¹ Yezu, ntangu emivie nde wantumwa inde djum n'ipe, apea biu ti ekub ne dzug i wampeve ipwo inkum, ti biu e mvuga vear na nkeang. ² S'atum nde na ntsa ndong ekub e Nzeam, ti na mvuga vear a nkeang. ³ Atuba nda wo ndenden: "Oyaveayagni ata vim emog ve ne mbug egnu eletshi gnu, ata ikom, ata ibwomo, ata mampa, ata ekri, mpi oyaveayagni ata ileama ipe ve. ⁴ Evuru enkum esishwe gnu, gnemagni neti tii eshuu eyalim gnu. ⁵ Yug vear wakaleang n'omveyagni ve, pweagni ne wiya enagn, sapubagni okub oli ne nkuu ignu, djwi esayia ntiegn djwi na wo." ⁶ S'akien wo, aletshikiwo wiya na wiya, walelong oshwong owuo, walevugi vear a nkeang etay enkum. ⁷ Ntangu emiyug Herodi vii ankum amileg anagn, akayen nge esikug nde ntuba ve. Djwi amuu atubikiwo wuwun eli Yoane eyiwi atikea mbiy n'ewa; ⁸ amuu wuwun Elia atikea mbiy, amuu wuwun ngunsa emog e ntama atikea mbiy n'ewa. ⁹ Kansi Herodi s'atubikinde ndenden: "Atum me vear wabag Yoane nking, emuu ene eleyug me ene ko nagn?" Mby s'alingikinde n'ongyen. ¹⁰ Ntangu emikea wantumwa, s'akabiwo Yezu vii ankum amikiewo. Mby s'avey nde, watsa ne wiya enen emog dzin iwo Betsaida. ¹¹ Ntangu emijia oluy o vear, s'asawodjie. Yezu ayama, s'akabikinde oshuong o ekub e Nzeam; avuga mpi vear ayileangike na mvug ne nkeang iwo. ¹² Ntangu emibana njie vuna, wantumwa djum n'ipe wavanga mbeama na nde, wuwun: "Kaba oluy o vear ane wakey ntsa ne wa viya ili pipi, watsi mvur mpiog djwi waling mpi olio mpiog; djwi nendien sili ne buu e ndzum." ¹³ Yezu nda wo ndenden: "Gnu gnemie, peagni wo vim anda." Watuba wuwun: "Sili ko na mampa itean ti nse ipe, tuba ko yug su semie sitsi nshum vim anda djwi na vear ane." ¹⁴ Kansi wo, ayiwo ampeam kiteso e awugu atean. Atuba nda walongoki inde ndenden: "Kabagni wo na gneme n'oluy o vear otean." ¹⁵ Mby s'akiwo oshin onagn, wakaba vear angn na gneme. ¹⁶ Yezu avey mampa itean ti nse ipe inagn, mby ntangu emijir nde viy ande dzug, asakumuna. Mby abag itign-itign, s'apiinde ya walongoki inde na nkabula ya oluy o vear anagn. ¹⁷ Wala wankum, wayur, wavara imwama djum n'ipe itiyuo to n'itign imisashuna. ¹⁸ Eshuu emuu Yezu asamikinde n'ikri, ayiinde ti walongoki inde, ajue ndenden: "Vear waletubi wuwun me ndi nagn?" ¹⁹ Wakeara wuwun: "Yoane mbotiki, kansi amuu wuwun, Elia; amuu wuwun, ngunsa emog e ntama atikea mfutumuka." ²⁰ Ayue ndenden: "Mby gnu, atsagnu ntuba gnugnun me ndi nagn?" Petelo s'akearinde ndenden: "Oli Kristu e Nzeam." ²¹ Mby Yezu atuba nda wo na nkwon nkaba ata wur emog ve. ²² Akeantuba ndenden: "Ekug wuo Mon-Wur ayen mpay entsign, ayofanga wo ya antsuru a dibundu, ya ankum a wanganga-Nzambi, ti ya walong i nsiku, ayodjag wo, mby ayakeande mbiy n'ewa n'eshuu otatu." ²³ Mby s'atubinde nda wo wankum ndenden: "Yug wur eling asadjie ne mby eme, asiangi na ntsug onen ne luzingu ende, avari kulunsi ende, mby asadjie. ²⁴ Djwi, wur eleang na mvuga luzingu ende, ayatsawo ntu, kansi wur eleang luzingu ende etsi ntu djwi na me, ayavuga nde wog. ²⁵ Mfunu nge ya wur, na mvea buu ene opfugn yug atidjag, go luzingu ende etitsa ntu? ²⁶ Djwi, wur eyangyug me nsogn, ti otuba o me, Mon-Wur mpi ayoyug nde nsogn, ntangu eyayia nde ne nkembo ende, ti e Tea, ti e wa banzio i santu. ²⁷ Mokabagni, vi-a-vii, amuu ali nendien wapawa ve yug watoyen ekub e Nzeam." ²⁸ Etitign e nshuu iniani ne mby emituba nde vii anagn,Yezu avey Petelo, Yoane ti Jaki, mby s'avean nde n'ombimi djwi na ntsa nsama. ²⁹ Ntangu esama nde, elung ende esogno, ti eleama ende elega nkum siy. ³⁰ Yenaka, vear ape wean wasula ti nde: ayiwo Moize ti Elia, ³¹ wyia na nkembo, atubikiwo