¹ Mby akea mbana ndong along ne nky e nzey, olwi o vear watodjing nde. Avean ne war emog eyike ne nzey, mby agneme neti. Olwi o vear ankum ayiwo ne nky. ² Along nde vim entsign ne bingani, mpi ne along ande atuba nda wo vii ane: ³ "Yugagni, wur etsa mfuy evur apwinde djwi na mfuy. ⁴ Ntang elefuyikinde, nkab i mbeam ilog ne mbug: wamfuru wayia, wala wog. ⁵ Ndamu emuu elog n'endii atari, endii ekayia na buu entsing ve; mbeam iwo imen eveang, djwi ekavea buu entsing. ⁶ Kansi, ntangu eyipwi mbiiy, vim ayimen elunga mpi eyum, djwi akwon wo edzuu. ⁷ Ikab i mbeam imuu ilog ne endii atiene: atiene avean dzug mpi egnege vim ayimen, mpi vim awo ikawur mbeam. ⁸ Ikab i mbeam imuu ilog ne buu e wuo: ewur mbeam eveang, etsun, epea mbeam osar, osom, mpi nkam n'oshung omog. ⁹ Mby s'atubinde: "Wur eli n'atii a ngyug ayug!" ¹⁰ Yezu ntangu emisande tsuga ndemie, vear ayodjing nde ti wa ntumwa inde djum n'ipe, wobana onjwe djwi na bingana inde. ¹¹ Nde atuba nda wo: "Opeagniwo gnu oziy ekub e Nzeam; kansi djwi na vear ali nelien, vii ankum aleleg ko n'itsig, ¹² djwi na wo, wayalir, walir, kansi wapiyen ve, mpi wayug, wayug, kansi wapijia, djwi wakwon ntshima itura, mpi wakwon mvea ndolula i masumu iwo." ¹³ Atuba diaka nda wo: "Opijiagni etsig ene? Oshin nge eyajiagnu itsig imuu ine inkum? ¹⁴ Wur efuy eli wur efuy otuba. ¹⁵ Vear amuu wali ne mbug, endii emifuy wo otuba, ntangu emiyug wo otuba, mbala emog satana atiyia ndima otuba oyalong wo. ¹⁶ Eli ti amuu, oshin omog, wativea mbeam n'endii atari; yug watiyug otuba, wayami ntete n'osiang; ¹⁷ kansi kakuwo n'edzuu ve, watsug ivim i biu itaang, mpi yug mpay to watatesa djwi n'otuba o Nzeam, wakagn ndog ko eveang. ¹⁸ Vear amuu ayiyami mbeam ne atiene, eli vear atsa ngyug otuba, ¹⁹ kansi, mabanza i vii a buu e ntangu ene, mpuy i mvea otsun, na ileang leang i vim amuu, iledjag otuba o Nzeam, mpi otuba kaku mpila esiwurwo mbean ne kati ewo. ²⁰ Amuu, weyami mbeam ne buu e wuo; eli vear aleyug otuba o Nzeam, aleyami mpi alewur mbeam, osar, osom mpi nkam elenga oshin oyifuy wo." ²¹ Yezu atuba diaka nda wo: "Atsawo mvara mwinda djwi na ntsug n'adjiu to ne ngie e ntir? Epa djwi na ntsug n'ondii etsa mpiey mwinda? ²² Djwi kaku vim e ngizuba ve efwetewo nding na njia, kaku vim e ngiziy ve efwetewo mpur. ²³ Yug eli na wur eli n'atii djwi na ngyug, ayug. ²⁴ Atuba diaka ndawo: Yiagni onker na vii aleyug gnu. Ayotesakagniwo ko na vim eleyer gnu, mpi ayatsug wo diaka entsign djwi na gnu. ²⁵ Djwi ayapeawo ya wur eli na vim; kansi wur emikwon, ayokumawo ata ivim ilinde na wo." ²⁶ Akea ntuba diaka: "Ekub e Nzeam eli kamsi wur eyifuy mbeam ne buu; ²⁷ ata ali ngivur to ngitien na otshuu na mbiiy enkum, mbeam inagn asifuyewo ata yug wur efuy apijia. ²⁸ Buu atsawo mpur vim wemie, etigni mpur nkaya nteang, mby otimi, ne nsuka, mbeam ipwi n'otimi; ²⁹ yug ko mbeam ititsun, vear wawong na ntsa, djwi ntangu e ndima mbeam etikug. ³⁰ Atubinde diaka: "Na nge esitesa su diaka ekub e Nzeam, to asikugsu ontendula na kingana nge? ³¹ Eli kamsi mbeam i seneve, eli okieg ne kati e wambeam inkum; ³² kansi yug watofuy ne buu, apwi, akum onen elenga eshung enkum efuy wo, apur atab anen-anen, mby wamfuru i dzug watsi nkuba ne ngie mpio ende." ³³ Eli n'itsig oshin one eyalongikinde, n'oshin eyikugikiwo na ngyug. ³⁴ Atubikinde ndawo n'itsig, kansi n'oziy, atendulikinde walongoki inde vii ankum. ³⁵ Eshuu wo, epiekuo, Yezu atuba nda wo: "Sibagagni nky emuu egni". ³⁶ Ntangu epagninde olwi o vear anagn, wovara ne war eyiyikinde, ayiwo mpi na viar imuu djwi na nde. ³⁷ Opepe onen ekir ne nzey, vay ashwe ne war, war ebana na ndzig. ³⁸ Kansi Yezu ayinde ngivur ne dzug i kuse. Wobiya, watuba wa nde wuwun: "Nkum opiyen etura mpay n'oshin owasu ene?" ³⁹ Ntangu eyibiy nde, angnianga opepe, atuba na nzey: "Yia pwo! Tshung odzum!" Mpi opepe oshir, vii ankum akea ngya pwo. ⁴⁰ Mby atuba nda wo ndenden: "Djwi na nge eyug gnu wom? Oshin nge ekwon gnu lukwikilu?" ⁴¹ Wankum wayug wom, watuba wog na wog: "Wur nge eli ata opepe na nzey elolemfuka ngean?"