¹ Boaz avean etay eli epfug, ayima. Aten wur eyitubinde ndenden asikug nde mvey odzur, ndean aleleg. Boaz atuba nda nde ndenden; "Yie wur ene, yag, tosatsuga nendien." Ayia mpi, ayima. ² Boaz avie antsuru a wiya djum, atuba ndenden: "Gnemagni nendien." Wo mpi s'agnemiwo. ³ Mby atuba nda wur enagn ekug mvey odzur ndenden: "Naomi emikea yim buu e Moab, aling nsar ikab i buu iyisasugn otwung osu Elimelek. ⁴ Aleang me nonkaba yie, memen: Ne nteang evear a wiya ti ne nteang antsuru a wiya, vey nde wear. Yug oling nkea mfuta ekri, futa; kansi yug otun, onkabi ngyug. Ogniang ne nteang eyie, kaku wur emuu ve, ne mby eyie, eli mug." Mby nde akeara ndenden: "Asovey me." ⁵ Boaz atuba ndenden: "Eshuu eyashum yie evur ewo n'ewuo e Naomi, ayashum yie mpiti n'ewuo e Ruti, onkear o nsakwe eyim Moab, djwi nkea nsiang dzin i ongob osu ne oleama-nzo ende." ⁶ Mby wur eyikug na mvey odzur atuba ndenden: "Mpakug na nshum djwina me ve, ogniang oleama-nzo eme ekawa; yie vey odzur owo ne ondii ome, mpakug ve." ⁷ Nteang-nteang, n'Israel, ayikiwo, yug wur aling nshum vim ya wur emuu, o yug waling nsongo vim nda wur, olimi antwum ayie ne nkuu, opi ya wur enagn. Enagn wog vim esikab wuwun vii awo atishir. ⁸ Wur eyikug na mvara odzur s'atubinde nda Boaz ndenden: "Shumwog ne din iyie!" Mby s'aliminde antwum ande ne nkuu. ⁹ Mby Boaz atuba nda antsuru a wiya ti ya vear ankeankum ndenden: "Lwo ene, Olagni wantiegn oshin omishum me n'ewuo e Naomi, vim enkeankum eyike djwi na Elimelek, ti Kiljon, ti Maklon, ¹⁰ ti oshin omisame kr Ruti eyim Moab, wear me, djwi na nsiang dzin i ongob osu n'oleama-nzo ende,djwi dzin ongob ekwon ntsa ntu ne kati atwung ande ti ne wiya nde. Olagni wantiegn i vii awo lwo ene!" ¹¹ Vear ankeankum ayi n'epfug ti antsuru watuba wuwun: "Ee, sili wantiegn ivii ane! Sianga Yaweh avey onkear eshwe n'evuru eyie lwo ene, ayi kamsi Rashel ti Lea, wankeape, wamitwung okuu o Israel! Yegne biu oyie ne Efrata, mpi kie dzin iyie wajii ne Beteleem! ¹² Sianga Yaweh api ya aman ayawur osig onkear one wakum oshin omog ti aman a Peret, eyiwur Tamar ne Yuda!" ¹³ Boaz s'avey nde Ruti, akum wear nde, mpi atshikinde etay ende. Yaweh apea Ruti mbug e mvey djim, awur mon ompeam. ¹⁴ Ankear wakaba Naomi wuwun: "Yaweh avey lokumu, oshin okakwon nde n'ompea yie ompeam esikug nkea mvey odzur oyie, eli mpi dzin inde ayavey wo lokumu n'Israel! ¹⁵ Mon ene ayoliraka nde yie, mpi ayosarisa nde ne ntangu eyakum yie ognugn; ogniang, okiu yie en aloleang yie entsign, atowura mon,mon ewo alenga aman ampeam ashambia." ¹⁶ Naomi avey mon ewo otsug n'ipeo, akum ndeer ende. ¹⁷ Ankear ayi mbeama nde wopea dzin, wuwun: "Naomi ativea mon ompeam!" Mby wapea mon ewo dzin i Obed. Ndug eyi tea e Isai, e tea e David. ¹⁸ Yen aman ayisawur n'okuu o Peret. Peret awur nde Esrom; ¹⁹ Esrom awur nde Ram; Ram awur nde Aminadab; ²⁰ Aminadab awur nde Nakshon; Nakshon awur nde Salmon; ²¹ Salmon awur nde Boaz; Boaz awur nde Obed; Obed awur nde Isai, mby Isai s'awur nde David.