¹ Hago ngajile gudi enue, anetu a mala, ngajilego nu mbimbi jila legulegu nga gutema hago ngakhalele gumi longesa giamatshidia giagudisuega gua Nzambi. ² Ndaga ya ngadilogele hagula ngajilego gujiya nga gima gimoshi hangakhalele mukatshi dienu, gukatula Yesu - Kilisto, nu yago wahagewe ha mutshi wa gudikikisa. ³ Nu ngakhalele n'enu mukatshi dia guleba nu woma, nu gudibinda guavula. ⁴ Mbimbi jami nu githemua giami ya akhalelego jiagutshiginyishiwa jiagutema, jiakhalele gudidijiga gua vula gua bonga nu jia ngolo, ⁵ Hagula egi gutshigina guaye gukhadigo mu luholo lua gutema gua uthu, uvi mu unduyi wa Nzambi. ⁶ Luenyelu tudi muzuela mukunda nu gutema mukatshi dia athu agukula, uvi ndo mugutema gua mavu awa, mukunda nu lukhama lua ivo idi mubalega. ⁷ Uvi tudi muzuela mugutema gua gudisuega gua Nzambi, giamatshidia giagudisuega gia zuelele Nzambi gudiangela gutuama mukunda nu lutumbu luetu. ⁸ Gushigo nu mukhuala wagutema gua lukhama lua ivo yeyi idi ishigo mujiya gutema guogu, ndaga gula tuajiya muhugo diene dinyi akhalele nayo yaguhaga Fumu ya gutumbuga ha mutshi wa gudikikisa. ⁹ Uvi gifua idi yagudisonega << Ima yago idi ishigo mumonega gu meso nu yago idi nga kutshi gumoshi guvua ndo, nga givule gimoshi giajiyilego gumba matangi, ima yago ya londele Nzambi gudi ago adi muyizumba >>. ¹⁰ Yeyi idi ima ya tudijigile Nzambi mu givule gienji, ndaga givule giana guwunguluga ima yagasue nga gosha matangi a Nzambi. ¹¹ Mukunda nu nanyi wajiya gusondolola matangi a muthu gukatula givule gienji? Ngenyi muthu geshigo mujiya gosha matangi a Nzambi gonze ya givule gienji. ¹² Uvi tua zanguilego givule gia ha mavu awa, uvi givule gia Nzambi, ha gula egi tuajiya muabanga ima ya tuhuwe gudi Nzambi. ¹³ Tudi muzuela mukunda ima yeyi mu mbimbi nga mu gutema yajilego gulongesa uvi egi givule gia bonga atulongese, givule gia bonga giana balumuna jimbimbi jia mu unzambi nu gutema gua unzambi. ¹⁴ Muthu mumoshi gia uthu gajiyilego guheta ima idi mutalela givule gia Nzambi, ndaga ya mukunda nu muene idi ima ya gituhu. Gajiyilego guyijiya ndaga ya idi ya unzambi gifua yajiya gulumbuluishiwa. ¹⁵ muthu ya mu unzamùbi wana lumbuluisa ima yagasue, uvi gashigo gudihana gosha ako. ¹⁶ << Nanyi wajiya givule gia Nzambi ha gumulongesa?>> Uvi esue tudi nu givule gia Kilisto.