¹ Ntang emiywe Yezu na Mpeve Santu, akiya eyum nzey e Yordani, mpi Mpeve Santu avara ne dezer ² Satana s'alingikinde mpila ondogo ne mbiy inshwi onign. Akala ata vum ne nshwi inagn inkum, ne mbiy ewu s'ayug nde nzea. ³ Satana atuba nande ndindin: " Yug oli Mon e Nzeam, tuba ya itari ine itshim mampa." ⁴ Yezu akeara ndindin: " Wamifugni, wur apifug ko na mampa." ⁵ Satana ojir dzug, oyegne ikub inkuma i buu. ⁶ Atuba nande ndindin: " Asopeame biyu enkuma na nkembo djwina viy'anagn enkum eli na me mpi ayapeame na wur enkum eleang me. ⁷ Yu omifukama ne nteang eme, enagn enkuma asikum wo eyie." ⁸ Mbiy Yezu okeara ndindin: " Wamifugni, asifukama yie ko ne nteang e Nzeam ndemien." ⁹ Satana okie omvara ne Yerusaleme, otsug ne dzug e Tempelo, atuba nande ndindi: " Yu oli Mon e Nzeam, sianga mpigni, olog ne buu, djwi wamifugni wuwun: ¹⁰ Ayapeande mbug na wa wanzio inde djwi wowum yie; ¹¹ mpi asovarawo ne mbwo djwi ekuu eyie ekata n'atari. ¹² Yezu okeara ndindin: " Wamituba, opikug ndogo Nkum Nzeam eyie." ¹³ Ne mbiy emishir nde nding otsin endogo Yezu, Satana s'atshwinde etey nande djwina nkea nding ntang emuu ewuo. ¹⁴ Ntang emiywende na byu e Mpeve, Yezu akeyinde Galilea, mpi ashongo onde s'apagniwu etitign enagn enkum. ¹⁵ S'akeyikinde ndong ne wa sinagoge mpi avear ankum wokumisa. ¹⁶ Akeyinde ne Nazarete, ondiy oyifwinde, mpi otsin emizigande, ashwe ne sinagoge eshwi e sabata, ayima djwina ntanga. ¹⁷ S'opiyi wo onkeana o ngunza Isayi. Ntang emignamande, ayen ondiy oyifugniwo: ¹⁸ " Mpeve e Nzeam eli ya me, aminkwe vir djwina nkab oshong'owuo n'ankea emva, antum nde djwina mvuga vear ali na mpay n'itur'iwo, djwina mpur vear amitsung wu ne boloko, na ngama viy'avear apiyen, djwina mpuba etshing n'avear ali ngitsung, ¹⁹ djwina nkab'avear mvwe e ngrasia e Nkum." ²⁰ Mbiy s'akiyinde ntsug onkeana ewu s'akearinde na wur otshia, s'akeyinde nkeansi. Viy avear'ankuma eyiyiy ne sinagoge olirikiwo nde. ²¹ Mbiy s'atubinde ndawu ndindin: " Otuba oyifugniwo n'onkeana emiyug gnu ene, etikug luo. " ²² Avear ankuma apikiwo ntiegn'ende, wayituka djwina otuba e ngrasia eyipwiki n'odzum onde, wuwun : " Ene epa mon e Yozefo? " ²³ Yezu atuba ndawu ndindin: " Esiy kaku, ayatubagnu name etsig ene: Monganga, vuga djung iyie yemien; ayatubagnu name wuwu: Viy ayiyug sug olekiy ne Kapernawum, kiewu mpi ne ndien. ²⁴ Akea ntuba ndindin: kansi me mokabagni viaviy, kaku ata ngunza emog etsawu mvey wuo ne buu ende. ²⁵ Mokabagni viaviy, ankear antsakwe ayiwo ensing ne ntang e Eliya, ntang eyitshung nde mvwe n'olung ekie mvw'isar na ngwon isom, nzia eshwe ne buu enkum opfwign. ²⁶ Kansi Nzeam atum nde Eliya ko etay e nsakwe e Sarepeta, ne buu e Sidoni. ²⁷ Wear ankeang e lepere ayiwu entsing n'Israyele ne ntang e ngunza Elizea. Wankum kaku wur eyitiemi djung, ko Namana wur e Siriya." ²⁸ Vear ankum eyiyiy ne sinagoge wayug nkier ntang emiyug wo vi'anagn. ²⁹ S'ayimiwo, wokema ne wiya, wovara ne nsor'ombimi, ondiy eyitung wu wiy'enagn, djwi wobringi ne ngye ombimi. ³⁰ Kansi Yezu alenge ne katikati ewu, akien. ³¹ S'atswinde Kapernayum, ne buu e Galilea, s'alonginde eshwi e sabat. ³² Vear ayitukiwu n'along ande, djwi atubikinde n'ekub enkum. ³³ Ntangu emikum nde ne sinagoge, ayiwu na wur emog ayinde na mpeve epwo, adzamikinde na byu, ndindin: ³⁴ " Ah! Djwi nge alime na wu ma yie Yezu e Nazareta? Otiyia djwina mfung'avear? Ndajia nagn eli yie: Oli Mosantu e Nzeam. ³⁵ Yezu angiang ndindin, " Yia pwo, pwe ne djung i wur ene! Mbiy mpeve ipwo inagn asalogo wur ewu ne kati avear, s'apwinde, akokie ata ipwo. ³⁶ Vear ankuma wayug womo, s'atubikiwu wug na wug wuwun: " Otsin otuba nge ene? Adzama mpev'ipwo n'ekub enkum ti na byu enkum, s'alepwikiwu." ³⁷ Otshongo ende s'apagniwu etitign'enagm enkum. ³⁸ Ntang emipwende ne sinagoge mpi s'atshwinde n'evur e Simoni. Ne tiy, okii ende onkear ayinde na jing byu, s'awigniwu na Yezu asami djwina nde. ³⁹ Ntang emiwur Yezu ne dzug'inde, angianga jing enagn, jing eshir mbal'emog, ayima djwina mpeawu vum'anda. ⁴⁰ Ntang emijie vuna, wavara avear ankeang etin'etin etay e Yezu. S'ayabikinde mbwo wankuma emog n'emog, wankum wavug. ⁴¹ Mpev'ipwo s'apwikiwu ne djung ivear entsing, waletshug elie, wuwun: " Oli Mon e Nzeam! " Kansi nde, alangiangikinde, akapeaka mbug na ntuba, djwi mpev'ipwo ajikiwo wuwun Yezu ali Kristo. ⁴² Ko ne nkeam e vuna, apwe, s'atshwinde ne dezer. Olwi avear walosoling, s'akum wu tii ondii oli nde. Aleangekiwu asayia ndawu, akwon nkien. ⁴³ Atuba ndawu ndindin: " Eyakug wuo djwina me na nkum wear emuu djwina nkabawu etsongo ewuo e ekub'e Nzeam, djwi antum wo me djwina wo." ⁴⁴ Yezu s'alongikinde ne wasinagoge e Yudea.