¹ Wafarize ti walong i nsiku imuu iyim Yeruzalem wayia mbeama na Yezu. ² Wayen walongoki imuu wayala vim a nda kansi mbwo iwo ili mbin, wakasuy. ³ Djwi wafarize ti wayuda inkum wapitsinda na mbwo mbin ve, atsawo nsuy yim ko antsuru awo. ⁴ Ntangu etsankea wafarize yim ilaga, atsawo nda ko yug watiyog djuung iwo inkum. Wali mpi na wansiku iwo imuu entsign itsawo nkie, kamsi na nsuy akob, awung ti wampugu i bibende, ti alongo amuu atsawo nda neti. ⁵ Wafarize ti ayuda s'ayuiwo Yezu wuwun: ''Djwi na nge walongoki iyie wapitsindana vii a ntama antsuru, atsawo nda ko na mbwo i mbin?" ⁶ Yezu akeara ndenden: "Ankea eyang ene!Ezaya abikulinde djwi na gnu, oshin omifugn wo: 'Vear ane wandeang ko n'odzum, kansi itura iwo ili ntama na me. ⁷ Wampea lokumu e mpama, na ndong wansiku, ili ko nsiku i vear.' ⁸ Watun Osasiangagni enkwon e Nzeam djwi osalemfukagni ko na vii a vear." ⁹ Akeantuba nda wondenden: "Odjagagni enkwon e Nzeam djwi osawumagni ko vii antsuru agnu. ¹⁰ Djwi Moize atubinde: 'Lemfuka ya tea yie ti mea yie, mpi nenden: 'Wur eyashing tea nde ti mea nde ayavey nde ndola ewa.' ¹¹ Kansi gnu, otubagni gnugnun: ''Yug wur atuba nda tea nde ata mea nde ndenden: ''Ayime na vim ompeagni, kansi ntifipea n'evuru e Nzeam (etuba na mpea ya Nzeam), ¹² enagn osasiangagni, apafikie ata vim ve djwi na tea nde to mea nde. ¹³ Enagn odjagagni otuba o Nzeam djwi na vii antsuru agnu, emitsug gnu. Mpi olekiagni vii amuu entsign oshin onagn." ¹⁴ Mby, akea mvie oluy o vear anagn etay eli nde, nda wo ndenden: "Ongyugagni gnankum mpi jiagni wuo. ¹⁵ Kaku vim etsanshwe ne kati e wur mby etsug wur mbin ve. Kansi eli vim esipwe nelien e wur, wog enagn etsampea disumu. ¹⁶ Yug eli na wur eli n'atii, ayug!" ¹⁷ Opeane, ntangu emishwe Yezu n'evuru atisasugn vear anagn, walongoki inde woyue djwi na etsig enagn. ¹⁸ Yezu atuba ndenden: "Ti gnu kaku waagn o njia ve? Opijiagni ve gnugnun kaku vim emog ve eyim nelien e wur, eshwi ya wur epopea mbin ve. ¹⁹ djwi vim enagn epashwe n'etura ende ve, kansi n'ipfugn inde, mby watsu mfanga n'ondii oziy?" Emituba Yezu ene, eli ndenen vim a nda ankum ali wuo. ²⁰ Akeantuba ndenden: "Eli vim epwe ya wur, wog enagn etsampea wur disumu. ²¹ Djwi eyim ne kati e wur, eyim n'etura, nginu ipwo, itaay, vii a mbin, i ndjag vear, ²² wumu, nziya ekri, ndeang vim ankagn, nkier, mbeam vear vii, omwong, ibuma. ²³ Vim akum apwo ane ilapwe ne kati e wur mpi epiy wur." ²⁴ Ntangu emilim nde kog, akien, atsa ne buu e Tyre ti e Sidonia. Ashwe n'evuru emog, akaleang vear ajiawo ondii oli nde ve. ²⁵ Kansi onkear omog, mon nde onkear ayinde na mpeve epwo, ntangu emiyug nde watuba djwi na nde, ayia ndog ne nkuu inde. ²⁶ Onkear owo ayinde Greki, itsin inde i buu eli Syria ti Fenisia. Awigna ya nde na nkma mpeve epwo enagn eli ya mon nde onkear. ²⁷ Mby Yezu atuba: "Tosianga aman watoyur. Djwi, epa eli wuo ve na mvey vim a nda aman na mpea wog ya wamva." ²⁸ Mby onkear owo akeara ndenden: "Ee, nkum, kansiwamva atsawo nda mpfuya itsa ndog ne ngie mesa ela aman." ²⁹ Mby atuba nda nde: "Djwi emituba yie ngwign, osikug nkien. Ontshung atipwe ne djuung i mon yie onkear." ³⁰ ntangu emikea nde ntsa n'evuru, ayen mon ativur ne ntir, ontshung ayiwo atipwe. ³¹ Mby akea ndim ne buu e Tyre, atsa buu e Sidonia, ne nzey e Galilea, wabag ne buu e Dekapolisi. ³² Wojie wur emog atii nkna, atuba mpi na mpay, mby wawigna ya nde djwi oyab mbwo. ³³ Olima ondii oli vear, otum n'ikri, mby oshwer mpign inde n'atii, mby okir n'elim n'asuy ande ndemie. ³⁴ Mby, alir viy dzug, agnim, atuba: "Ephphatha", etuba, "Ngama!" ³⁵ Etean kaku, atii ande angam, elim ende epub, abana ntuba wuo wuo. ³⁶ Yezu apum nakaba ata wur emog. Kansi yug alapum na nkwon nkab, wo walega ko na nkaba vear. ³⁷ Wayen ngituka entsign, watuba: "Vii ankum alekiinde eli ko wuo. Vear apiyug wayug, vear apitubi watuba."