¹ Esatsuga nshuu ipe na nkum okina o pake ti okina o mampa ipitsug wo ete e levir. Ankum a wanganga-Nzambi ti walong i nsiku alelingikiwo oshin nge ositshung wo Yezu na waagn djwi wodjag. ² Yo Wog enagn, saletubikiwo wuwun: "Ekwon ngya eshuu okina, djwi vear wakapur oyug." ³ Eshuu emog Yezu ayinde ne Betania, n'evuru e Simoni eyi na nkeang e ndwum. Ntangu elikinde ne dzug i mesa, onkear omog ayia etay ende n'oleanga omiywo na ananagn a nsuu eli isuu entsign. Angama oleang owo mby amwang ananagn a nsuu ewo n'ote e Yezu. ⁴ Kansi neti e vear ayi kog, ayiwo n'amuu ayiyen ipwo mpi ayiyug nkier. Satubikiwo wog na wog: "Djwi na nge epiy nde ananagn a nsuu ene? ⁵ Anakug wo sisar wog n'isuu isikug ndenga nkam isar i denari, mby sipii ekri enagn ya emva." Mby wayug nkier mpi wangnianga onkear onagn. ⁶ Kansi Yezu atuba nda wo ngean: " Siangagni nde pwo. Djwi na nge opeagnu nde mpay? Antikie djwi imog iwuo. ⁷ Ayayiagnu ntangu enkum ti emva ne kati egnu, mpi ntangu enkum eleang gnu asikug gnu nkie vii a wuo djwi na wo. Kansi me, mpayia ntangu enkum ti gnu ve. ⁸ Atikie eyikug nde nkie: antimwamg me ananagn a nsuu djwi na ngwong djuung ime eshuu eyampfugn wo n'alum. ⁹ Vi-a-vii, nmokabagni, etay enkum eyalong wo oshwong o wuo ne buu opfugn, ayokanakawo, mpi ayakeakawo nkab vii amikie onkear one." ¹⁰ Mby Yudasi Iskarioti, emog ne kati e walongoki djum n'ipe i Yezu, satshinde etay ankum a wanganga-Nzambi djwi na nsar Yezu. ¹¹ Ntangu emishir wo ngyug vii ande, ankum anagn ayiwo nosiang mpi wokaba wuwun asopeawo ekri. Mby s'elingikinde ko oshin o nsar Yezu ya ankum anagn. ¹² Ne eshuu e nteang e nkinsi e mampa ikwon ete e levir, ntangu eyidjag wo imeme djwi n'okina o Pake, walongoki inde woywe ngean: "Ondii nge eling yie sitsu ngwong djwi yie ole oliu o Pake?" ¹³ Satum nde walongoki ipe mpi atuba nda wo ngean: "Tshwagagni ne wiya enen, asisangagnu ti wur emog alevari iwung i vay. Djiagninde. ¹⁴ Ondii osishwende, djiagninde neti mpi tubagni ya nkea evuru gnugnun: 'Long atituba ngean," Ondii osilame okina o Pake ti walongoki ime eli n'onkagn?"' ¹⁵ Asolagagninde itunu evuru eninen n'evuru e dzug emiwong nde. Wongagni vim ankum mpiug djwi na olio osu o Pake. ¹⁶ Walongoki sapwiwo mpi wakum ne wiya enen; wayen vii ankum ko oshin oyakabinde, mby sawong wo olio o Pake. ¹⁷ Ntangu emibanda ndjie vun, Yezu ayiankum na walongoki inde djum n'ipe. ¹⁸ Ntangu eliikiwo ne dzug i mesa, Yezu atuba ndawo ngean: "Vi-a-vii, ntuba ma gnu, emog ne kati egnu vear ala ti me asinsarnde. ¹⁹ Wakum ngiyngiy kibeni, mby wur na wur sakum nde ongywe, "Epa me?" ²⁰ Yezu akeara mpi atuba nda wo ndenden: "Eli n'emog ne kati egnu djum n'ipe, emog etsug ntangu opean ewuo n'ilongo imog nda me. ²¹ Djwi-djwi, Mon-Wur asitsande oshin emifugn wo djwi na nde. Kansi mpay ya wur eyosar. Anayiawo wuo djwi na nde wokwon ongwur." ²² Ntangu eliikiwo, Yezu avey mampa, asampula mpi