¹ Yezu alim kog, akea ntsa wiya nde, mby walongoki inde wosodjie. ² Ntangu ekum sabat, abana ndong ne sinagoga. Vear entsign eyoyugike wayen ngituka mpi watuba: "Vii ane ayum n'onkagn? Waagn oshin onkagn emopeawo ene?" "Oshin o bidimu nge elekiinde ne mbwo inde ene?" ³ Ene epa wur otshia abaya, e mon e Maria, otwung o Jaki, e Joses, e Yudas ti e Simoni? Mpi atwung a nde ankear, kakuwo wa su nendien?" Mby akum nde, djwi na wo, ibag isalogo wo. ⁴ Kansi Yezu atuba nda wo: "Ngunsa atsawontun ko ne wiya nde, ondii oli atwung ande, mpi n'evuru ende." ⁵ Akakug nkie kog ata kidimu emog ve, ko mbwo itsugikinde vear a nkeang mpi elavugikinde. ⁶ Ayen nde ngituka oshin okwon vear anagn lukwikilu. Mby s'atshinde ndong along ne viya i pipi. ⁷ Mby avie walongoki inde djum n'ipe mpi abana antum ape n'ape, mby apea ekub ne dzug i mpeve ipwo, ⁸ Mpi apum na mvey ata vim emog djwi na mbug eletshiwo, wavey ko etign oshung: wakwon mvey mampa, ata ibwomo, ata ekri ne okori ikini, ⁹ kansi akaba na ndwer sandali, mpi apum na ndwer kazag ipe. ¹⁰ Mby atuba nda wo ngean: "Evuru esishwe gnu, yiagni neti tii ko ntangu eyakien gnu. ¹¹ Mpi wiya enkum esitun ongyamagni to ongyugagni, limagni ne wiya enagn, sapubagni okub o nkuu ignu djwi esayia ntiegn djwi na wo." ¹² S'akien wo mby, mpi wantsa ndong na ntshima itura. ¹³ Akmikiwo mpeve ipwo, akwikiwo vear a nkeang vir djwi na nkeang iwo s'alevugikiwo. ¹⁴ Nkum Erodi ayug watuba vii anagn, djwi dzin i Yezu vear awung wo njia wuo. Mby amuu s'atubikiwo: ''Ene eli Yoane atikea mbiy n'ewa mby s'alekiinde bidimu ine.'' ¹⁵ Amuu watuba wuwun: ''Eli ngunsa Elizea". Mby amuu wuwun: "Ali ngunsa emog e ntama." ¹⁶ Ntangu emiyug Erodi vii anagn, atuba ndenden: "Eli Yoane eyibag me ote, ndug wur emikea mbiy n'ewa. ¹⁷ Djwi Erodi ndemie atum nde vear na ntshung Yoane nkori wotum bolok. Djwi Erodiadi wear e Filipu, otwung onde, asande kum wear nde. ¹⁸ Yoane atubikinde nda nde: ''Ne nsiku, opikug mvey wear otwung oyie asakum wear yie ve''. ¹⁹ Erodiadi ayinde na nkier djwi na Yoane, alingikinde oshin nge esokug nde n'odjag. Kansi akaveaka mbug ve. ²⁰ Djwi Erodi alurikinde Yoane; ajikinde ndenden ali wur e masonga, wur e santu, mby alowumikinde wuo. Alingikinde ngyug akie bidimu, ayinde n'osiang na onyug nde. ²¹ Eta ko n'ibag, elaga eyiwur wo Erodi etikug, mby akie okina, avie ankum, ti wankum ayer-nkuu e Galilea. ²² Mon ankear Erodiadi ashwe n'ondii e okina, akangn mpi epea osiang ya Erodi ti vear amivie nde. Nkum ayue mon onkear: ''Wigna vim enkum, asopeame." ²³ Asila nda nde ndenden: "Vim enkum esiwigna yie, asopeame, ata ikab ekub eme." ²⁴ Mby mon onkear apwe ntsa nkaba mea nde: "Vim nge esikug me n'ongwigna?" Mby nde okaba: "Ote e Yoane Mbotiki." ²⁵ Akea eveang-eveang etay eli nkum, mpi okaba ngean: ''Ndaling ompi ko opeane, ote e Yoane Mbotiki n'ilongo." ²⁶ Nkum ayug ngy, kansi, djwi na vim emisila nde mpi djwi na vear alinde ti wo, kaku oshin omuu o nkie ve. ²⁷ Mby nkum s'atum nde