¹ Mu ndaga guhua gu Givule giabonga gu muangukudile, anetu, ngushigo mutshigina egi mukhale ajimbidi. ² Muajiya egi gula mudi miphanyi (mushigo enya gutshigina), muakhalele a gutota mu njila jia gukombelela isongo (ikhokho) muenjelo yene yakhalele gumutuameza. ³ Henyaha ngudi muzamba egi muthu yagasue yago gashigo muzuela mu Givule gia Nzambi,udi muzuela <> gushigo nga muthu mumoshi gajiyilego guzuela : << Yesu udi Fumu>> yago udi yaguhagewa mu lukalo gua givule gia bonga. ⁴ Gudi nu guhuwa guavula gua givule giabonga, gudi givule giene gimoshi (gingoshi) ⁵ Nu gudi nu midimo yavula, uvi khuta Fumu muene mumoshi (mungoshi). ⁶ Nu gudi miho yavula ya mudimo, uvi khuta muene Nzambi mumoshi (mungoshi) wana gu uhana gua muthu nu muthu. ⁷ Gua muko gudi guhuwa gua gudinyigisa gua givule mukunda nu bonga gukhala gua agasue. ⁸ Gua muko gudi guhuwa gua ndunge jia guzuela, gua muko guhuwa gua mbimbi ya gujiya gudi Givule giene gimoshi (gingoshi). ⁹ Gudi muko gudi guhuwa gua gutshigina khuta gudi Givule giene gimoshi gua muko gu huwa gua khapo dia usagi. ¹⁰ Gua muko, guhuwa gua khapo dia gutshita ndaga jia gushimana, gua muko khapo dia gutshita ndaga jiagushimana, gua muko guhuwa gua khapho dia guzuela ndaga jia gutuama, gua muko, gujiya gukaphumuna jindaga jia ivule, gua ako guhuwa gua khapho dia gujiya mazuelelo. ¹¹ Uvi, Nyuma wabonga muene mumoshi watshita nu ndaga jiagasue, guhana guhua gudi mumoshi nu mumoshi gifua mudi gutomba guenji. ¹² Gifua muila udi umoshi nu udi nu izeza yavula nu yagasue idi izeza ya muila umoshi na mungenyi udi nu Kilisto. ¹³ Ndaga ya gudi nu Nyuma mumoshi mu muene tuabatijiwe mu muila wene umoshi, enya yuda nu enya Geliga, ahiga nu ago adi nu ukhaledi agasue tuananua mu Nyuma muene mumoshi. ¹⁴ Ndaga ya muila gizeza giagituhu, uvi izeza yavula. ¹⁵ Gula kulu guzuela egi: << Ndaga ,ngushigo koko, ngushigo gizeza gia muila >> gushigo nga gitshinyi gimoshi giajiya gukhala giagituhu. ¹⁶ Nu gula kutshi guazuela egi: << ndaga ya ame ngushigo gami iso, ngushigo gami gitshinyi (gizeza) gia muila.>> Giajiya gukhala gia gituhu. ¹⁷ Gula muila wagasue udi khutu iso, itshi yajiya gukhala luholo lua gudivua? Gula muila wagasue udi kutshi, itshi yajiya gukhala vumba dia mu mazulu? ¹⁸ Uvi Nzambi wanalonda gizeza giagasue gifua wagidiangesele. ¹⁹ Uvi gula yagasue idi itshinyi imoshi, itshi yajiya gukhala muila? ²⁰ Luenyelu gudi itshinyi (izeza) yavula, uvi muila umoshi. ²¹ Iso diajiyilego guwambela koko egi: << ngushigo nu aye ndaga>>. Nga muto guwambela malu : << Ngushigo nenu ndaga.>> ²² Uvi itshinyi (izeza) ya muila idi gifua ishigo gayo nu ndaga, yene idi diago nu ndaga. ²³ Izeza ya muila yago ituakhadi mumona egi ishigo diago nu ndaga, na tudi muyihua diago ginemua giabalegela gukoma, uvi izeza (itshinyi) ya muila yago ituakhalele mutangiza egi idi ishigo nu ndaga, na tudi muyihua ginemua. ²⁴ Luenyelu izeza yetu ya muila yago ya idi yabalega gubonga, ishigo nu ndaga ya ginemua, ndaga ya idi gale nayo. Uvi Nzambi wabungishile izeza yagasue nu wahanene ginemua gudi yago yakhalele go nagio. ²⁵ Watshitshile ngenyi mukunda nu gudikhaphumuna gukhadigo mu muila, uvi izeza izangule ginemo gimoshi nu gimoshi nhu guzumba gua luholo lumoshi. ²⁶ Na gula gizeza gimoshi gidi mulomba gama (mu malamba), izeza yagasue ya muila idi mulambagana luholo luene lumoshi. Nga nji gula gizeza gimoshi gia muila gidi munemesewa, izeza yagasue ya muila idi nu gusuanguluga. ²⁷ Henyaha mudi muila wa Kilisto nu mu uthu wenu hakhenu izeza yenji. ²⁸ Nu Nzambi wahagele mu Ekelejiya hugo diagudiangela Apostolo, diangiadi azuedi a ndaga jia gutuama, gu ngima, alingeshi a lukuma luabonga, haguhatelela, ago adi nu guhua gua gusthita ndaga jia gushimana, hugo diko ago adi nu guhua gua gusaga athu, gu ngima dienji ago adi nu guhua gua ukuateshi, ago adi nu uhunyinyi wagutala athu ako, gu ngima dienji ago adi nu guhua gua guzuela mazuelelo hahe-hahe, tudi agasue Apostolo ba? ²⁹ Tudi agasue a ndaga jia gutuama ba? Tudi agasue alongeshi a lukuma luabonga ba? Tuanatshita ndaga jigushimana. ³⁰ Agasue tudi nu guhua gua usagi? Tuanazuela mazuelelo ahe-ahe? Tudi akoteleshi a ndaga? ³¹ Uvi hangienu mitshima yenu (matangi) enu gu guhua guago guabalegela gubonga. Nu mbangumidijiga luhololuago luabalega gubonga.