¹ Naomi ayinde na otwung o wum nde, ompeam omog biu ti otsun ya nde, ne opeang o Elimelek, dzin inde ayiwo Boaz. ² Ruti onkear o Moab atuba nda Naomi ndenden: "Ndawigna ya yie, sianga ntsi ntongo mbeam ne evur, mbala emuu nkea evur emuu asingyug nde ngy, ankabi na nkeaga mbeam i orje." Nde mpi opea mbug ndenden: "Tshwag, mon me!" ³ Atsa ntongo mbeam i orje ne evur emog, ne my e vear amuu alekeagi. Evur ewo ayiwo mpi e Boaz, wur opeang e Elimelek. ⁴ Boaz ko ndean ayia yim Betelem, atuba nda vear alekeagi mbea ndenden: "Yaweh ayi nda gnu!" Wokeara wuwun: "Yaweh osakumuni yie!" ⁵ Mby Boaz atuba nda kapita e vear ande otshia ndenden: "Osig onkear one eli wear e nagn?" ⁶ Kapita okeara ndenden: "Ali mon onkear oyim Moab, amiyia nda Naomi emikea nde yim Moab. ⁷ Atituba ndenden: 'Ompiagni mbug, nsatongo ko mbeam ileselog ne ebuye elekignu ene, ne mby e vear otshia.' Yim ko suka emiyia nde, ali ko ngiyima ngean tii opeane, atiyor ko fioti n'evuru." ⁸ Boaz atuba nda Ruti ndenden: "Mon me, yug, oyafitsa ntongo mbeam n'evur emuu ve, oyafitsa etey ve, sayia ko mbeama na vear ame otshia ankear ane. ⁹ Lir ko rtay ekeaga wo mbeam n'evur, yie tshwag ne mby ewo. Ntipum vear ame otshia ampeam ane wapokug n'onkir yie ve. Mpi yug oli na mpwi e vay, asignwa yie vay asitog vear otshia." ¹⁰ Mby nde, atsur elung, alog ne buu, atuba ndenden: "Oshin onkagn emivea me ngrasia ne vy ayie, djwi yie oyen mpi mfunu eme, me wur eli ongingien?" ¹¹ Boaz okeara ndenden: "Wami nkaba oshin onkeankum eyiki yie ya okiu yie yim ko emiwa wum yie, ti oshin omisasugn yie tea yie ti mea yie, ti buu eyowur wo, djwi otsi etay eli vear apitigni yie njia nteang. ¹² Sianga Yaweh opi yie vii amikie yie, mpi ifutu iyie iyim etay e Yaweh iyi opfugn, nde Nzeam Israel, nendien omiyia nzuba ne ngie apaab ande!" ¹³ Mby nde akeara ndenden: "Oh nkum eme, sianga mviy ngrasia ne vy ayie! Ognianga otinkeya etura, mpi otituba n'etura eme wur eyie otshia onkear. Me, mpiyer ata ma wur eyie otshia onkear emog nendien ve." ¹⁴ Ne ntangu elawo, Boaz atuba nda Ruti ndenden: "Vanga nendien, ole mampa, tub mampa ne vay ongnign ene." S'agneminde mpi ondii oli vear otshia. Wopea ebeam emog emifum wo, ala mpi ayur, asawum ikab iyisatsuga. ¹⁵ Mby akea ngyima djwi na ntongo mbeam i orje. Boaz s'atubinde ndavear ande otshia ndenden: "Siangagni nde akeagi wambeam ne ebuye, oyagniangagni ve, ¹⁶ ata gnu, sarisagni nde na nkeaga mbeam ne ebuye emuu, yatubagni ya nde ve." ¹⁷ Atongo mbeam inagn tii ko epiyekwo ne evur enagn, akwomo wog mpi. Avea ibwomo opfugn. ¹⁸ Avara, s'akey nde na wo ne wiya. Okiu nde mpi ayen mbeam iyitsi nde ntongo. Apur ti vim a nda ayisatsuga, apea ya okiu nde. ¹⁹ Okiu nde oyue ndenden: "Atongi yie mbeam ine nonkagn lwo, mpi aki yie otshia nonkagn? Wur emivea mfunu eyie ene avey lusakumuna! Mby Ruti akaba okiu nde wur ewo ondii eyikinde otshia, ndenden: "Wur eo dzin inde Boaz." ²⁰ Naomi atuba nda okiu nde ndenden: "Yaweh osakumuni, nde wue etsangyug vear ali ne luzingu ngy, oshin oyiyugikinde vear amiwa ngy! Wur enagn, ali otwung osu, ali n'ekub esikug nde nkea mfuta ekri ne djuung isu," Naomi okaba oshin onsgn. ²¹ Ruti, onkear o Moab akea ntuba ndenden: "Satsuga ti vear ame otshia, tii ko eyashira wo evur opfugn." ²² Mby Naomi atuba nda okiu nde Ruti ndenden: "Mon me, eli wuo, olepwike ti vear ande otshia ankear, mpi wakwon ongyen yie ne evur emuu ve." ²³ Asatsuga nda vear otshia ankear e Boaz, djwi na ntongo mbeam i orje, tii ko ntangu eyishiri wo, ti na nkeaga mbeam i ble. Asande yia ko ti okiu nde.