¹ Ntang eyi Yezu mbeama na nzey e Zenezarete, olwi ovear ayiwu mbeama nande djwi wayug otub'e Nzeam. ² Ayen viar ipe ne nkiy, andjag nse wakir djwina nswi eshing ewo. ³ Avean ne dzug i war emuu, ayiwu war e Simoni. Akaba Simoni na mbin war ne kati kati e vay. Agneme, mbiy s'alongikinde olwi avear anagn. ⁴ Ntang emishir nde na ntuba, atuba nda Simoni ndindin, " Bin war ene n'ondii eli ndzig, twamagni eshing egnu djwina ndob nse. ⁵ Simoni okeara ndindin: " Long, sitibug oshing otshuu ofugni, sikadjag ata nse; kansi djwin'otub'oyie ndatwomo oshing." ⁶ Ntang emitwomo nde oshing ne nzey, abin oshing, nse ensing ne tiy, oshing ebanda ngiay n'odzur e nse. ⁷ S'aviy wu iwur iwo eyiyii ne war emuu enagn djwina nsadisa. S'abin wu wayura viar inkeape na nse, viar iwu anadzig wo n'odzur o nse. ⁸ Ntang emiyen Simoni viy anagn, atsandog ne ngie i nkuu i Yezu ndindin: " Nkum, lim ne nteang eme djwi nde wur e masumu." ⁹ Djwi ayug nde womo ensign, ti avear ayiyiki wande, djwina otsin e nse emidzag wu enagn. ¹⁰ Ayiwu otsin omog ti Zaki na Yoani, aman a Zebede, ayiwu nseang emog ti Simoni. Mbiy Yezu atuba nda Simoni ndindin: " Oyayug womo, bana lwo ene, otikum wur eyalobaka vear. ¹¹ Wabin vear enagn ne nkiy, wasakiy vum ankum, wadjie Yezu. ¹² Yezu ayinde ne wiya emog, ntang oyoyen wur e nkeang e lepere, ayia ndog ne nteang ende, oleama ndindin; " Nkum, yu oyaleang, onkeari djung ime wuo." ¹³ Yezu ashima ewuo ende, okir, atuba ndindin: " Ndaleang, djung iyie ikey wuo." Mbal'emog nkeang eshir. ¹⁴ Yezu okaba na nkwon nkaba ata wur, kansi atuba nda nde ndindin: " Tsog, opwi etay e wangunza, pea makabu eyifugni Mose djwin'otsin emikea djung iyie wuo, enagn esayia ntiegn djwina wu." ¹⁵ Eseang ende epagni diaka ensing etay enkuma, mbiy vear s'aleyikiwu olwi n'olwi djwina ngyug otub'ende djwi waviy evug ne wankeang iwu. ¹⁶ Kansi nde aletswikinde ne dezer ndemien djwina nsama. ¹⁷ Eshwi emuu, Yezu apikinde along, wafarize na walongoki i nsiku watigneme, ayim wu wiya inkum i Galilea, i Yudea, na i Yerusaleme. Nzeam ayegnikinde byu ende n'otsin eyivugiki vear. ¹⁸ Mbiy avear amuu wayia, wajie wur emibeam wu ewuo n'ekuu, alovarikiwu ne ntir, alingikiwo washwer wur ewu, akum ne viy a Yezu. ¹⁹ Djwi wakayia n'ondii enshwer wur ewu, s'avian wu n'otwon'evuru djwi vear ayiwu olwiy. Wapeaga itunu n'otwon'evuru, djwina wakiri wur enagn ne kati e vear na ntir ende ne nteang e Yezu. ²⁰ Ntang emiyen Yezu lukwikilu eli n'avear enagn, atuba ndindin: " Ompeam ene, ipwo iyie etilim." ²¹ Wasikribi na wafarize s'atubiwu wuwwun: " Ene nagn ewontwe Nzeam ngian? Nagn esikug ndima ipwo i wur, yu ekayia Nzeam ndemien?" ²² Ntaang emijia Yezu ngindu iwu, atuba ndindin: " Ngindu nge ilignu na wu n'itur'ignu? ²³ Vum nge eliwuo na ntuba, masumu iyie etilim n'ondii entuba yima,kien? ²⁴ Djwi ojiagni gnu gnu mon e wur ali n'ekub endima ipwo i vear , atuba nda wur emibeam wu ewuo n'ekuu, 'ntuba ma yie, vey ntir eyie, yima, tsog evur'eyie.'" ²⁵ Ko ne nteang enagn ayima, ne viy'avear awu, avey ntir eyivurikinde, s'atshwinde evur'ende, alepiyikinde Nzeam lukumu. ²⁶ Vear ankum wayituka, wapea lukumu na Nzeam, na womo n'itur'iwo, watuba wuwun: " Sitiyen lwene viy atotignisu ngien." ²⁷ Ne mbiy ewo, Yezu apwe, ayen wur emog elevey ekir'empaku, dzin'inde Lewi, atigneme ne buro efutawu mpaku. Atuba nande ndindin: " Onsa njii." ²⁸ Lewi asasugni vum ankuma, asodjie. ²⁹ Lewi s'atshwinde ompea vum anda n'evur'ende. Vear amuu n'avear avey ekir'empaku ayiwu ensing, alikiwu wande ne dzug i mesa. ³⁰ Wafarize na wasikribi s'agnikiwu, watuba ti na walongoki inde wuwun: " Djwina nge elagnu, egnagnu ti avear avey ekir'empaku na avear eli n'epier ipwo?" ³¹ Yezu atuba ndawu ndindin: " Epa vear eli na dzug iwuo eli na ngagn e ngien monganga, kansi eli vear eli na nkeang. ³² Nkayia djwin'avear awuo watshimi itura, kansi ayima djwin'avear apwo. ³³ Watuba wa Yezu wuwun: " Walongoki i Yoani na ewafarize waleken okie mbala na mbala, walekiy na bisamu, kansi walongok'iyie wala, wagna." ³⁴ Yezu akiara ndindin: " Iwur i wum asikug wu nken okio ntang eli wum ali ndawu? ³⁵ Nshwi ayayiawu, ayalimawu wum, mbiy ne nshwi inagn waken okio." ³⁶ Yezu akiampea etsig emuu: " Kaku wur etsangiara etay eliam'empa djwina mbeam ipa n'eleam entama. Djwi asoyara nde eleam empa. Etay eyivey nde asinam wu n'eleam e ntama. ³⁷ Kaku wur etsantsug viana ampa n'awungu a ntama, djwi vian'ampa asibwewu awungu anagn, vian'ankum asipayiwu, awungu asitsawu ntu. ³⁸ Kansi atsawu ntshug wu vian'ampa n'awungu ampa. ³⁹ Kaku wur emignwa vian'a ntama, atun vian'ampa mbiy atubi ndindin vian'antama ali wuo."