¹ Okiu nde Naomi atuba ndenden: "Mon me, ndaleang oyi na ngemba, djwi oyi n'osiang. ² Boaz eyignemiki yie ti vear ande otshia enagn, apa ali otwung osu? Yen, otshuu one, asitsa nde nkwomo mbeam i orje imiyagn wo. ³ Yog vay, kwe vir, lwer ileam iyie, tshwag ne evur. Kansi yie, ziy elung akojia yie, kwung tii ko esishir nde nda ti gnwa. ⁴ Mby ntangu esitsa nde mvur lwong, lir ondii osishwe nde. Mby yie, tshwag oyen nkuu inde, vur kog. Asokaba nde ndemie vim nge efwete yie nkie. ⁵ Okeara ndenden: "Asikie me inkeankum imituba yie." ⁶ Atsa ondii omiyagn wo mbeam, akie mpi ko oshin oyitubi okiu nde. ⁷ Boaz ala, agnwa, etura ende ayiwo n'osiang. Atsa mvur n'ikri i obuye e mbeam imuu. Ruti mpi ayia okwog-okwog, ayen nkuu inde, mby avur lwong. ⁸ Ne ngnina otshuu, wur ewo ayug womo, ntangu emilir nde, ayen onkear omog ativur ne ngie i nkuu inde. ⁹ Atuba ndenen: "Yie nagn?" Okeara ndenden: "Eli mug Ruti, wur eyie otshia onkear, shima ewuo eyie ne djuung i wur eyie otshia, ogniang oli n'ekub e nkea mfuta ekri djwi na su." ¹⁰ Mby atuba ndenden: "Yaweh osakumuni yie, mon me! Ogniang luzitu emiyegne yiembala ene, elenga eyiyegni yie nteang ya okiu yie, djwi, okakug nding onkwo eli omva to nkea otsun ve. ¹¹ Opeane, mon me, oyalur vim emog ve, asikie me djwi na yie, vim enkeakum esituba yie, ogniang vear ankeankum wajia wuwun olionkear omog e wuo. ¹² Eli vi-a-vii, ndi na ekub e nkea mfuta ekri djwi na gnu, kansi eli na otwung omuu ali ne nteang eme. ¹³ Vur otshuu one nndien, mby nampign silir yug nde asikug nde mvey odzur oyie, avey; yug akaleang ve, me asivey me, ne dzin i Yaweh eli na luzingu! Vur nendien, vuna okeam. ¹⁴ Avur ne ngie i nkuu inde, tii vuna ekeam, abiy nteang djwi wakayene n'ilung. Boaz atuba ndenden: "Wakajia wuwun elin'onkear emog ayinde nhwe n'evur. ¹⁵ Akea ntuba ndenen: "Ngama eleam eli yie na wo." Mby Boaz otsuga isag isom i mbeam i orje, avara n'ibwomo n'ote mby s'akey nde wiya. ¹⁶ Ruti akea etay eli okiu nde, mby Naomi atuba ndenden: "Ene yog, mon me?" Ruti okaba vii ankeankum ayitubi wur enagn ya nde. ¹⁷ Atuba ndenden: "Atimpea isag isom i mbeam i orje ene, ndenden: 'Kaku mpila ekea yie ko ewuo mpama ve etay e okiu yie.'" ¹⁸ Mby Naomi atuba ndenden: "Mon me, yia pwo, tii ko eyajia yie oshin oyashir vii awo. Ogniang wur ene apakug ngyor ve yug atoshiri vii ane lwo ene."