¹ Eshwi emuu, Yesu asamikinde n'ondii emog.Ntang emishir nde nsama, longok'ende emog atuba nande ndindin: " Long, long'avear otsin o nsama, kamisi Yoani alonginde walongok'inde. " ² Yesu atuba ndawu ndindin: " Yu oyasamagni, tubagni, ' Tea, dzin'iyie eyi santu. Ekub'eyie eyi. ³ Peavear eshwi n'eshwi dimp'esu. ⁴ Lolul'avear masum'isu, n'otsin esasu ndolula mpi masum'ivear atsantekie ipwo; mpi oyalog'avear ne mpukumuna.'" ⁵ Yesu akeantuba ndawu ndindin: " Yu wur emog ne kat'egnu ali n'ewur, mbiy ewur enagn atiyia ne kat'otshuu djwi n'onkaba ndindin: ' Ewur, ontshom mamp'isar, ⁶ djwi ewur eme emog atiyia n'evur eme ayum voyaze, kaku me na vum ompea, ⁷ mbiy yu, ewur eli n'etiy evur atokiara ndindin: Oyantungisa, ntitshung epfug'evuru, sitivur me ti aman'ame, mpafibiy djwi n'ompea yie mampa.' ⁸ Mokabagni, ata akabiy djwi n'ompea mampa djwi al'ewur ende, asibiynde djwi atotungisa mpi asopeande vum enkum elinde na nziya ewu. ⁹ Mpi me ndokabagni, wugnagni, asopeagni wo, lingagni, asiveagnu, kokolagni n'epfug, asongamagni wo. ¹⁰ Djwi wur enkuma esiwugna, asiveande, wur ayaling, ayaviande, mpi ayangamawu epfug na wur e kokola. ¹¹ Ne kat'egnu, tea nagn eli, yu mon nde atowigna dimpa, nd'opii itari? Ata, yu mon atowigna nse, nd'opii ndjwa? ¹² Ata, yu atowigna ikiy i nkogo, nd'opii nkuru? ¹³ Mbiy, yu gnug avear a nkier, ajiagni mpea vum awuo n'aman'agnu, mbiy otsin onkagni Tea eli n'olung asikwonde mpea Mpeve Santu n'avear owigna nde? " ¹⁴ Yesu akema mpe'ipwo ne dzug i wur emog ekatubaka. Ntang eyipwi mpev'ipwo enagn, wur ewo ekeantuba, olwi o vear wayen kiese. ¹⁵ Kansi avear amuu ne kat'e vear anagn watuba wuwun: " Alekiy na byu e Belezebulu, nkum e wademoni, s'elekeminde wademoni. " ¹⁶ Avear amuu, djwin'onseyi, woywe djwi apiy kidim'emog eyum dzug. ¹⁷ Kansi Yesu ajikinde ngind'iwo, mpi atuba ndawu ndindin: Ekub ekuma eli vear nginam wog na wog asiwawo, mpi evur'emog asibwewu evur'emuu. ¹⁸ Yu Satana atinam na nde ndemien, otsin nge ekub ende asiyimawo? Djwi gnu oyatubagni gnugnu me ndekemi wademona na byu e Belezebulu? ¹⁹ Yu me ndekemi wademona na byu e Belezebulu, mbiy aman a gnu, walakemi na byu enagn? Djwi na wu, ayabag wu ewu. ²⁰ Kansi yu eli n'epign e Nzeam elekemi me wademona, ekug e Nzeam etiyia etay e gnu. ²¹ Yu wur e byu ali n'eta na vigni akengela evuru, asiwum nde vum ankum wuo, ²² Kansi yu wur olengande na byu amiyi'onkir asokumande ata eta na vigni eyitsug nde etura, mpi avey vim ande apiy vear amuu. ²³ Wur epa eli nda me, aling mbagni ndame, mpi wur epivukisi ndame, alekabuli. ²⁴ Yu mpev'ipwo atipwe ne djung iwur, asitsande n'endii e nzum djwin'aling endii e ngyor. Yu akavea, asituba nde: ' Ndekey nsa n'evur'eme eyum me.' ²⁵ Ntang esikeande, asyen nde evuru wamikom mpi wamitsug vum awuo. ²⁶ Mbiy asitsande, avey mpev'ipwo kuluta nde ishiambia; wayii wapier n'evuru, mbiy luzingu e wur enagn ekum mpay kuluta nteang." ²⁷ Ntang eyitubiki Yesu vii anagn, onkear omog ne kat'avear aseang otuba ndindin: " Kiese n'ipfugni ey'ovari! kiese ne w'aviyo eyinwi yie! " ²⁸ Mpi Yesu akiara: " Kiese kuluta n'avear ayug otub'e Nzeam mpi walewum. " ²⁹ Otsin eleyiki vear, wakum entsign, nde s'atubikinde: