¹ Yezu, ntangu emilim nde n'ondii onagn, s'atshinde ne buu e Yudea, ti ne buu enkum eli etitign e vay a Yordani. Oluy o vear wayia diaka etay ende. Akeyikinde ndong vear anagn, ko oshin omiziga nde na nkie. ² Wafarize wayia etay eli nde djwi n'ontesa, woyue: "Ne nsiku eli wuo djwi n'ompeam na ndjag ivea ti wear nde?" ³ Akeara ndenden: "Nge eyitubi Moize nda gnu?" ⁴ Watuba wuwun: "Moize apinde nswa na mfugn onkean e ndjag ivea mby okmi wear yie." ⁵ Mpi Yezu akaba ndenden: "Eli djwi n'itura ignu biu mby Moize s'ofugnagni nde nsiku enagn," ⁶ 'Kansi n'itsin i buu, Nzeam akinde ompeam mpi onkear.' ⁷ Wog enagn, ompeam ayalim nde etay e tea nde na mea nde, ayanaba nde ti wear nde, ⁸ Mby wape wakum djuung imog. Wapafiyia ipe ve, kansi watikum wur emog. ⁹ Kansi wur apikug nama ve vim emitsug Nzeam ondii omog." ¹⁰ Ntangu eliwo wo neti evuru, walongoki woyue diaka na djwi ine. ¹¹ Mby akaba ndenden: "Wur eskma wear, mpi akey ntsug emuu, atikie itaay ti nde. ¹² Mpi yug onkear atisianga wum nde, akey ntsug wum emuu, atikie itaay ti nde." ¹³ Mby wojie aman alieng, djwi atsug ewuo, kansi walongoki wa ngnianga vear anagn. ¹⁴ Kansi Yezu ntangu emiyen nde, akayia n'osiang na wo ve, mby akaba: "Siagagni aman alieng waye etay eme, mpi oyapumagni ve; djwi ekub e Nzeam eli djwi na vear ali kamsi wo. ¹⁵ Mokabagni, vi-a-vii, wur enkum epayama ekub e Nzeam kamsi mon ilieng, apayashwe otshwag neti ve." ¹⁶ Mby avey aman anagn ne mbwo inde, mpi asakumuni nde, mpi ayab nde ewuo. ¹⁷ Ntangu emibana nde ekien ende, ompeam emog ayia n'iveang, alog n'abwong ne nteang ende mby oyue: "Nkum e wuo, nge efwete me nkie me djwi nsa viya luzingu e mvwe na mvwe?" ¹⁸ Yezu atuba ndenden: "Djwi na nge emvieyie wuo? kaku eli wuo ve, eli ko Nzeam ndemie. ¹⁹ Ojia enkwon: 'Oyadjag ve, oyakie itaay ve, oyakama ve, oyayia ntiegn oyang ve, oyakie ipwo ve; pea tea ti mea yie lokumu.'" ²⁰ Wur ewo atuba ndenden: "Nkum, atsame ndemfuka na vim anagn yim ko olieng ome." ²¹ Yezu olir tii, oleang. Mby okaba ndenden: "Olakwon vim emog. Tshwag, sar vim ayie ankum, pea ya ankea emva, mby asiveya yie otsun ne dzug, mby yag ondani." ²² Kansi ko djwi notuba onagn, wur ewo akum ko ngy ngy mby s'akien nde, djwi ayinde na vim entsign. ²³ Yezu , alir mbeama na nde tii, mby atuba nda walongoki inde: "Eli mpay djwi na ankea otsun na nshwe n'ekub e Nzeam!" ²⁴ Walongoki wayen ngituka oshin oyitubi Yezu, mpi, akea mvey otuba ndenden: "Aman ame, eli mpay ya ankea otsun na nshwe n'ekub e Nzeam. ²⁵ Kansi kaku mpay ve ya shamo na nshwe n'itun i sindani kansi epa nkea otsun ve na nshue n'ekub e Nzeam." ²⁶ Walongoki wayen ngituka entsign, mpi watuba wog na wog wuwun: "Mby wur nagn esikug mvug?" ²⁷ Yezu alir, mby atuba ndenden: "Ya vear, epakug ve, kansi epa ya Nzeam ve. Djwi ya Nzeam, asikug nde nkie vim enkum." ²⁸ Petelo abana n'onkaba ndenden: "Lir, sitisianga vim ankum mpi silolani yie." ²⁹ Yezu okeara ndenden: "Mokabagni vi-a-vii, kaku wur emog emisasianga evuru ende, atwung ande