abag wog. Apea walongoki inde mpi atuba ndenden: "Veyagni wog. Ene eli djuung ime." ²³ Mby avey mbwung, akeara nsag-na-viye ya Nzeam, aapea mpi wagnwa wankum. ²⁴ Atuba nda wo: "Ene eli aluung ame, aluung a lutondo, aluung asitshag djwi na vear entsign. ²⁵ Vi-a-vii, mokabagni, mpafignwa diaka vinu tii ko eshuu eyakeame gnwa vinu impa n'ekub e Nzeam." ²⁶ Ntangu emishir wo nshwe lim i Nzeam, watsa n'ombim Olive. ²⁷ Yezu atuba nda wo ndenden: "Gnu gnankum ayatag gnu abag djwi na me, djwi wamifugn ngean: 'Ayadjag me wur elir ameme, mby ameme ayapagn wo tshaga tshaga.' ²⁸ Kansi ayafutumukame, ayatsame Galilea nteang egnu." ²⁹ Petelo s'atubinde nda nde: "Ata yug vear ankum watolur yie, me mpasosugn yemie ve." ³⁰ Yezu s'atubinde nda nde ndenden: "Ndokaba yie vi-a-vii, otshuu olwo, nkogo na ntovug mbala ipe, asiyiawo ontinsan mbala isar." ³¹ Kansi Petelo ovura ngean: "Ata ekug ngwe ma yie, mposan ve." Wankum ko watuba k'oshin onagn. ³² Wakum ondii oviewo Getsemani, mby Yezu atuba nda walongoki inde ndenden: "Sagnemagni nendien, me ndetsu nsama." ³³ Avey Petelo, Jaki ti Yoane djwi na ntsa nda wo. Mby abana ngyug mawa na mpay n'etura ende. ³⁴ Atuba nda wo ndenden: "Ndi na ngy entsign tii ko ewa. Satsugagni nendien mpi keamagni viy." ³⁵ Yezu atsa ontinteang, alog ne buu mby asama Nzeam djwi na nding yug mpila eliko ntangu e mpay ene esikug ndim ne nteang ende. ³⁶ Atuba ndenden: "Abba, Tea, okug nkie vii ankum, kaku ekwon yie nkie ve. Ondimi mbwung e mpay eli ne nteang eme ene. Kansi ekwon ngyia oshin oleang me, kansi eyi oshin oleang yie." ³⁷ Akea etay e walongoki inde mpi ayia, angyen wativur lwong wankum, mby atuba nda Petelo: "Simoni, otivur lwong? Opikug nkeama viy ata ngunga emog ve? ³⁸ Keamagni viy mpi samagni djwi okwon ndogagni ne mpukumuna. Mpeve e wur eli biu kansi djuung inde eli olem. ³⁹ Akea nam nda wo, mpi akea ntsa nsama, atuba ko otuba omog enagn. ⁴⁰ Akea diaka, ayia angyen watikea mvur lwong djwi viy awo ayiwo atilem na lwong. Wakakug omvura ata djwi ve. ⁴¹ Mbala otatu, akea mpi atuba nda wo ndenden: "Olagni ko ne lwong mpi oyoragni? Etishir! Ntangu etikug. Liragni! Mon-Wur wean watosar ne mbwo i vear a masumu. ⁴² Yimagni, sikienagni. Liragni, wur esinsar ndean atikum pipi." ⁴³ Etean kaku, ko ntangu eyitubikinde, Yudasi, emog ne walongoki inde djum n'ipe, ayia nkum nda olwi o vear na empien ti mbor ne mbwo. Ankum a wanganga- Nzambi, walongi i nsiku ti antsur vear ayatum. ⁴⁴ Yudasi, wur eyisar Yezu akabinde vear anagn ndenden: "Wur esipeame mwaa, ndug enagn. Kiragni nde, varagni nde wuo." ⁴⁵ Ntangu emikum Yudasi, avanga mbeama na Yezu mby atuba ngean: "Rabi (Long) !" Mby s'opinde mwaa. ⁴⁶ Mby s'akirwo Yezu na mbwo, mpi s'otshung wo. ⁴⁷ Kansi wur emog ne kati e vear ayiyimi kog, apur ompien, anag wur otshia e nkum e wanganga-Nzambi, mpi obag itii. ⁴⁸ Yezu atuba nda wo ngean: "Ndi nkea wumu djwi oyagni ntshung