¹ Ntang emishir ntuba Yezu viy anagn ne nteang avear eyodjikinde, s'atshwinde Kapernayum. ² Nkum emog e wiyer nkuu ayikinde na wur'end'otshia eyileangikinde entsign, ayinde na nkeang byu, pipi n'ewa. ³ Ntang emiyug nde ushongo e Yesu, atum antsur'e wayuda djwi ayimvuga wur'end'otshia. ⁴ S'atshwi wo etay e Yesu, wobondela n'inagn wuwun: " Ekug wuo osalisi wur enagn, ⁵ djwi aleang buu esu entsign, eli ndug wur eyitung sinagoge djwina sug." ⁶ Yesu s'atshwinde ndawu. Ntang emikum nde mbeama n'evur'ewu, nkum e wasoda atum iwur'inde djwi na nkaba Yesu wuwun: " Nkum, oyashunga ngien mpay djwina me, mpikug djwi oshwi n'evur'eme. ⁷ Ata me mpi, ayen me mpikug na ngya memien etay'e yie, kansi tuba ko djw'imog, wur eme otshia asivug nde. ⁸ Djwi me, nde n'ankum ne nteang eme, nde mpi na wasoda ne mbiy'eme, yu ntituba n'emog: Tsog, atsu, n'emuu, yag, mpi ayi, na wur'eme otshia, kie ngyan, akiy. " ⁹ Ntang emiyug Yesu otub'enagn, ayia na kiese djwina nkum e wasoda enagn; atsim, mbiy atuba n'olwi e vear elodjiki ndindin: " Mokabagni, ata n'Israyele, ntoyen otsin e lukwikil'ene." ¹⁰ Ntang emikea Nkum n'evuru, avear eyitum Nkum e wasoda wayen wur'otshia ativug. ¹¹ Mpimpign'enagn, Yesu s'atshwinde wiya eviewu Nayimi, walongok'inde ti olwi avear s'atshwiwu nande. ¹² Ntang emikum nde mbeama n'epfug e ntshwe ne wiy'enagn, ayen walevari odjuu, wal'otso mfugni n'aluma, ayinde mon'ompeam k'emog e meande, eyiyiy nsakwi, mbiy vear'ensign e wiy'enagn ayiwu wande. ¹³ Nkum, ntang emiyen nde onkear'enagn, ayug ngiy ensing, atuba ndande ndindin: " Oyalye." ¹⁴ Avanga, mbiy akir opag, avear alevariki opag wayima, Yesu atuba ndindin: " Mon'ompeam, ntuba mayie, yima." ¹⁵ Odjuu k'abiy, agneme, akea ntuba, mbiy Yesu s'okearinde na meande. ¹⁶ Avear'ankum s'ayug wo womo, wakeara nsag na vye na Nzeam wuwun: " Ngunz'enen ayiampwe ne buu esu, Nzeam ndian atiyia ndir avear'ande." ¹⁷ Viy ayikiyiki Yesu, oshong s'apagniwo ne buu enkuma e Yudea ti n'etitign'enagn enkuma. ¹⁸ Walongok'i Yoani watsa nkamba Yoani viy ankum. ¹⁹ Yoani s'aviyinde ape, atum etay e Nkum Yesu djwi woywi: " Wur ajiasu aleyi eli yog to wur emuu?" ²⁰ Ntang emikum wu etay e Yesu watuba wande wuwun: " Yoani Mbotiki atitum vear etay eyie djwi s'oywi: Eli yie wur ekung su aleyii to sikung wur emuu?" ²¹ Ko ne ntang enagn,Yesu avug'avear a nkeang ensign, vear'ikom, n'avear i mpev'ipwo; mbiy angama viy avear akafiyenaka. ²² Mbiy s'akearinde ndindin, "tsogagni, kabagni Yoani viy amiyen gnu na emiyug gnu, vear amibwe viy watikea ngyen, ali n'ikom watinkea nkien, avear a lepere wativug, vear'atiy nkena wayug, edjuu watikea mfutumuka, oshong'owuo, ndelong n'ankea emva. ²³ Oseang ne wur eli, me nkwo ngya ibawu djwina nde." ²⁴ Ntang emikien avear ayitum Yoani, Yesu asakaba olwi o vear anagni djwina Yoani ndindin: " Nge eyitswiki gnu ndir ne dezer? oshung'emog elegnug n'opepe? ²⁵ Mbiy atshi gnu ndir nge? Wur emog emilwer ileam isuu? Yenagni vear ali n'ileam