¹ Mby Yezu abana ntuba nda wo ko n'itsig. Ndenden: "Wur emog akinde evur e vinu. Ajing nde opeang n'evur ewo, atsum ipug iyayamaka nde vinu, mby atwung evuru etitey djwi na ndiraka evur. ² Ne ntangu e ndima vinu, atum wur otshia emog etay e vear ayifuy vinu, djwi wopi ikab i vinu. ³ Wokir, wodjag, mpi wokeara kongign. ⁴ Akea ntum wur otshia emuu etay ewo; wonag mpura n'ote mpi wotwe. ⁵ Ankea ntum wur otshia otatu, wodjag mpi, oshin omog ti vear ankum a mby ayitumnde, wanag mbor mpi waladjag amuu. ⁶ Atum diaka mon nde e nsiya; otum nde wur e nsuka mpi atuba ngean: "Asiyiawo na luzitu djwi na mon me." ⁷ Kansi vear otshia evur e vinu watuba wog na wog wuwun: "Yenagni wur eyasatsuga na oleama-nzo ndean. Yagagni s'odjagagni djwi oleama-nzo esatsuga esusu." ⁸ S'okirwo, wodjag, wotwomo nelien n'ikri evur. ⁹ Ntangu ene, nkea evur asikiende esing? Asiyiande mpi asidjag nde vear otshia anagn ankum, asipeande evur e vinu ya vear amuu. ¹⁰ Ototangagni otuba one o masonama? "Itari iyifangi vear atwung mvuru itikum itari ikir ikuu evuru. ¹¹ Eli luzolo e Nzeam yug itari iwo itikum nkir ikuu evuru; mpi epa eli kidimu eninen djwi na su?" ¹² Alingikiwo na ntshung Yezu, kansi alurikiwo oluy o vear anagn. Ajiwo wuwun Yezu atubinde itsig inagn djwi na wo. Mby s'osawosugn mby s'akien wo. ¹³ S'atum wo wafarize imuu ti vear a Erodi etay e Yezu djwi wopig ilung n'otuba onde ndemie. ¹⁴ Wayia ntuba wande wuwun: "Nkum, sijia susun oli Nzeam e djwi-djwi, mpi opitsindur otuba o vear djwi opitsindir oshin oli wur nelien, ye atsayie ndong mbug e Nzeam e vi-a-vii. Ne nsiku, eli wuo to epwo na mbie mpaku ya Sezar? Ekug sifuti to sikwon mfuta? ¹⁵ Kansi Yezu, eyijiki oyang owo, s'akearinde ngean: "Djwi na nge endob gnu me odzum? Onjiagni ikutu imog ntolir." ¹⁶ Wajie Yezu ikutu imog. Mby Yezu aywe vear awo ngean: "Elung ti vii amifugn wo neti ekri ene eli e nagni?" Wakeara wuwun, "Eli e Sezar". ¹⁷ Yezu s'atubinde ndenden: "Peagni ya Sezar vim a Sezar, ya Nzeam vim a Nzeam". S'ayen wo ko ngituka djwi na nde. ¹⁸ Mby waSaduse etsantuba wuwun vear wapakea mbiy n'ewa, wayia etay e Yezu mby woywe ngean: ¹⁹ "Long, yen vii ayifugn Moize djwi na su: Yug otwung oyie ompeam atiwa mpi atitsaky wear, yug mpi wakawur aman, wur enagn afwete ntsavey onkear onagn mpi asawur aman djwi na otwung nde omiwa.' ²⁰ Ayiwo atwung ampeam ashambia. Mon ompeam onteang atsug wear, awa mpi akasasugn ata mon emog. ²¹ Mon ozole asakr nsakwi mpi awa, akasaky ata mon. Otatu k'oshin omog. ²² Wankea ashambia, kaku ata emog eyisasugn mon. Ne mby ewo onkear onagn ko asawa. ²³ Ne ntangu eyakea mbiy vear n'ewa, onkear onagn ayayiande wear e nagn? Djwi ayinde wear e wankea ashambia." ²⁴ Yezu akeara ngean: "Epa