¹ Mby ntangu emikea nde ne Kapernaum, ne mby e ivim i nshuu itaang, wayug wuwun ali n'evuru. ² Vear entsing wayia kog, mpi ekayia diaka n'ondii ve ata ne nteang epfug djwi na vear ankum wakug. Mby Yezu s'alongikinde wo. ³ Mby vear amuu wayia etay ende, wojie wur emog emibeam wo ewuo n'ekuu elevarikiwo. ⁴ Djwi wakakug nkum ondii oli nde ve djwi vear ayiwo olwi, wagnama otwon evuru ondii oyikinde, mpi n'itunu inagn, wakeya wur emibeam wo ewuo n'ekuu ngivur ne ntir. ⁵ Yezu, ayen lukwikilu ewo, atuba nda wur emibeam wo ewuo n'ekuu: "Mon me, masumu iyie itivea ndolula." ⁶ Walong i nsiku imuu ayiwo kog watigneme, mby watubik n'itura wuwun: "Oshin onkagn wur ene etubande ngean? Atitwe Nzeam! ⁷ Wur nagn esikug ndolula masumu, yug epa ko Nzeam ndemie?" ⁸ Etean kaku, Yezu ajia ne mpeve ende nginu iwo, s'atubinde nda wo: "Djwi na nge elignu na wa nginu oshin enagn n'itura ignu? ⁹ Vim nge eli mpay na ntuba ya wur emibeam wo ewuo n'ekuu: 'Masumu iyie itilim', to na ntuba: 'Yima , vey ntir eyie mpi kien'? ¹⁰ Kansi, djwi ojiagni gnugnun Mon-wur ali n'ekub e ndolula masumu i vear ne buu, atuba nda wur enagn: ¹¹ "Ndatuba ma yie, yima, vey ntir eyie, mpi tshwag evur eyie." ¹² Mpi ne mbala emog, ayima, avey ntir ende mpi apwe ne viy a vear ankum, wayen ngituka mpi wakumisa Nzeam, wuwun: "Sitotigni ngyen vii oshin one." ¹³ Yezu akea mpwe etay e nzey. Ngrima a vear ankum wayia etay ende, mby Yezu alongike. ¹⁴ Ntangu eleleg nde, ayen Levi, mon e Alfe, akeanse n'ondie ofutawo ekri. Atuba nda nde: "Ondani." Levi ayima mpi ayima, osodjie. ¹⁵ Yezu ntangu eyilikinde ne mesa n'evur e Levi, vear entsing etsamvey ekri e mpaku ti vear apwo wayia nda ondii omog ti nde, ti walongoki inde. ¹⁶ Walong i nsiku ti wafarize, eyoyen wo ala ti vear avey ekri e mpaku ti vear apwo, watuba ya wantumwa inde: "Djwi na nge elande mpi egnwa nde veana nda wa vear avey ekri e mpaku ti vear apwo?" ¹⁷ Eyiyug Yezu vii awo, s'atubinde nda wo: "Vear ali djuung biu kaku wo na mfumu e munganga ve, kansi eli vear a nkeang. Nkayia djwi na mvie vear a masonga, kansi na mvie vear a masumu." ¹⁸ Opeane, wantumwa i Yoane ti wafarize wakn okio. Wayia ntuba wa Yezu: ''Djwi na nge wantumua i Yoane ti wantumua i wa farize wakn okio, kansi iyie wala,wapikn okio ve?'' ¹⁹ Yezu akeara ndenden: "Iwur i wum asikug wo nkn okoio yug wum ali nda wo? Ntangu eli wum ali ti wuo, wapakug nkn okio ve. ²⁰ Kansi nshuu ileye, ayakuma wo wum mby ayakn wo. ²¹ Kaku wur emog ekug ntsug ipa n'eleam e mpa n'etay eleam e ntama ve, ekalega ngyara eleam e ntama, mpi asiyay wo epwo. ²² Mpi kaku wur esikug ntsug vean a mpa n'ipfuy i ntama ve; yug kaku veana asiyara wo ipfuy, mpi asipay wo na viana, na ipfuy; kansi ekug na ntsug vean a mpa n'ipfuy impa." ²³ Eshuu emog e sabat, Yezu elelegikinde ne kati ivur i ble. Wantumwa inde, ntangu eleleg wo, wakeaga wunu i ble. ²⁴ Wafarize wayia onkaba wuwun: ''Tolir, djwi na nge wantumwa iyie emikiewo vim amipum wo nankie eshuu e sabat?" ²⁵ Yezu akeara ndenden: "Ototangagni vii ayikii David, ntangu eyiyug nde nziya mpi ayinde na mfunu enda, nde ti vear ayi wa nde, ²⁶ Oshin eyishwinde n'evuru e Nzeam, ntangu eyii Abiatari ali nkum e wanganga-Nzambi, mby ala mampa otshia e Nzeam, eyipiwo nswa e nda ko ya wanganga-Nzambi, mby s'apiinde ti ya vear ayii wa nde?" ²⁷ Mby Yezu atuba: "Sabat akiiwo djwi na wur, epa wur djwi na sabat ve. ²⁸ Kog enagn, Mon-wur ali mpi Nkum e sabat."