¹ Ntangu eleyikiwo Yeruzalem, watikum mbeama na Bethfage, etay e embimi Olive Yezu s'atum nde walongoki inde ipe, ² Atuba nda wo: Tshwagagni ne wiya eli nteang egnu; ko ntangu esishwegnu, asiyen gnu imon i mpunda emog wamotshung n'oshing, kaku wur emigneme ne dzug iwo ve, pubagninde n'oshing, mpi jiayinde. ³ Yug wur amituba ndenden: 'Djwi na nge ekiegnu ngean?' kearagni gnugnun: 'Nkum ali na mfunu ewo. Mpi mbala emog asisianga wo, onjiagni wog nendien.'" ⁴ Wakien mpi, wayen imon i mpunda wamotshung n'oshing, nelien, ne mbug, wopuba mpi. ⁵ Vear amuu ne kati e vear ayii kog watuba wuwun: "Nge ekiegnu? Djwi na nge epubagnu mpunda enagn?" ⁶ Wakeara kamsi eyitubi Yezu, mpi wosianga akien. ⁷ Walongoki ipe inagn wajie mpunda enagn etay eli Yezu, watwomo ileam iwo ne dzug inde, mby Yezu agneme ne dzug iwo, ⁸ Vear entsign wayia ileam iwo ne mbug, mpi vear amuu watsug nkaya iyibagikiwo n'ivur. ⁹ Vear ayii nteang ende ti vear ayii mby ende aletsugikiwo elie: "Hozana! lusakumuna eyii ya wur eleye ne dzin i Nkum! ¹⁰ Lusakumuna eyii n'ekub e tea su Davidi! Hozana n'ondii e dzug dzug!" ¹¹ Yezu ashwe ne Yeruzalem, atsa ne tempelo, alir vim ankum pipi na nde. Vuna ayiwo etikien, s'atshinde Betania ti walongoki inde djum n'ipe. ¹² Mpimpign enagn, ntangu emikeawo yim Betania, Yezu ayug nziya. ¹³ Ali ko etey, ayen oshung omog e nsuu eyike na nkaya, atsandir yug asiyende ata nsuu; mby emikum nde neti, ayen ko nkaya i mpama, djwi ekayia peanga eta nsuu ve. ¹⁴ Atuba na oshung onagn: "Kaku ata wur emog eyafila mbeam iyie ve!" Mpi walongoki inde wayug vii anagn. ¹⁵ Wakum Yelusalem, mpi ashwe ne tempelo. Abana nkma vear asarike ti ayishumike neti e tempelo. Apfuma wamesa i vear asongo ekri, ti wankway i vear ayisarike wankodima. ¹⁶ Akapea ata mbug ya wur emog ve na mpwe na vim esikug wo nsar nelien e tempelo. ¹⁷ Along vear anagn mpi atuba ndenden: "Epa wamifugn wuwun: 'Evuru eme ayaviewo evuru e bisamu djwi n'okiri opfugn?' kansi gnu, okiagni ondii e ankea vimu." ¹⁸ Antsuru a wanganga-Nzambi ti walong i nsiku ntangu emiyug wo vii amituba nde, waling oshin nge esodjag wo nde. Kansi ayugikiwo womo, djwi along ande akirikiwo wo oluy o vear. ¹⁹ Wakum epiekuo, s'alim wo ne wiya enagn. ²⁰ Emikien wo tii ne suka enagn, walongoki wayen oshung o nsuu eyi etiyum ti n'edzuu. ²¹ Petelo, akea nkana, atuba ndenden: "Nkum, lir! Oshung o nsuu eyishing yie wean etiyum." ²² Yezu akeara ndenden: " Yiagni na lukwikilu ya Nzeam. ²³ Mokabagni, vi-a-vii, wur enkum esituba nda ombim ene: 'Lim kog, tshwag olog ne nzey, mpi yug akatsug itura ipe-ipe ve, kansi yug adjir ndenden vii atuba nde ane siyiawo ko oshin onagn, enagn vii asikie Nzeam. ²⁴ Wog enagn, mokabagni: Vim enkum eling gnu ne bisamu, djiragni gnugnun otiveagni wog, mby asiyen gnu asikug wo. ²⁵ Mpi ntangu eyima yie djwi na nsama, yug oli na djwi ya wur, ofwete ondolula nde, djwi teagnu eli dzug asololula nde mpi masumu iyie. ²⁶ Kansi yug okalolula ve, teagnu eli ne dzug apololula mpi ve masumu iyie." ²⁷ Wakea ntsa Yelusalem, na ntangu ekienike Yezu ne tempelo, intsur i wanganga-Nzambi, walong i nsiku ti antsuru a dibundu wayia etay elinde. ²⁸ Mpi watuba wuwun: "N'ekub e nagn elekiyie vim ane, mpi nagn opi kiyeka na kie wog?" ²⁹ Yezu akeara wo ndenden: Ndoyueagni djwi ine; onkearagni mvutu mpi. Mby asokabagni me etay eyim ekub elekiime vii ane. ³⁰ Mbotika e Yoane eyim dzug, to ya vear? Okearagni mvutu." ³¹ Mby watsa mpfug wog na wog: "Yug simi keara susun: 'Eyim ne dzug', asitubande: 'Djwi na nge ekadjir gnu ya nde?' ³² Mpi yug simikeara susun: 'Ya vear'..." Ayiwo na womo o vear, djwi vear ankum aveyikiwo Yoane kamsi ngunsa. ³³ Wakeara Yezu wuwun: "Sipijia." Mpi Yezu avura ndenden: "Me mpi, mpokabagni ve yug ndekii vii ane n'ekub e nagn."