iwuo, mpi walezingi ne bimfwama, wali n'evuru e wankumu. ²⁶ Mbiy nge eyitshwiki gnu ndir? Ngunza? Ee, mokabagni, alenga ngunza. ²⁷ Eli ndug eyifugniwu n'onkean wuwun, Yen ntitum nkab'esiang eme ne ntiang e yie, djwi ayidiki mbug eyie ne nteang eyie. ²⁸ Mokabagni, n'avear ankum emiwur wu n'ankear, kaku wur elenge Yoani. Kansi wur el'imon ileanga n'ekub e Nzeam, ayolenga." ²⁹ Avear ankuma ti avear ayiveyiki ekir'e mpaku wandima wuwun Nzeam ali wuo, mbiy s'atsiwu mvey mbotik'e Yoani. ³⁰ Kansi wafarize na wasikribi wakaleang nkwikila na viy eleang Nzeam djwina wo, watun na mvey mbotik'e Yoani. ³¹ Yesu atuba ndindin avear eshwi e lwene asayere me na nagn? Wali oshin omog ti nagn? ³² Wali kamisi aman akagni n'ondii avear olwi, mbiy watubiki wug na wug wuwun, sitoburagni oshem, okakagnagni. Sitoshwagni lim'asaga, okaleagni. ³³ Djwi Yoani Mobatisi ayii nde, apile mampa ,apignwi viana, mbiy gnu gnu ali ontshung. ³⁴ Mon e wur atiyia, ala, agnwa, mbiy wuwun, Lir, oyshi'onde ko nda, ko gnwa, ewur avear avey ekir'e mpaku, n'avear eli n'epier epwo! ³⁵ Kansi vear watijia wagn'e Nzeam ne mbug aman ande." ³⁶ Fariz'emog avie Yesu djwi watsu nda wape. Yesu ashwe n'evur'e fariz'enagn, s'alikiwu ne mesa wape. ³⁷ Mbal'emog onkear emog e epier'epwo ne wiy'enagn, ntang emijiande nddindi Yesu ala ne mesa n'evur'e fariz'enagn, avara olianga emog etiywe n'ananagn'antsuu, ³⁸ ayia ne mbiy e Yesu, ne nkuu inde. Alie, viey'i viy'ande s'atiangikiwo ne nkuu i Yesu, mbiy s'adjwinde n'awuu ande, apea nkuu i yesu mwah, mbiy s'amwang nde ananagn'ansuu ne nkuu i Yesu. ³⁹ Farize eyiviy Yesu, emiyen nde viy anagn, atuba n'etur'ende ndindin: " Yu wur ene atoyia ngunza s'anajiande oshin oli onkear elokir ene anajiande ndindin ali n'epier epwo." ⁴⁰ Yesu atuba nande ndindin, " Simoni, nde na djwi onkama. Akeara ndindin: " Long, tuba." ⁴¹ Yesu atuba: " Wur emog ashom nde ekiri n'avear ape. Emog ashom nde nkam'itean, emuu ashom otean. ⁴² Wankea ape wakayia n'ekir e mfuta, nkie ekir'enagn atuba ndawo ndindin, atilima vear'enagn ibaya iwo. Na wo wape, nagn esileang wur enagn ensign?" ⁴³ Simoni akeara ndindin: " Ndayen eli wur eyiyii n'ibaya inenen." Yesu atuba nande,"Otituba wuo." ⁴⁴ Yesu akea ntshim etay'onkear'onagn, atuba nda Simoni ndindin: " Oyen onkear'ene; ntiswe n'evur'eyie, onkampea vay answiy nkuu, kansi nde atinswiy nkuu ne vyey'i viy ande, atidjwe n'awuu ande. ⁴⁵ Yie, onkampia mwah, kansi nde, yum k'emishweme, apiseangi na mpea mwah ne nkuu ime. ⁴⁶ Onka mwang vir n'ote ome, kansi nde atimwong ananagn'ansuu ne nkuu. ⁴⁷ Djwina wo, mokabigni mimin, masumu inde ensign etilim djwa ngagn'ende ele eninen. Kansi wur eli na ngaagn e fioti, masum'inde asilim wo ko fioti. ⁴⁸ Mbiy atuba ndi'onkear enagn ndindin: " Masum'iyie etilim." ⁴⁹ Avear eyiki nande ne mesa, watubiki n'itur'iwu wuwun: " Nd'ene ko nagn elelimi masum'ivear ngyan?" ⁵⁰ Kansi Yesu atuba ndi'onkear ewu ndindin: " Lukwikil'eyie etovuga. Tsog na ngemba."