¹ Ne mbiy ewu Yesu ason walongoki osambia emuu, atum ape n'ape ne nteang ende ne viy'ene n'endii enkum enatsande ndemien. ² Atuba ndawu ndindin: " Evur eli onen, kansi vear'otshia wali okiaga. Samagni nkea evur atum avear'otshia n'evur ende. ³ Tshogagni, yenagni, mean ntotumagni kamisi ameme ne kati e wankuyi. ⁴ Oyavaragni ata ekiri, ata ibwomo, ata antuma, oyapeagni ata wur emog mbea ne mbug. ⁵ Evuru esiswegnu, tuba nteang gnugnu, ' ngemba eyi n'evur'ene!' ⁶ Yu eli na mon e ngemba ne tii, ngemb'egnu asiyiawu nande, yu kaku, ngemb'egnu asikeawu nagnu. ⁷ Asiyiagnu n'evur'enagn, asilagnu vum ankuma ayopeagniwu djwi wur'otshia akug n'ifut'inde. Oyatsagni evuru n'evuru. ⁸ Ne wiy'enen eyashwegnu, yu wamoyamagni, lagni vum asopeagni wo, ⁹ vugagni avear'ankeang esiyia kog. Kabagniwu, ' Ekub'e dzug etikum pipi nawo.' ¹⁰ Kansi wiy'esitun n'ongiamagni ntang esiswegnu, tshogagni n'iyiawiya, tubagni wuwun: ¹¹ 'Sikuma djwina gnu akub e wiyagnu eminaba ne nkuu isu, jiagni gnugnu ekub e dzug etikum pipi.' ¹² Mokabagni, eshwi ewu enagn, Sodomo ayayiawu ndamu ewuo kansi epa wiy'enagn. ¹³ Ngiy na yie Korazimi, ngiy na yie Besayida, djwi yu ko bidimu eyikiy wo ne kati e gnu, watokie, watokie ne Tiri na Sidoni, vear awu anayiawu wamitshim'itura ntama, analwewu abwomo, ankwewu akiatshia. ¹⁴ Mbiy eswi eyabag wu viy avear a buu, Tiri na Sidoni wapayabaga ewu ebiu kansi epa gnug. ¹⁵ Mbiy yie, Kapernawumu, eyijir wu tii ne dzug'olung, ayokrawu ngie tii ne nsi i bafwa. ¹⁶ Wur esoyugagni, atingyug me, wur esofongagni antimfongo me, antifongo mpi wur eyintum." ¹⁷ Walongoki osambia enagn wakea n'oseang' watuba wuwun: " Nkum, entshung watilemfuka wasu ne dzin'iyie. " ¹⁸ Yesu atuba ndawu ndindin: " Ayenikime Satana otsin eyilogikinde yum dzug kamisi nzari. ¹⁹ Yenagni, mean ntopeagni ekub e nkien ne dzug i wandjwa na wankuru tii ne dzug i byu enkum e mbeni, kaku vum esokeagni ipwo. ²⁰ Kansi gnu, oyayiagni n'oseang djwi mpev'ipwo itilemfuka nagnu kansi oseang egnu djwi vin agnu wamifugni ne dzug. " ²¹ Ko ne ntang enagn, na byu e Mpeve Santu, Yesu ayia n'oseang atuba ndindin: " Tea, mokeara nsag na vii, yie nkum e dzug na buu, djwi otsin eyiziyie viy'anagn n'ankea viagn n'ankea ntien, osayegne n'aman. Eh, Tea, mokeara nsag na viy djwi otsin emileang yie ngian. " ²² "Teame amimpea vum ankum, kaku wur ejia otsin eli Mon, ko Tea ndemien, mpi kaku wur ejia Tea, ko Mon ndemien, n'avear amiyegne Mon otsin eli Tea. " ²³ Ntang emikeande ntshim etay e walongoki, s'akabinde wur na wur ndindin, " Kiese na viy ayen vum ayen gnu. ²⁴ Mokabagni, wangunza na wavuyi ensign alingikiwu wayen vum ayen gnu ane kansi wakayen, alingikiwu wayug vii ayug gnu ane kansi wakayug. " ²⁵ Long e nsiku emog ayima djwi na ndogo Yesu, atuba nande ndindin: " Long, otsin onkagn esikieme djwi mvea evug e mvwe na mvwe? " ²⁶ Yesu okaba ndindin: " Wamifugni nge n'onkeana e nsiku? Viy nge etsayie ntanga? " ²⁷ Akeara ndindin: " Leang Nkum, Nzeam e yie, n'etura eyie enkuma, na moyo eyie enkuma, na byu eyie enkuma, ti na wagni eyie; Lea otung eyie kamisi yie yemien. " ²⁸ Yesu atuba nande ndindin: " Otikeara wuo, kiaka otsin enagn, asivug yie. " ²⁹ Kansi nde, alingikinde komvea lunungu, s'atubinde na Yesu ndindidn," Mbiy otwung eme ewo eli nagn? " ³⁰ Yesu s'akeyinde mvey otuba ndindin: " Wur emog ayum nde Yerusaleme, alekri Yeriko. Vear apwo wakir ne mbug, wodjag isur, anawande, wokuma vum ankum, wosologo n'iyia mbug. ³¹ Nganga Nzambi emog elelegiki ne mbug enagn, ayen wur enagn, alenge n'ikiri. ³² Wur emog e levi akum kog, emiyen nde wur enagn, alenge. ³³ Kansi wur emog e Samaria aletshwikinde wiy'emuu, ekum nde n'ondii onagn, ayug wur enagn ngiy ensign. ³⁴ Ayia mbeama nande, otshung ileama, ozra vir ti veana na wampur'inde, s'avarinde wur ewu n'ikaru inde, s'atshwind'onkiy ne mbwo e waminganga djwi wasalisi. ³⁵ Mpimpign enagn, avey akut'ape, apea na munganga, atuba nande ndindin: " Sadisa nde, yu ekiri ene emiyia okiaga, eyasayie pur mbiy, ayoyiam'onkear eshwi eyakeame.' ³⁶ Ne kati e vear asar enagn, nagn eli otwung e wur eyilog ne mbwo avear'apwo enagn? ³⁷ Long e nsiku akeara ndindin: " Eli wur eyoyug ngiy enagn. " Yesu okeara, Tsog yie ko kie otsin enagn." ³⁸ Yesu nda walongok'inde ayiwu ne mbug, wakum ne wiy'emuu, onkear'emog dzin'inde Marata s'aveyinde Yesu ovara n'evur'ende. ³⁹ Ayinde n'otwung ende onkear dzin inde Mariya, nde ene agneme ne nkuu i Yesu, ayugukinde along. ⁴⁰ Kansi Marata atikangama n'etshia e ngeleam n'evur. Ayia etay e Yesu mbiy atuba ndindin: " Nkum, tolir otwung eme onkear antinseanga ko memie n'etshia enkum ene? Kabande ayi nsadisa. ⁴¹ Nkum okeara, atuba nande: " Marata, Marata, oyen mpay djwina vum ensign, ⁴² kansi vum emog eli mfunu kuluta: Mariya atison ikab iwuo, wapayokuma."