¹ Ne nshuu inagn, vear walega nkum entsign, mpi wakayia na vim a nda ve. Mby Yezu avie walongoki inde, atuba nda wo: ² "Ndi na ngy e vear ane; wakie nshuu isar etay ti me, kaku vim emilawo ve. ³ Yug makeara ne mvuru iwo na nziya, wapavea biu ne mbug ve. Djwi amuu wayin etey. ⁴ Walongoki inde wokeara wuwun: "Nonkagn esikug su mvea mampa ne buu e ndzum ene djwi vear ane wayur?" ⁵ Yezu ayuue: "Mampa kwe elingu na wo?" Wuwun: "Ishiambia". ⁶ Mby atuba nda vear anagn na gneme ne buu. Avey mampa ishiambia inagn, akeara nsag-na-viye, mby s'abag nde itign itignApea wog ya walongoki inde djwi na mpea vear, mby s'apiiwo ya vear anagn. ⁷ Ayiwo diaka n'ivim i ntse, mpi ntangu emishir nde mpea nsag-na-viye, atum walongoki na nkeampea wog ya oluy o vear anagn wuo. ⁸ Wala, wayur mpi wavara isag ishiambia etiyuo to n'iting i ntse. ⁹ Ayiwo etitign e vear nkam inign. Mby akeara vear anagn etay ewo. ¹⁰ Etean kaku, ashwe ne war ti walongoki inde, mby s'atshiwo buu e Dalamanuta. ¹¹ Wafarize wayia, wabana ntuba wa Yezu mpi wotesa; waling kidimu eyim dzug. ¹² Yezu, ntangu emikeande gnim ne mpeve, atuba ndenden: "Djwi na nge aman a ntangu ene, waling ko wayen kidimu? Vi-a-vii, mokabagni, kaku kidimu eyavea aman a ntangu ene ve." ¹³ Mby asasugn, akea nshwe ne war, s'atshinde nky emuu egni. ¹⁴ Walogoki wajing na mvey mampa. Ayiwo ko na mampa emog ne war. ¹⁵ Yezu atuba nda wo ndenden: "Osugagni na levir i mampa i wafarize ti levir i Erodi." ¹⁶ Walongoki wabansa wog na wog wuwun: "Eli djwi kaku su na mampa." ¹⁷ Yezu tangu emijia nde, atuba ndenden: "djwi na nge ebansa gnu djwi na mampa ikwon su? Opijiagni ata vim ve? Kaku waagn ya gnu ve? ¹⁸ Olagni na viy, kansi opiyenagni ve? olagni atii, kansi opiyugagni ve, nge opikanagni ve? ¹⁹ Ntangu eyibag me mampa itign itign eyili vear awug atean, asatongo gnu isag ikwe?" Wokeara wuwun: "Djum n'ipe." ²⁰ Ntangu eyibag me mampa ishiambia djwi na vear awug anign, atongignu isag ikwe?" Wokeara wuwun: "Ishiambia." ²¹ Mby atuba ndenden: "Opijiagni ata vim ve?" ²² Wakum ne Bethsaida. Vear ali kog wojie wur emog apiyen ne viy. Wawigna ya Yezu okir. ²³ Yezu akir wur epiyen enagn n'ewuo, opur ti nelien e wiya. Ntangu emivey nde asuy okwe ne viy ande, mpi oyab mbwo n'ote, mby oywe: "Vim nge eyen yie?" ²⁴ Alir, mby atuba ndenden: "Ndayen vear kamsi eshung elekien." ²⁵ Mby Yezu okea ontsug mbwo ne viy, ntangu emingama nde viy, avug, akea ngyen vim ankum wuo wuo. ²⁶ Mby Yezu okeara evuru ende, okaba ndenden: "Oyafikea nshwe ne wiya enen ve." ²⁷ Yezu akien ti walongoki inde ne viya i Sezarea e Filipu. Ne mbug s'ayuinde walongoki inde ndenden: "Vear atsawo ntuba wo wuwun ndi nagn?" ²⁸ Watuba ngean: "Yoane mbotiki. Amuu wuwun: Elia, mby amuu wuwun: Ngunsa emog e ntama.'" ²⁹ Ayue wo: "Mby gnu, atsagnu mbansa me ndi nagn?" me? Petelo atuba nda nde ndenden: "Yie oli Kristu." ³⁰ Yezu atuba nda wo nankwon nkaba ata wur na vii anagn. ³¹ Mby abana na nkaba ndenden Mon-wur ayayen nde mpay entsign, ayofanga wo ya antsuru ti ankum a wanganga- Nzambi ti walongo i nsiku, ayodjag wo, mby ne mby e nshuu isar, ayakeande mbiy n'ewa. ³² Awung ankaba vii ane wuo- wuo. Mby Petelo ovie n'ikri mby obana n'ognianga. ³³ Kasi Yezu, atshim mpi alir walongoki inde, agnianga Petelo, atuba ndenden: "Ne mby eme, satana! Djwi na yie mabansa Nzeam kaku ve, oliko na mabansa i vear. ³⁴ Mby s'avinde oluy o vear ti walongoki ondii omog, akaba ndenden: "Yug wur aling nsadjie me, atun nteang djuung inde, avari kulunsi ende, mby andani me. ³⁵ Djwi wur eli na mfunu e ngwum luzingu ende, luzingu ende ayatsaow ntu, kansi wur eli, luzingu ende etitsa ntu djwi na me, mpi djwi n'otuba o Nzeam, ayavuga nde luzingu ende. ³⁶ Mfunu nge ya wur na mvea okiri opfugn kansi asafanga moyo ende? ³⁷ Vim nge wur esikug nde nsongo na luzingu ende? ³⁸ Kansi wur esingyug me nsogn ti otuba ome ne kati aman a ntangu e lwo ene elekii itaay ti masumu ene, Mon-wur ayoyug nde nsogn, ntangu eyayiande na nkembo e Tea nde ti banzio inde i santu."