Ndwong aman ane eli ndwong ipwo; wayaling kidimu; kaku kidimu emuu eyapeawu, tuba ko kidimu e Yona. ³⁰ Djwi k'otsin oyoyii Yona kidimu djwin'avear a Niniva, k'otsin e Mon e wur ayayiande kidimu djwina ndwong aman ane. ³¹ Nkum'onkear e Midi ayayimande eshwi eyabag wu ewu, ti avear a ndwong ene mpi ayabag nde vear ane ewu, djwi nde, ayum etey ne nsuk'e buu, ayinde ko djwina n'ayug ntien eyiyii na Salomoni, kansi lir, n'endien eli na wur elenga Salomoni. ³² Avear a Ninivi ayayimawu, eshwi eyabag wu ewu, ti avear a ndwong ene, ayabag wu vear ewu, djwi andimi wu along a Yona; kansi lir, n'endien eli na wur elenge Yona. ³³ Kaku wur emog etsampiey mwinda djwi atsug n'ondii e ngizuba to ne ngye imon'oshung. Kansi atsawunkiy n'ondii opiey tshia, djwi avear ashwe wayen oviang. ³⁴ Dziy iyie eli mwinda ne djung'iyie. Yu dziy iyie eli wuo, djung'iyie enkum esiveawu mwinda, kansi yu dziy'iyie ep'eli wuo, djung'iyie enkum asiyiswu ne mpib. ³⁵ Keba ne ntang enkum, mwinda eli ne djung'iyie ekakum mpib. ³⁶ Yu djung'iyie eli na mwinda, n'etiy kaku ata ndamu e mpib, djung enkuma asiyiawu na nsemo kamisi yu mwinda eyopea nsem'ende." ³⁷ Ntang eyitubiki Yesu, farizie emog, ovie na ntsanda n'ewur'ende. Ashwe n'ewur ewo, s'alikinde ne dzug i mesa. ³⁸ Farizi'enagn ayituka n'otsin eyiyen nde Yesu ala kansi akashwiy mbwo nteang. ³⁹ Kansi Nkum atuba n'ande ndindin: " Gnu wafarizie, atsagnu nshwiy akob n'alongo ko n'elien, kansi n'etiy, omijuogagni n'atiene na viy'ankier. ⁴⁰ Ibunu ine! Wur eyikiy elien, epa ko ndug wur eyikiy n'etiy? ⁴¹ Peagni ntete makabu i vum eli n'etiy, mbiy vum ankuma ayayiawu ngitiem djwina gnu. ⁴² Mpay na gnu wafarizie djwi olefut'angi ikab'imog n'akab djum e adjiu a nsuu, ti e balabala, ti mpi adjiu ankum, kansi osatumagni bosembo ti oliang e Nzeam; enagn viy anafwetegnu nkie mpi na nkwon ndjing viy ankum. ⁴³ Mpay na gnu wafarizie, djwi atsagnu ndeang ko kit'inteang ne wasinagoge, mpi wopeagni mbea ne w'endii eli n'olwi o vear. ⁴⁴ Mpay na gnu djwi omikumagni kamisi aluma epimoniki mpi avear walemiari. " ⁴⁵ Mby long emog e wansiku atuba nda nde ndenden: "Long, etubayie ene, olatetwe su mpi." ⁴⁶ Yezu akeara ndenden: "Mpay ya gnu mpi walong i nsiku! Djwi olepiagni vear odzuru omvara, kansi gnu opikugagni nkir odzuru owo ata n'epign emog ve. ⁴⁷ Mpay ya gnu, djwi oletwungagni nkr i wangunsa iyidjag atea agnu, ⁴⁸ opeagni ko ntiegn djwi n'etshia e watea agnu, oleangagni wog djwi eli wog vear ayadjagike, mby gnu s'alesagnu kie ko wankr iwo. ⁴⁹ Wog enagn, waagn e Nzeam s'atubinde: 'Ayatumame wangunsa ti wantumwa, ayadjagakawo amuu, mby amuu ayapeakawo mpay.' ⁵⁰ Mby ndwong aman a lwo ene ayasamawo n'aluung a wangunsa inkum iyidjag wo yim ko eyikiwo buu, ⁵¹ yim ko aluung a Abel tii ko aluung a Zakaria eyiidjag wo etitign e kunda ti tempelo. Ee, ntuba ma gnu, ayalog wo n'ote e ndwong aman ane. ⁵² Mpay ay gnu walong i nsiku, djwi ojia ndimagni nsab e waagn e njia vii; kansi opikugagni na nshwe gnemie ve, mpi otunagni vear amuu ashwewo." ⁵³ Ntangu emilim nde kog, walong i nsiku ti wafarize s'abaniwo nonkub djwi atubi vii amuu entsign, ⁵⁴ walotsug ilung djwi wokir n'otuba onde esipur nde n'odzum onde.