eli itsin i djwi ilejing gnu, djwi opijiagni ata vii ayifugn wo n'onkean o Nzeam; ata biuu o Nzeam? ²⁵ Djwi ntangu eyakea mbiy vear n'ewa, ampeam wapayakea ntsug ankear, ankear ko wapayakea ntsug awum, kansi vear ayayiawo kamsi banzio ne dzug. ²⁶ Kansi djwi na nkea mbiy n'ewa, okatangagni n'onkean o Moize, vii ayokabi Nzeam djwi na oshung o mvu oyipieyiki tshiya: 'Ndi Nzeam e Abraham, Nzeam e Izak ti Nzeam e Yakob?' ²⁷ Nzeam apa ali Nzeam e vear amiwa, kansi e vear ali ne luzingu. Omijingagni vii kibeni." ²⁸ Long e nsiku emog eyiyugiki asulu awo ayia; ajinde ndenden Yezu atakeara mvutu i wuo. Aywe Yezu ngean, "Nsiku nge emilega onen ne kati e wansiku inkum?" ²⁹ Yezu akeara ndenden: "Israel yug, onkwon omilega onen eli ene: Nzeam, Nkum esu, ko ndug ndemie ali Nkum. ³⁰ Ofwete ndeang Nkum, Nzeam eyie, n'etura eyie enkum, ne moyo eyie enkum ti na biu oyie onkum.' ³¹ Onkwon ozole eli ene: 'Ofwete ndeang otwung oyie kamsi yie yemie.' Kaku nsiku imuu ve ilenga ine n'onen." ³² Long e nsiku okeara ndenden: "Eli wuo, Longi ! Otituba vi-a-vii yiyen Nzeam ali k'emog, kaku Nzeam emuu iky. ³³ Ndeang Nzeam n'etura enkum, na ngindu inkum ti na biu onkum, mpi ndeang otwung kamsi yie yemie eli onen, empeab enkum etsasu nkie." ³⁴ Ntangu eyen Yezu ndenden atikeara na waagn, atuba nda nde ngean: "Epa oli etey na ekub e Nzeam." Ne mby ewo, kaku ata wur eyifoywe djwi. ³⁵ Yezu, ntangu elongikinde n'evur e Nzeam, atubinde ngean: "Oshin nge walong i nsiku atubikiwo wuwun Kristu ali mon e Davidi? ³⁶ Davidi ndemie, ntangu emiywo nde na mpeve, atubinde ndenden: 'Nkum atituba nda Nkum eme, gneme ne wum eme ewuo tii ko eyatsugme wambeni iyie ne ngie iyie i nkuu.' ³⁷ Davidi ndemie avie Kristu Nkum, oshin onkagn Kristu asifiyiande mon nde?" Oluy o vear s'ayikiwo n'osiang na ngyug vii along nde. ³⁸ Yezu n'along ande aletubikinde nda wo ngean: "Osugagni na walong i nsiku ine, wamileang nkien ko n'entwum iteytey mpi ko n'endii eli vear entsign, waleang vear wapii mbea; ³⁹ mpi ne sinagoga, waleang gneme ko ne nkway inteang ti n'okina to oliu, waleang k' indi inteang. ⁴⁰ Walekumi mvur i wansakwi, ye waleki bisamu iteytey djwi vear wayen. Vear anagn ayavey wo ndola eninen." ⁴¹ Mby Yezu s'agneminde ne nteang esag epeawo makabu n'evuru e Nzeam, s'alirikinde oshin oletsug vear makabu. Ankea ekri s'atsugikiwo oluy ekri n'esag. ⁴² Mby nsakwi emog, omva onkear, ayia ntwomo akutu ape. ⁴³ Mby Yezu s'avinde walongoki inde mpi atuba nda wo ngean: "Mokabagni vi-a-vii, omva o nsakwi ene atipea makabu elenga vear ankum amitsug ekri n'esag ene. ⁴⁴ Djwi amuu ane ankum watipea ekri eli kakuwo na mfunu. Kansi nsakwi ene, n'omva onde, atipea ekri ende enkum eyinde na wo djwi na luzingu ende."