¹ Eshu emog e sabat, ntangu emitsande nshwe n'evuru e nkum emog e wafarize djwi na nda, wafarize s'olirikiwo oshi okie nde. ² Liraka wur emog eyii djuung imiyam na vay ayia ne nteang ende. ³ Yezu ayue walong i nsiku ti wafarize ndenden: "Eli wuo go epwo na mvuga wur e nkeang eshu e sabat?" ⁴ Wayia pwo wankum. Mby Yezu ashima ewuo, akir wur enagn, ovuga, okeara etay eyim nde. ⁵ Mby atuba nda wo ndenden: "Nagn ne kati egnu, yug mon nde ata ngombe ende atilog n'ipug eshu e sabat, apobin ve?" ⁶ Kaku ata wur eyiikeari djwi ve. ⁷ Ntangu emiyen nde vear amiviewo walegnuni ko nkway i nteang, Yezu s'atubinde nda wo ndenden: ⁸ "Yug wur atovie n'okina, oyagnuna nkway e nteang ve, mbala emuu ne kati egnu eli na wur olenga yie, ⁹ djwi wur eyoviagni akafiyia ntuba nda yie ndenden: "Pea ondii one ya wur ene." Asiyia yie na nsogn djwi na ntsa mvey nkway e mby-mby. ¹⁰ Wuo yug watovie n'okina, otsigneme ne nkway e mby-mby, djwi ntangu esiyia wur enagn, asituba nde ndenden: "Ewur eme, tshwag nteang mpign. Asiyiawo osiang ya yie ne nteang e vear asiyia yie mesa emog ti wo. ¹¹ Djwi wur eleang ko avean, ayokea wo ngie, wur eleang nkra ngie, ayojir wo dzug." ¹² Yezu akea ntuba nda wur eyovii ndenden: "Yug ovie vear na nda n'evuru eyie, ata olio e mbiiy enkum ata olio epiyekwo, oyavie iwur iyie ve, ata atwung ayie ve, ata tea yie ti mea yie ve, ata ankea otsun ali mbeama na yie ve, djwi wo mpi wakovie yie n'okina owo, wakokie ko oshin oyakii yie. ¹³ Kansi ntangu evieyie vear djwi na nda, vie ankea emva, ankea ikom, vear amibuye viy. ¹⁴ Oshin onagn, asiyiayie n'osiang, djwi wapakug n'onkeara yie oshin osakie yie ve, djwi wuo oyie ayokearawo eshu eyakeambiy vear a wuo n'ewa." ¹⁵ Wur emog eyii ti wo ne mesa, ntangu emiyug nde vii anagn, atuba nda Yezu ndenden: "Osiang ya wur eyala n'ekub e Nzeam! ¹⁶ Yezu okeara ndenden: "Wur emog awong olio epiyekwo, avie vear entsign. ¹⁷ Ntangu e nda etikug, atum wur otshia ne ntsa nkaba vear ayivii nde: Yagagni, vii ankum atishir. ¹⁸ Kansi wankum, wur na wur afiling ndolula. Wur enteang ndenden: "Ntishum okwun o ntshia evur, elomo ntsi ndir ondii owo; ondoluli mpayia ve." ¹⁹ Emuu ndenden: "Ntishum ngombe djum, aveari atean ti awum atean; ndetsu, mapii vim a nda, ondoluli mpayia ve." ²⁰ Emuu ndenden: "Ntitsug wear ko ne nshu ine, kaku mpila esiyia me ve." ²¹ Ntangu emikea wur otshia, akaba nkum ende vii anagn ankum. Mby nkum ende ayug nkier, nda wur otshia ndenden: "Kagn ntsa, endii enkum esiyen yie vear n'iyawiya, vey ankea emva, ankea ikom, vear amibuye viy, yag ya wo nendien." ²² Wur otshia ndenden: "Ntikie ko oshin omituba yie, kansi nkway itisashuna." ²³ Mby nkum atuba nda wur otshia ndenden: "Tshwag ne wambug, tear ne mby epeang atiene ane, vear asiyen yie, kabawo waye nshwe, djwi evuru eme ejui to ne vear." ²⁴ Djwi mokabagni, vear ayiviime nteang, kaku ata emog esila olio ome epiyekwo e lwo ene ve." ²⁵ Oluy o vear alekienikiwo ti Yezu. Atshin, nda wo ndenden: ²⁶ "Yug wur atiyia etay eme, yug oshin oleang nde tea nde, ata mea nde, ata wear nde, ata aman ande, ata atwung ande ampeam, ata atwung ande ankear, ata djuung inde ndemie, apikug na ngya longoki eme ve. ²⁷ Wur etun na mvara kulunsi ende, apileang na nsadjie ne mby eme ve, apikug ve na ngya longoki eme ve. ²⁸ Nagn ne kati egnu eli, yug aling ntwung evuru, apitogneme ve na ndir ekri esipur nde, ti oshin osishira nde evuru ewo, ²⁹ djwi akatsug ko itsin evuru mpama, kansi apikug na nshira wog ve, djwi vear ankum asoyen, asoyuewo two, ³⁰ wuwun: "Ali ekar, atibana ko itsin evuru kansi apikug na nshira wog ve." ³¹ Ata vuy nagn eli, yug aling ntsa etuma e mbaagn nda vuy emuu, apitogneme na ndir, isuu i vear awugu djum elinde nda wo, yug asikug nde mbaagn iletsinde nda wur eli na isuu i vear awugu omab? ³² Yug apikug ve, ntangu eli vuy emuu enagn ali ko etey, nde ene, atum ko okiegn ya vuy enagn djwi wasiangi ,baagn, wakii ngagn. ³³ Wog enagn, yug wur emuu ne kati egnu akasafanga vim ankum alinde na wo ve, apikug ve na ngya longoki eme. ³⁴ Owa eli vim e wuo. Kansi yug okwa etishir ntsa ewo, atisiar, asikeara wo ntsa okwa na nge? ³⁵ Asitwomo wo ko nelien, djwi epakum ata mafuba ve ne buu.