¹ Eshu e Sabat ntangu eyileg wo, Maria e Magdala, Maria e mea e Jaki ti Salome washum ananagn a nsuu djwi na ntsa mwang ne djuung i Yezu. ² Ne suka suka e eshuu elelani Sabat, watsa alum ntangu eyikeam vun. ³ Wakum ntuba wog na wog wuwun: "Nagn esitelima itari ili ne nteang e nkr?" ⁴ Ntangu esiang wo viy, wayen itari iwo watilima, watitsug n'ikri, djwi ayiwo itari ininen kibeni. ⁵ Washwe neti e nkr, wayen onkwo omog atigneme ne wum ewuo, atilwer eleam e sii, mpi wayen ngituka entsign. ⁶ Onkwo owo s'atubinde nda wo ndenden: "Oyayugagni womo ve. Olingagni Yezu e Nazarete, eyikwog wo ne kulunsi. Atifutumuka! Apa ali nendien ve. Liragni ondii oyotsug wo. ⁷ Kansi gnu, tshwag okabagni walongoki inde ti Petelo gnugnun atitsa onkwungagni ne Galilea, asitsagnu ongyen ko mpiug ko oshin oyokabagninde." ⁸ Wapwe ne nkr mpi wakim iveang; djwa ayen wo ngituka kibeni, mpi ayiwo na womo entsign. Wakakaba ata wur emuu ve djwi aleyugikiwo womo. ⁹ Ne suka suka eshuu e nteang e mposo, eshuu obiing, ne mby e lufutumuku ende, apwe nteang ya Maria e Magdala, eyipurnde mpeve ipwo ishambia ne djuung. ¹⁰ S'atshinde nkab oshwong owo ya vear ayiki wa nde, walongoki inde iyisatsiga na ntantu mpi iyisaliyeaka ntangu inkum. ¹¹ Wayug wuwun Yezu ali ne luzingu, mpi Maria e Magdala atoyen, kansi wakadjir ve. ¹² Ne mby ewo, Yezu apwe, n'oshin iky, ya vear ape amuu, aletshikiwo wiya emuu. ¹³ Vear anagn watsa mpi wakaba walongoki iyisatsiga, kansi wakadjir ve. ¹⁴ Ne nsuka, Yezu s'apwinde ne nteang e walongoki inde djum n'emog ntangu eyiliikiwo. Angnianginde djwi n'oshin ekwon wo lukwikilu mpi eyitshung wo itura iwo, djwi wakaleang ndjir vear ayoyen ne mby e lufutumuku ende. ¹⁵ Atuba nda wo ndenden: "Tshwagagni buu opfugn, longagni oshwong o wuo ya vear ankum. ¹⁶ Wur esikwikila mpi esivey mbotika ayavug nde, mpi wur epakwikila ayaveynde ndola. ¹⁷ Bidimu ine ayalanakawo vear ayakwikila: Ne dzin ime, ayakmakawo wampeve ipwo. Ayatubakawo etuba e mpa. ¹⁸ Ayakirakawo wandjwa na mbwo iwo, mpi yug watignwa ndikila, ndikila enagn epakie vim ve. Ayayab wo vear a nkeang mbwo, vear a nkeang ayavugakawo." ¹⁹ Ntangu emishir ntuba Nkum Yezu nda wo, s'avean nde dzug olung, amitsa gneme ne wum ewuo e Nzeam. ²⁰ Walongoki watsa ndong itay inkum, ntangu enagn Nkum alekiikinde otshia nda wo djwi na ngyegne ne bidimu inagn ndenden otuba olelong wo eli vi- a- vii.