¹ Ne nkeam e vun, wankum ankum a wanganga-Nzambi wasanga ondii omog na antsuru a dibundu, walong i nsiku ti wankum ankum okin onen evuru e Nzeam. Watshung Yezu nkor ne mbwo, mpi wakien wa nde. Watsa ompea ne mbwo i Pilato. ² Pilato s'oywinde ndenden: "Oli Nkum e Wayuda?" Yezu okeara ndenden: "K'oshin omituba yie enagn." ³ Ankum a wanganga- Nzambi ayiwo watifugn Yezu djwi na vii eshin n'eshin. ⁴ Pilato akea ongywe: "Opikeari mvutu ve? Tolir olwi o vii amofugn wo yie !" ⁵ Kansi Yezu akakeara Pilato ata djwi, wog enagn, Pilato s'ayen nde ngituka entsign. ⁶ Mvwe inkum, ne konso okina, Pilato apurikinde wur e bolog emog esileang olwi o vear. ⁷ Ne kati e impumbur iyi ne bolog djwi adjag wo wur emuu, ayiwo na wur emog evikiwo Barabasi. ⁸ Olwi o vear watsa etay e Pilato, mby wabana nding akii djwi na wo oshin otsande nkie mvwe inkum i nteang. ⁹ Pilato avura ndenden: "Olingagni mopuragni Nkum e Wayuda? ¹⁰ Ogniang ajinde wuo ndenden ankum a wanganga-Nzambi watifugn Yezu ko n'etura epwo. ¹¹ Kansi ankum a wanganga- Nzambi akabiwo vear wawigni ya Pilato apuri Barabasi. ¹² Pilato akeamvey otuba, ndenden: "Oleangagni nkii esing djwi na wur eviegnu Nkum e Wayuda?" ¹³ Wakea ndzama wankum: "Kwog nde ne kulunsi!" ¹⁴ Pilato akea ntuba nda wo: "Ipwo nge emikiende?" Kansi vear wakea ndzama na biu wuwun: "Kwog nde ne kulunsi." ¹⁵ Pilato, djwi na mpea kiese ya olwi o vear anagn, s'apurinde Barabasi. Atum vear waber Yezu akoy mpi atum wokwog ne kulunsi. ¹⁶ Ayer-nkuu wavara Yezu neti opeang o nkum, mby wavie ayer-nkuu ankum. ¹⁷ Walwer Yezu eleam, olobo o kwi, wakie impu atiene mby wolwer n'ote. ¹⁸ Wabana n'ompea mbea wuwun: "Mbote, Nkum e Wayuda!" ¹⁹ Wakum onag akoy a nkor n'ote, wotwe asuy. Wafukama ne nteang ende kamsi waling onkumisa. ²⁰ Ntangu emishir wo n'ongywe two, wolima eleam e kwi mpi wokea ondwer ileam inde, mby wovara djwi n'onkwog ne kulunsi. ²¹ Wur emog alelegikinde kog, ayum evur, dzin inde Simoni e Sireni (tea e Alexandre ti e Rufus); ayer-nkuu s'opiwo na biu penza na mvara kulunsi e Yezu. ²² Ayer-nkuu wavara yezu n'ondii oviewo Golgota (eling ntuba Ondii ebaay ote). ²³ Wopea vinu emitshib wo na mira, kansi Yezu akagnwa ve. ²⁴ Wokwog ne kulunsi mpi wakab ileam inde ileang, mpi wabug dzeke (to fikofiko) djwi na njia ileang ileam nge esivey konso iyer-nkuu. ²⁵ Akwog wo Yezu ne kulunsi ntangu eyi vuna etikum ne ngonga otatu o nkateang. ²⁶ N'etign ibaya afugn wo itsin i djwi iyodjag wo ngean: "Nkum e Wayuda." ²⁷ Wakwog ankea vimu ape anen ondii omog ti Yezu, emog ne wear ewuo, emuu ne wum ewuo. ²⁸ Oshin onagn, vii ayifugn wo n'enkean s'akug wo: "Otsug wo n'olwong ankea vimu." ²⁹ Vear alelegiki ne mbug wakum ontwe, walegnug ete wuwun: "Ee, yie wur eling mvwo evuru e Nzeam djwi okey ntwung emuu ne mby e nshuu isar, ³⁰ vug yiemie mpi kr ne kulunsi!" ³¹ K'oshin onagn mpi, ankum a wanganga-Nzambi ti walong i nsiku wakum ongywe etwo wuwun: "Avugikinde ko vear amuu, kansi apikug mvug nde ndemie ve. ³² Nde Mesiya, Nkum e Israel, akrike opean ne kulunsi, siyen wog, mpi sidjir." Vear ayikwog wo ne kulunsi wa nde ko wakum ontwe. ³³ Emikug ntangu osambanu, mpib elog ne buu opfugn tii ntangu ko ngunga ovwa. ³⁴ Ne ngunga ovwa enagn, Yezu adzama na otuba o biu: "Eloi, Eloi, lama sabatani?" eling ntuba: "Nzeam eme, Nzeam eme, djwi na nge eminsianga yie?" ³⁵ Vear amuu ayi kog eyi yug vii anagn watuba wuwun: "Liragni, avie Elia." ³⁶ Wur emog ne kati ewo akim, atsa ntsug vay ongnign n'inuka, aler n'oshung mpi apea Yezu djwi agnwi. Wur ewo atuba ndenden: "Sitolir yug Elia asiyiande onkra." ³⁷ Mby Yezu atsug olie na biu, mpi asug egnim. ³⁸ Eleam enen e tempelo eyay itay ipe yum dzug tii ngie. ³⁹ Nkum e ayer-nkuu eyi ngiyima ne nteang e Yezu, mpi eyiyen oshin omisug Yezu egnim atuba ndenden: "Vi-a-vii, wur ene ayinde Mon e Nzeam." ⁴⁰ Ayiwo ko n'ankear amuu ayiliriki etey. Ne kati ewo, ayiwo Maria e Magdala, Maria (mea e Yakob ilieng, ti e Yoze) ti Salome. ⁴¹ Ntangu eyiki Yezu ne Galilea, ankear anagn alodjikiwo mpi alopiikiwo vim a nda. Olwi ankear amuu atshiwo Yeruzalem wa nde. ⁴² Ntangu emijie vun, oshin oyiwo eshuu ewong wo oliu e obing (Sabat), eling ntuba eshuu eli nteang e Sabat, ⁴³ Yozefo e Arimatei, ayia kog. Ayinde wur emog epiiki vear luzitu entsign ne kati antsuru a mpfug eninen evuru e Nzeam, mpi eyikwungiki ekub e Nzeam. Na kikesa enkum, atsa ngyen Pilato mpi aling djuung i Yezu. ⁴⁴ Pilato ayen ngituka na njia ndenden Yezu atiwa, mby s'aviinde nkum e ayer-nkuu s'oywinde yug Yezu atiwa. ⁴⁵ Ntangu emokaba nkum ayer-nkuu ndenden Yezu atiwa, Pilato apea Yozefo mbug e mvey djuung i Yezu. ⁴⁶ Yozefo ayiwo atishum marikagn, s'aliminde djuung i Yezu ne kulunsi, s'odzubnde eleam enagn, mby s'atshinde ompfugn n'alum, atsum nkr ewo n'atari. Mby asadzub itari inenen n'itwunu i nkr ewo. ⁴⁷ Maria e Magdala ti Maria e mea e Yoze ayen wo ondii oyipfugn wo Yezu.