me n'empien ti mbor? ⁴⁹ Nshuu inkum ayikime ma gnu mpi alongikime ne tempelo, okantshungagni ve. Kansi ekug wuo eyii ngwign djwi vii ayifugn wo n'Onkean o Nzeam akug. ⁵⁰ Mby walongoki inde inkum s'ososugn wo ndemie, mpi s'alurwo. ⁵¹ Mon ompeam omog aledjikinde Yezu, mpi; ne djuung, alwernde ifunga; wotshung kansi ⁵² asafanga ifunga eyidjing nde ne djuung mpi akim opwopuu. ⁵³ Wavara Yezu etay e nkum enen e wanganga-Nzambi. Mpiug, wankum ankum i wanganga-Nzambi, antsuru a dibundu ti walong i nsiku ayiwo watisanga. ⁵⁴ Petelo alesedjikinde Yezu ivim etey, tii ko ntangu eyishwiwo n'opeang o nkum enen e wanganga-Nzambi. Asagneme kog ondii omog nda vear otshia ayiyoriki tshiya. ⁵⁵ Ankum a wanganga-Nzambi ti vear ankum ayishwi ne mpfug enagn alelingikiwo ko djwi isikug wo mbeam Yezu djwa wodjag. Kansi wakavea djwi ve. ⁵⁶ Djwi vear entsign alefugnikiwo Yezu na vii oyang, kansi vii a vear awo akayiaka ne mbug emog ve. ⁵⁷ Vear amuu wayima djwi n'omfugn na djwi oyang, watuba ngean: ⁵⁸ "Oyugsu atuba ndenden: 'Ayabvuome evuru e Nzeam ene eyitwung wo na mbwo i vear, mby ne nshuu isar, ayatwung me evuru e Nzeam iky epayatwung wo na mbwo i vear. ⁵⁹ Kansi ata ne djwi ine, otuba o vear awo ekatsaka ne mbug emog ve. ⁶⁰ Nkum enen e wanganga-Nzambi ayima ne kati e vear ankum, ayue Yezu ndenden: "Kaku yie ata na mvutu? Vii nge vear ane ofugn wo yie?" ⁶¹ Kansi Yezu ayia ko pwo, mpi akakeara ata djwi ve. Nkum enen e wanganga-Nzambi akea ongyue mpi atuba ndenden: "Oli Kristu, mon e Nzeam etsasu nkumisa?" ⁶² Yezu s'akearinde ndenden: "Eli mug. Mpi ayayen gnu Mon-Wur ntangu eyagnemende ne wum ewuo ekub e Nzeam, mpi ntangu eyayiande ne kati e mafuba i dzug." ⁶³ Nkum enen e wanganga-Nzambi s'ayarinde ileam inde ndenden: "Djwi na nge elingsu diaka wantiegn? ⁶⁴ Otiyugagni oshin omitwende Nzeam. Obansagni nge?" Wankum wakeara wuwun ekug wodjag. ⁶⁵ Amuu wabana n'ontwomo asuy ti n'ondzub ileam ne viy, n'onag mbata, mpi na ntuba wuwun: "Bikula: wur nagn emodjag?" Vear otshia wovey mpi wodjag entsign. ⁶⁶ Ntangu eyi Petelo ko neti opeang etay e ngie, onkear omog, wur otshia e nkum e wanganga-Nzambi ayia. ⁶⁷ Ntangu emiyen nde Petelo ayor tshiya, apwung ondir wuo mpi atuba ndenden: "Yie ko ayikiyie ya Yezu, wur e Nazarete ene." ⁶⁸ Kansi Petelo asaan, ndenden: "Mpijia ve, mpi mpijia ko itsin i djwi iling yie ntuba." Mby s'apwinde nelien opeang. Nkog ko avug. ⁶⁹ Kansi ntangu onkear otshia onagn emikeande ongyen, akea nkaba vear ayi kog, ndenden: "Wur ene ali nda wo!" ⁷⁰ Kansi Petelo akea nsaan. Etean kaku, vear ayi kog watuba wa Petelo wuwun: "Vi- a- vii, oli ya vear anagn, djwi yie oli wur e Galilea." ⁷¹ Kansi Petelo s'abaninde na nsila na biu ndenden: "Mpijia wur ewo etubagnu ve." ⁷² Nkog avug mbala ozole. Petelo akea nkana djwi iyitubi Yezu nda nde ndenden: "Nteang nkog na mvug mbala ozole, yie asinsaan yie mbala isar." Mpi akum ndiye entsign penza.