iyer-nkuu emog etsankwung etay ende, n'onjie ote e Yoane Mbotiki. Iyer-nkuu atsa mbag ote ende ne bolog. ²⁸ Mby avara ote ewo n'ilongo s'apiinde ya mon onkear, nde mpi s'atshinde mpea meande. ²⁹ Ntangu emiyug walongoki i Yoane, watsha mvey djuung inde watsa mpfugn n'aluma. ³⁰ Watuma emikeawo etay Yezu, wokaba vii ankum ayikiwo ti ayilong wo. ³¹ Mby Yezu akaba ndenden: "Yagagni gnemie n'ondii e ndzum, yoragni neti fioti." Djwi vear entsign ayiwo waleye walekey, wo, wakavea ntangu e nda ve. ³² Mby s'ashwi wo ne war, watsa wemie ne buu e ndzum, n'ondii oli kaku vear. ³³ Kansi ntangu emayen vear ne ntangu elelimikiwo kog, wajia, wasatsa mpiog na nkuu, watear ne waviya, wakum ne nteang ewo. ³⁴ Ntangu emikum wo, etean kaku, Yezu ayen vear entsign, ayu ngy djwi na wo, djwi akum wo kamsi ameme akwon wur alir. Mby s'abaninde ndong vim entsign. ³⁵ Ntangu emijie vuna, walongoki wayia ondii olinde mpi watuba: "Ondii ene kaku vear, vuna wean etijie. ³⁶ Tum wo, watsu ne viya ili pipi, washum vim a nda asikug wo nda djwi na wo wemie." ³⁷ Kansi nde, akeara ndenden: "Peagni wo vim a nda." Mby wa nde wuwun: ''Asitsasu nshum mampa nonkagn na nkama ipe i denari djwi sipii ya vear ane wale?" ³⁸ Ayue wo ndenden: "Olagni na mampa kwe? Tshwag otoliragni." Ntangu emiyen wo, watuba wuwun: "Mampa itean na ntse ipe." ³⁹ Mby atuba nda wo watsug vear ankum wagnemi akina-akina ne dzug adjiu. ⁴⁰ Wagneme n'olwong o nkam emok, ti olwong e otean. ⁴¹ Avey mampa itean ti ntse ipe inagn, alir dzug olung, akeara nsag-na viye, mby, abag mampa itign-itign, mby s'apiinde walongoki inde na mpea vear anagn. Wakab ntse ipe inagn djwi na wo wankum. ⁴² Wakum wala mpi wayur. ⁴³ Watongo isag djum n'ipe itiyuo n'itign i mampa ti ntse imisatsuga. ⁴⁴ Wankum ayili ayiwo awugu atean a vear. ⁴⁵ Etean kaku, atsug walongoki inde ne war, watsu ne nky e Bethsaida, nde, atosakeara vear ankum wakien. ⁴⁶ Ntangu emikien wo, atsa n'ombimi djwi na nsama. ⁴⁷ Mpib etilog, war etikum ne ngnina e nzey, mpi Yezu atisatsuga ko ndemie ne nky. ⁴⁸ Ayiwo na mpay na nduka nkey, djwi opepe alekeyikiwo etay eliwo. Etitign e ntangu inign otshuu, s'aleyikinde etay eli wo, alekien ne dzug i nzey, ativanga mbeama na wo. ⁴⁹ Kansi ntangu emoyen wo alekien ne vay, wabansa wuwun eli emono, watsug elie. ⁵⁰ Woyen wankum, mby wayug womo. Etean kaku, atuba nda wo ndenden: "Yiagni na kikesa, eli mug, oyayugagni womo ve!" ⁵¹ Mpi akum etay eli wo, ashwe ne war nda wo, opepe mpi eshir. Wakum ayen wo ngituka. ⁵² Wakajia kidimu e mampa inagn ve, djwi itura iwo ayiwo biu. ⁵³ Ntangu emibag wo nzey, wakum ne nky, ne Genezarete, washiem neti. ⁵⁴ Ntangu emipwe wo ne war, vear, ntangu emojiawo nde, ⁵⁵ wakien etitign enagn enkum, mby wabana mvara vear a nkeang ne ntir, etay ekum eyiyugikiwo atikum. ⁵⁶ Endii emuu eyikum nde, ne kati e waviya inen to viya ikieg, aletsugukiwo vear a nkeang ankum ne alaga. Awignikiwo ya nde na nkir ko nsor eleam ende, mby vear ankum alekirike, avugikiwo.