¹ Yezu akea nshwe ne sinagoga. Neti, ayiwo na wur eyii n'ewuo e ngiyum. ² Okwungikiwo nde, djwi na ndir yug asovuga nde eshuu e sabat enagn asivea wo ekum e djwi isofugn wo. ³ Yezu atuba nda wur eyii n'ewuo e ngiyum: "Yima mpign ne kati kati e vear." ⁴ Mby atuba nda wo: "Ne nsiku, eli wuo na nkie iwuo eshuu e sabat to na nkie ipwo; na mvuga luzingu e wur to na ndjag?" Kansi wo, wayia ko pwoo. ⁵ Mby, alir vear anagn na viy a ngy, na mpay djwi n'itura iwo biu, mby s'atubinde nda wur ewo: "Shima ewuo eyie." Ashima ewuo, mpi ewuo ende ekea wuo. ⁶ Wafarize wapwe, mbala emog wakie mpfug ti vear a Erodi djwi na nding oshin nge esodjag wo. ⁷ Yezu alim atsa etay e nzey ti walongoki inde. Olwi o vear wodjie, wayum Galilea, amuu Yudea, ⁸ amuu Yeruzalem, amuu Idumea, tii ontinteang e Yordani, ti pipi na Tyri na Sidonia. Emiyug wo vii alekikinde, wayia etay ende olwi n'olwi. ⁹ Awigna ya walongoki inde waling war e fioti djwi na nde, djwi olwi o vear wakotag. ¹⁰ Djwi atigni nde mvuga vear entsign, vear a nkeang ankum alingikiwo mvanga ondii oli nde djwi n'onkir ne djuung. ¹¹ Wa mpeve ipwo, ntangu emoyen wo, wakr abong ne nteang ende, mpi wa tsug elie: "Oli Mon e Nzeam." ¹² Kansi nde atuba nda wo biu na nkwon nkab djwi wakojia. ¹³ Mby avean n'ombimi; s'avikinde vear aleang nde mvie, mpi wayia etay eli nde. ¹⁴ Mby ason vear djum n'ipe, eyiviinde wantumwa, djwi wayii ti nde mpi asikug nde antum na ntsa ndong along, ¹⁵ djwi wayii n'ekub e nkma wa mpeve ipwo. ¹⁶ Lir vear djum n'ipe iwo: Simon, eyipiinde dzin i Petelo; ¹⁷ Jaki, mon e Zebede, ti Yoane, otwung o Jaki, eyipiinde dzin i Boanergesi, eling ntuba aman a nzar, ¹⁸ Andre, Filipu, Bartemi, Mati, Jaki, mon e Alfe, Tade, Simoni e Zeloti, ¹⁹ ti Yudasi Iskarioti, wur Eyisar Yezu. ²⁰ Mby atsa n'evuru, olwi o vear wayia nsanga mpi kog, kaku mpila elawo ata mampa ve. ²¹ Ntangu emiyug atwung ande n'openg ngwign, wayia djwi n'onkir; wuwun: "Kaku nde diaka na waagn ve." ²² Walong i nsiku iyiyum Yerusalem, watuba wuwun: "Ali na Belzebul," Ali na nkum e wa entshung mby s'alekmi nde entshung." ²³ Yezu avie vear anagn mpi atuba nda wo n'itsig: "Oshin nge satana asikug nde nkma satana? ²⁴ Yug ekub ekea naam nkeangawo, ekub enagn epayima ve. ²⁵ Mpi yug evuru wemie eli nginam, evuru enagn epayima ve. ²⁶ Yug mpi satana atiyug nkier ndemie, aling nam, apakug ngima mpi ve, kansi enagn atikum ne nsuka ende. ²⁷ Kaku wur ekug nshwe n'evuru e nkea biu mpi okumi vim ande, yug nteang wakatshung nkea biu eshing mby wavey vim ande. ²⁸ Ndokabagni e djwidjwi, masumu inkum aman a vear na itii itwewo Nzeam, ayaveawo ndolua; ²⁹ kansi wur etwe Mpeve Santu apayasavea ndolula ata eshuu emog ve, kansi atikie disumu e mvwe na mvwe." ³⁰ Yezu atubinde ngwign djwi atubikiwo wuwun: "Ali na mpeve epwo." ³¹ Mea ti atwung a Yezu wayia, wayima nelien. watum wur n'omvie. ³² Oluy o vear watodjing nde ne kati-kati, mby watuba wa nde wuwun: "Lir, mea yie ti atwung ayie wali nelien, waloling yie." ³³ Akeara wo ndenden: "Nagn eli mea me, mpi atwung ame wanagn?" ³⁴ Mby, alir vear ayii ngigneme ti nde, atuba: "Lir mea me ti atwung ame! ³⁵ Djwi, wur enkum ekie luzolo e Nzeam, wur enagn ali otwung ome ompeam, ti otwung ome onkear, ti mea me."