangi a muthu watema adi aheya. ²¹ Ngenyi, mukhadigo nu gudihala holu dia athu, ndaga ya ima yagasue idi nu enue. ²² Gula Phaula, nga Apolosa nga gufua, nga Sefaya, ima yago idi mumuenega nu meso nga ima yago idi gutuama, yagasue idi nu enue (n'enu), ²³ nu mudi Kilisto nu Kilisto udi Nzambi.