ya nde na vii asitsande nkie ne Yeruzalem. ³² Petelo ti atwung ande agnimikiwo lwong, kansi, ntangu emibiy wo, wayen nkembo e Yezu ti vear ape ayiike ti nde. ³³ Ntangu eling nam vear anagn wa Yezu, Petelo atuba nda nde ndenden: "Nkum, wuo sisayia nendien, sitwung atsug asar, emob djwi na yie, emog djwi na Moize mby emuu djwi na Elia." (Akajiaka nge etuba nde ve.) ³⁴ Ntangu eyitubikinde vii anagn, mafuba emog eyia ndzub, walongoki inagn wayug womo ntangu eyayen wo washwe ne mafuba. ³⁵ Mby otuba omog epwe ne mafuba, etuba wuwun: "Ene eli Mon me emison me: yugagni nde! ³⁶ Ntangu emiyug wo otuba onagn, Yezu asatsuga ndemie. Walongoki wayia ko pwo, mpi ne ntangu enagn, wakakaba ata wur ve vii ayiiyen wo anagn. ³⁷ Mpimpign enagn ntang emilim wo n'ombimi, emikrawo, olw'avear wayia ne nteang e Yesu. ³⁸ Yenaka wur emog ne kat'avear enagn adzama: " Long, moleama ko yie, tolir mon me ompeam, nde ko na mon'emog ene. ³⁹ Mpeve emog atsand'onkir, mbal'emog abani ntsug elie,mpi mpev'enagn ognug na biu, opur alor, mpay na mpwe ne djung'imon, mpi mon asayia komoo. ⁴⁰ Ntiwigna na walongok'iyie na nkema mpev'ipwo enagn, wakakug." ⁴¹ Yesu akiara ndindin: " Avear apwo, ankwon lukwikilu, ayayiaka me magnu tii nsuka nonka, tii eshwi nge ayovarakagni me n'etura? Veara mon yie ompeam nendien. " ⁴² Ntang emivanga mon mbeama na Yesu, mpev'epwo enagn ologo ne buu, ognug na biu. Kansi Yesu angianga mpev'epwo enagn, mon s'avug nde, akiara mon na teande. ⁴³ Vear ankum wayituka djwi ayen wu onen e Nzeam. Kansi wur na wur ayindi n'oseang na vii ankum ayikiike Yesu, mbiy atuba na walongok'inde ndindin, ⁴⁴ " Djwina gnu yugagni vii ane wuo: ayasar wu Mon e wur ne mbwo i vear." ⁴⁵ Kansi walongoki wakajia otub'enagn na wagni ewo. Ayiwo na womo n'ondjwe yu oyub'enagn etuba wuwun nge. ⁴⁶ Ngind'imog eyia ne wagni e walongoki nandjia wur nagn eli kuluta onen na kati ewo. ⁴⁷ Yesu, ntang emiyen nde ngindu eli n'itur'iwo, avey imon'ileang emog, otsug mbeana nande, ⁴⁸ atuba ndawu ndindin: " Wur esivey mon'ileang'ene ne dzin ime, apimvey me nkeang eme, wur esimvey me ativey wur eyintum. Djwi wur eli okiag ne kat'egnu, ndug wur eli kulut'onen." ⁴⁹ Yoani avey otuba akeara ndindin: " Long, ayensu wur emog alekemi mpev'ipwo ne dzin iyie, opumsu djwi api lani avear. " ⁵⁰ " Yesu akeara ndindin, " Oyopumagni, djwi wur epitun avear, ali wur esu. " ⁵¹ Ntang emiyen nde ndindin ntswi ondima nde ne buu etivanga, Yesu s'atshwinde Yerusaleme. ⁵² S'atum nde vear ape, wakir mbug, watsantshwe ne wiy'enen emog e Samaria, djwi wayidiki ondii esivur nde. ⁵³ Kansi wakoleang n'ongiama djwi ayiwu aletshu Yerusaleme. ⁵⁴ Ntang emiyen walongok'inde Zaki na Yoani oshin enagn,wuwun: " Nkum, oleang siviy tshia eyum dzug, ekiri djwi wankuma walungi? " ⁵⁵ Yesu akea ntshim etay ewo, angianga ndindin: " opijiagni otshin e mpve enkagn eli na gnu, ⁵⁶ djwi Mon e wur akayia djwina mpiy moyo i vear kansi djwina mvuga, mbiy s'atshwiwu wiy'ikiy. ⁵⁷ Eletshwikiwo ne mbug, wur emog atuba nande ndindin: " Nkum, ayodjieme etay enkum eyatsayie. " ⁵⁸ Yesu akeara ndindin; " Wampongompongo walela mpuy, wamfuru ne dzug walela djib, kansi Mon e wur kaku nde ata n'ondii e nsug ote." ⁵⁹ Atuba nda wur emuu nddindin: " Ontsanjiy, wur ewu ndindin, " Nkum, ompiy mbug ntotsag mfugni teame. " ⁶⁰ Kansi Yesu okeara ndindin: " Sianga edju wafugni edju ewo, yie, tshog olong ekub e Nzeam. :" ⁶¹ Wur emuu atuba ndindin: " Nkum, me, asosam'odjie, kansi ompi mbug ntotsanam m'atug ame n'evuru. " ⁶² Yesu akeara ndindin, " Wur emikir pusupusu, yu atikea ndir mbiy, apikug n'ekub e Nzeam."