¹ Ntangu emipwe Yezu ne tempelo, longoki ende emog okaba ngean: "Long, lir intieng i mvuru na intieng atari ane". ² Yezu akeara ngean: "Oyen mvuru inen inen ine? Kaku itari imog ve iyasatsuga ne dzug itari imuu, inkum ayalog wo". ³ Ntangu egnemi Yezu n'ombim Olive, ne nteang e tempelo, Petelo, Jaki, Yoane na Andre s'atsiwo ngywe Yezu n'oziy wuwun: ⁴ "Otekabi, ntangu nge vii ane ayalog wo? Kidimu nge eyateaba sjii susun vii awo ativanga, eling ndog?" ⁵ Yezu s'abaninde n'ankaba ndenden: "Osugagni, wur apodjimagni. ⁶ Vear entsign ayayiawo ne dzin ime mpi ayatubakawo wuwun 'me nde Yezu' ye mpi ayadjim wo vear entsign. ⁷ Ntangu eyayug gnu watuba vii a mbeagn ti vii oshuru o mbeagn, oyayenagni mpay, vii ane afwete ndog, kansi nsuka ewo etokum ntete ve. ⁸ Djwi buu emuu ayalwawo ti buu emuu, ekub emuu ayalwawo ti ekub emuu. Buu ayagnug wo n'endii entsign, mpi nziya ayayiawo. Ine inkum ayayiawo ko itsin i mpay. ⁹ Osugagni. Ayofugnagniwo ne tuminar, ayonagakagniwo akoy ne wasinagoga. Ayosamakagu ne nteang embumater ti ne nteang e wavuy djwi na me, djwi esayia ntiegni djwi na wo. ¹⁰ Kansi vim enteang wafwete ndong oshwong o wuo ne buu opfugn. ¹¹ Yug watotshungagni mpi olasamagni ne tuminar, oyayenagni mpay ve djwi na vii asikug gnu ntuba. Djwi ne ntangu enagn, vii ankum asifwetegnu ntuba, asopeagniwo; epa gnu vear asituba ve, kansi Mpeve Santu. ¹² Vear ayafugnakawo atwung awo djwi wapii ndola ewa, mpi atea ayafugnakawo aman awo. Aman ayayiawo ote biu ya atea ti amea awo mpi ayafugnakawo djwi waadjag. ¹³ Vear ankum ayotunagniwo djwi na me. Kansi wur eyatsug inaagn ti nsuka ayavugnde. ¹⁴ Ntangu eyayen gnu mpay etishwe n'endi epikug wo ngyia ve (wur etanga awung njia), vear ankum ayayia ne Yudea ayakim wo n'ombim, ¹⁵ wur eyayia ne dzug otwon akwon nkr n'evuru, to djwi na mvey vim nelien; ¹⁶ mpi wur enkum eyayia n'evur akwon nkea mby djwi na mvey eleam ende. ¹⁷ Kansi ngy ya ankear ayayia na djim ti ayapeaka aman aviyo ne nshuu inagn! ¹⁸ Samagni Nzeam djwi vii ane akwon ndog ne peang e mpio. ¹⁹ Djw ne nshuu inagn, mpay ayayiawo entsign, mpay etotigniwo ngyen yum ko n'itsin, ntangu eyikii Nzeam buu, tii lwo, oshin ompay inagn epafikea. ²⁰ Tuba ko yug Nkum ndemie amikeara nshuu iwo okieg, kaku wur eyavug ve, kansi djwi na vear ande amison nde, ayakearande nshuu iwo okieg. ²¹ Mby yug wur emog amokabagni ndenden: 'Liragni, Kristu ndean!' to 'Liragni Kristu ndwign!', oyadjiragni ve. ²² Djwi wa Kristu oyang ti wangunsa oyang ayapwewo mpi ayakiewo bidimu ti vii a ngituka isikug ndjim ata vear ayison Nzeam. ²³ Osugagni! Mean ntokabagni vii awo nteang. ²⁴ Kansi ne mby i mpay i nshuu iwo inagn, vuna ayakum nde mpib, ngwon epafipiey ve, ²⁵ weer ayalog wo yum dzug, biu inkum ili ne dzug ayagnug wo. ²⁶ Mby vear ayayen wo Mon-Wur aleye ne mafuba na biu enen ti nkembo. ²⁷ Mby ayatum nde banzio inde mpi ayatshib nde ondii omog vear amison nde ne akuu ankea anign a buu, yum nsuka okiri ti nsuka e dzug olung. ²⁸ Kanagni ilong itepea oshung o nsuu. Yug atab atilienge, mpi emikea mpur nkaya, jiagni gnugnun elug e mvwe etivanga. ²⁹ Oshin omog, ntangu eyayen gnu vim ankum ane atikug, jiagni gnugnun Mon-Wur ativanga, ali n'epfug. ³⁰ Vi-a-vii, mokabagni, vear azinga opean wapashir ngwa ve ntangu eyapwe vii anagn. ³¹ Olung ti buu ayaleg wo, kansi otuba ome opayaleg ve. ³² Kansi djwi n'eshuu to ntangu ewo, kaku wur ejia ve, ata banzio ne dzug, ata Mon, ko Tea ndemie wur ejia. ³³ Osugagni! Oyavuragni lwong ve, djwi opijiagni ntangu eyalog vii awo. ³⁴ Ayayiawo oshin omog ti wur eyitsi wiya emuu: asasugn evuru ende, asasugn evuru na vear ande otshia, asapea wur na wur otshia onde. Mby asakaba sentre asalir evuru wuo. ³⁵ Wog enagn, osugagni! Djw opijiagni ntangu esiyia nkea evuru, mi ntangu ekwo, mi ne ngnina otshuu, mi ne nkogo e nteang, mi ne suka. ³⁶ Yug amiyia ne babvuru, osugagni akayia ongyenagni otivuragni lwong. ³⁷ Vii okabagnime ene, ndakaba ya wur enkum: Osugagni!"