¹ Wakum ne nky emuu e nzey, ne buu e wa Gadarenia. ² Mbale emog elepwi Yezu ne war, wur emog ayia ne nteang ende, ayum alum, mpi ayinde na mpeve ipwo. ³ Wur ewo atsande mpier neti alum, wakokugaka n'ontshung eshing, ata okor o bibende. ⁴ Otshungikiwo ntangu enkum bibende ne nkuu na eshing e bibende, kansi alebagikinde bibende inkum, kaku wur eyi na biu onkir. ⁵ Na otshu na mbiiy, ayikinde ko neti alum ti ne dzug embim, atsugikinde elie, mpi abagikinde wampura ne djuung inde n'atari. ⁶ Ntangu eyende Yezu etey, akim etay ende, atsankur abwong ne nteang ende. ⁷ Atsug olie n'otuba o biu: "Djwi nge yie ya me, Yezu, mon e Nzeam eli ne dzug? Ndowigna ne dzin i Nzeam, oyampea mpay ve." ⁸ Djwi na Yezu okabikinde: "Pwe ne djuung i wur ene, yie mpeve epwo." ⁹ Mby Yezu oyue, "Dzin iyie nagni?" Nde mpi okeara, "Dzin ime Lezio, djwi sili entsign." ¹⁰ Awigna ya Yezu biu djwi akwon ampur nelien e wiya. ¹¹ Ne ondii onagn, ayiwo n'olwi e wa mvuy alikiwo pipi n'ombimi, ¹² mby entshung enagn wawigna ya nde wuwun: "Otetum neti e wamvuy igni, djwi sishwi ne djuung iwo." ¹³ Apea mbug, mpeve ipwo inagn ipwe, watsa nshwe ne djuung i wamvuy, mby wamvuy wakim aveang, watsandog ne nzey: ayiwo etitign e awug ape eyitsu nzig ne nzey. ¹⁴ Vear ayiwungike wamvuy inagn wakim, watsa nkab oshwong etay enkum, ne viya inen ti ne viya ikieg. Vear s'atshiwo ndir vii aleleg. ¹⁵ Wayia etay e Yezu, mpi wayen wur eyii na mpeve ipwo, nde wur eyii na Lezio, atikeanse, atilwer ileam, waagn etikea, mby s'ayug wo wom. ¹⁶ Vear ayiyen vii ankum ayileg wakab oshin oyileg vii ya wur e mpeve epwo ti ne wamvuy inagn. ¹⁷ Mby wabana na ngwigna ya Yezu alim ne buu ewo. ¹⁸ Ntangu eveanikinde ne war, wur eyike na mpeve ipwo owigna nswa e mpier ti nde. ¹⁹ Kansi Yezu atun, mby okabandenden: "Tshwag n'evur eyie, etay atwung ayie, mpi kabawo vii amokie Nkum, ti oshin emoyug nde ngy. ²⁰ Akien, mpi abana nkab ne Dekapolisi vii anen emokie Yezu, mpi vear ankum wayen ngituka. ²¹ Yezu ntangu emikea nde mbag nky emuu neti e war, olwi o vear wayia ngyuo pipi na nde, ntangu eyii nde n'ikri i nzey. ²² Mby, emog ne kati ankum a sinagoga, eviewo Jairusi ayia, mpi ntangu eyiyen nde Yezu, alog ne nkuu inde. ²³ Mby owigna ngean: "Onkean me onkear ali pipi n'ewa. Movie yie, yag otsug mbwo djwi avug, akey ne luzingu." ²⁴ Yezu atsa ti nde, mby olwi o vear wosodjie, mpi walojing ne ngnina. ²⁵ Kansi ayiwo n'okear omog epurike aluung ekug mvwe djum n'ipe. ²⁶ Ayen nde mpay entsign na ntsa etay e wamunganga etshin n'etshin, mpi apiynde ekri enkum eyikinde na wo. Kansi akavea evug ve, nkeang akumikiwo ko entsign. ²⁷ Ntangu eyug nde watuba vii a Yezu, ashwe n'olwi o vear, ne mby e Yezu, mby akir eleam e nde. ²⁸ Djwi atubikinde: "Yug mikir ata ko eleam ende, asivug me. ²⁹ Ntangu eyokir nde, aluung aseanga na mpwe, ayug ne djuung inde nde ativug. ³⁰ Mby ko ne ntangu enagn, Yezu ayug biu emog etipwe ne djuung inde. Mpi atshim ne kati olwi o vear mpi ayue: "Wur nagn eminkir n'ileam?" ³¹ Walongoki inde w'okeara: "Oyen olwi o vear emotsug ne kati kati, mby olayue yiyen: "Wur nagn eminkir? ³² Kansi Yezu alir mbeama na nde djwi na njia nagn emikie vii anagn. ³³ Onkear owo, ntangu ejiinde vii amileg ne djuung inde, ayug wom mpi ayia ko ekukuma. Ayia ndog ne nkuu i Yezu mpi okaba vii ande ankum. ³⁴ Yezu atuba ya nde: "Mon me onkear, lukwikilu eyie etovuga. Tshwag na ngemba mpi otivug ne nkeang eyie." ³⁵ Ko ne ntangu eyitubikinde, vear ayum n'evur e nkum e sinagoga wakaba nkum e sinagoga wuwun: "Mon yie onkear atiwa. Djwi na nge epea yie longi mpay?" ³⁶ Kansi Yezu akatsug onen ve ne vii ayinkab vear anagn, atuba nda nkum e sinagoga ndenden: "Oyayug wom, kwikila kaka." ³⁷ Akaleang wur odjiende, avey ko Petelo, Jaki ti Yoane, otwung o Jaki. ³⁸ Wakum n'evuru e nkum e sinagoga, mby wayen olwi o vear waliye mpi watsug elie. ³⁹ Ntangu eshwi Yezu n'evuru, atuba ngean nda vear anagn: "Djwi nge ekiegnu oshuru, djwi nge eliyegnu? Mon atowe, kansi ativur lwong." ⁴⁰ Vear ankum woyue two, kansi Yezu apur vear ankum nelien, avey tea na mea e mon, ti vear ayodjii, watsa ondii oli mon. ⁴¹ Yezu akir mon n'ewuo, mby atuba nda nde: "Talitha koumi!" Eling ntuba: "Mon onkear, yima, ntuba ma yie!" ⁴² Mbala emog, mon onkear ayima, abana nkien djwi ayinde na mvwe djum n'ipe. Vear ankum wayen ngituka. ⁴³ Yezu apum vear anagn ankum wakwon nkab vii ane. Mby awigna ya wo wapii mon vim a nda.