ampeam, to atwung ande ankear, to mea nde, to tea nde, to aman ande, to buu ende djwi na me to djwi n'oshwong o Nzeam, ³⁰ mby akwon mvea mbala nkam, opeane ne mvwe ine, wamvuru, atwung ampeam, atwung ankear, wamea, aman ti wa buu, na wambangika, mby ne buu eyasayia, luzingu ekwon nsuka. ³¹ Kansi vear entsign a nteang, ayasawo kum vear a nsuka, mpi vear entsign a nsuka, ayasawo kum vear a nteang." ³² Ayiwo ne mbug walevean Yelusalem, mpi Yezu atsukinde nteang ewo. Walongoki wakum nginu eshin n'eshin, mpi vear alosodjiike, walosodji na womo. Mby Yezu avey walongoki djum n'ipe pipi na nde, mby abana na nkaba wo vii aleye djwi na nde. ³³ "Lir, silavean Yelusalem, mpi Mon-wur asopea wo ya antsuru a wanganga-Nzambi ti walong i nsiku. ayobag wo ewu ende ko ewa, mby ayopea wo ne mbwo empaagn. ³⁴ Ayoywe wo two, ayotwe wo asuy, ayober wo enuagn, mpi ayodjag wo; mby ne mby e nshuu isar, ayafutumuka nde." ³⁵ Aman a Zebede, Jaki ti Yoane, wa vanga na nde, mby watuba: "Nkum, sileang otepii vim eling su. ³⁶ Akaba wo ndenden: "Nge eling gnu nkii djwi na gnu?" ³⁷ Watuba wuwun: "Otepii mbug signemi ti yie, emog ne wum ewuo eyie, emuu ne wear ewuo eyie, ntangu eyashwe yie ne nkembo eyie." ³⁸ Yezu akeara ndenden: "Opijiagni vim eling gnu ve. Asikug gnu na gnua ikob ifwete me gnua, mpi asikug gnu mvey mbotika efwete me mvey?" ³⁹ Wokeara wuwun: "Asikug su."Mby Yezu atuba nda wo ndenden: "Ikob isignua me, asikug gnu na gnua, mbotika esivye me, asikug gnu na mvey. ⁴⁰ Kansi djwi na gneme n'ewuo eme e wum to ewuo eme e wear, enagn epindir me, mpi ayapeawo ko ya vear amiwuma wo endii enagn." ⁴¹ Walongoki djum ntangu emiyug wo vii anagn, wabana na ngyug nkier wa Jaki ti Yoane. ⁴² Yezu avie, mpi atuba: "Ojiagni vear alir wo kamsi ankum n'okiri atsawo mpea vear okiri mpay mpi antsuru wali ne dzug iwo. ⁴³ Kansi ya gnu, epa eli oshin onagn ve. Wur eleang akum wur enen ne kati egnu ayii wur egnu otshia; ⁴⁴ mpi wur enkum eling ngya ontete ne kati egnu, ayii mpfumi e vear ankum. ⁴⁵ Djwi Mon-wur ayinde, epa djwi wopii ve, kansi djwi na nkie, mpi na mpea luzingu kamsi ifutu ipeawo ya vear entsing." ⁴⁶ Wakum ne Yeriko. Ntangu elepwi nde ne Yeriko ti walongoki inde ti oluy o vear, mon ompeam e Timee, Bartime, amibuye viy, otshia ko ngwigna, atigneme n'ikri i mbug. ⁴⁷ Ntangu emiyug nde ndenden eli Yezu e Nazarete, abana na ntsug elie mpi atuba ndenden: "Yezu, Mon e Davidi, ongyug ngy!" ⁴⁸ Vear entsign wopum, watuba wa nde na ntshung odzum. Kansi nde, alega ntsug elie biu, ndenden: "Mon e Davidi, ongyug ngy!" ⁴⁹ Yezu ayima, mpi akaba vear wavii wur enagn. Wavie wur emibuye viy enagn, wuwun: "Yia na kikesa, alovie yie." ⁵⁰ Wur emibuye viy asafanga kazag ende, mpi ayima ne mbala emog, aya etay Yezu. ⁵¹ Yezu okeara ndenden: "Nge eling yie nkii djwi na yie?" Wur emibuye viy okeara ndenden: "Rabbouni, ndeang nkey ngyen." ⁵² Mby Yezu atuba nda nde ndenden: "Tshwag, lukwikilu eyie etovuga." Ko ne ntangu enagn akea ngyen, mpi asalana Yezu ne mbug.