¹ Ntangu ene, vear ankum avey ekri e mpaku ti vear ali n'epier epwo wayia mbeama na Yezu na ngyug vii atuba nde. ² Mby wafarize ti walong i nsiku wagnie wuwun: "Wur ene alevey vear ali n'epier epwo, mpi ala nda wo." ³ Yezu s'apiinde etsig ene: ⁴ "Nagn ne kati egnu, yug ali na ameme nkama, emog atitsa ntu, apasianga ameme owua n'iwua enagn n'oshwi djwi na ntsa nkea nding imeme imog imijinga, tii ko esoveande? ⁵ Ntangu esoyen nde, asitsug nde imeme iwo ne nsiam apag n'osiang onkum. ⁶ Esikum nde n'evuru, asiviende iwur inde ti vear opeang ali mbeama na nde, nda wo ndenden: 'Yiagni n'osiang kamsi me, djwi ntikea ngyen imeme ime iyiitsi ntu.' ⁷ Mokabagni, osiang asiyiawo oshin omog ne dzug djwi na wur e masumu emog yug atitshima etura, elenga osiang e vear a wuo owua n'iwua, djwi wo kaku mfunu esifitshima wo itura iwo ve. ⁸ Onkear nagn eli, yug ayikinde n'ekri ende akutu djum, ikutu imog etsi ntu, apasiama mwinda, apakom evuru djwi awung nding, tii ko esikeande ngyen ekri enagn? ⁹ Mby ntangu esiyen nde, avii iwur inde ti vear opeang eli mbeama na nde, nda wo ndenden: "Yiagni n'osiang kamsi me, djwi ntikea ngyen ikutu ime iyitsi ntu." ¹⁰ Mokabagni, osiang asiyiawo oshin omog, osiang ne nteang e banzio i Nzeam djwi wur emog e masumu atitshima etura. ¹¹ Mby Yezu akea ntuba ndenden: "Wur emog ayiinde na aman ampeam ape. ¹² Eyii ilieng atuba nda tea nde: "Tea, ompii ikab ime otsun. Tea nde akie akab a vim ande, opea. ¹³ Ne mby i nshu, okwom s'avey nde vim ande ankum, akien buu emuu, etey, mpiog, vim ande ankum s'ashir wo, djwi apiy nde vim awo na kinduma elekiikinde. ¹⁴ Ntangu emishira nde vim ande ankum, nziya e biu s'ashwi wo ne wiya enagn, akea ngyug ngagn e vim amipiy nde. ¹⁵ S'atsinde nkum wur otshia e wur emog e nkea wiya enagn, opiinde otshia e ndir wamvuy inde nivur. ¹⁶ Alelingikinde ale ata vim ayilike wamvuy, kansi akaveaka wur esopea wog ve. ¹⁷ Ilieng ompeam enagn ntangu emikeande nkana, atuba ndemie ndenden: "Vear otshia kwe eli etay e tea me, wala, vim asashuna, kansi me nendien, ndewe ko na nziya! ¹⁸ Ayayima me, ayatsame etay e tea me, ayokaba me memen: 'Tea, ntikie masumu ne nteang e Nzeam ti ne nteang eyie, ¹⁹ mpikug diaka ve wamvii me mon yie, omvey kamsi wur eyie otshia.' " ²⁰ S'ayiminde, atsa etay e tea nde. Ali ko etey, ntangu emoyen tea nde, oyug ngy, s'akim nde iveang, atsa ndog ne nking e mon nd, opea mwa. ²¹ Mon atuba nda tea nde ndenden: "Tea, ntikie masumu ne nteang e Nzeam ti ne nteang eyie, mpikug diaka ve wamvii mon yie." ²² Kansi tea atuba nda vear otshia ndenden: "Yagagni eveang-eveang n'eleama e wuo-wuo enagn, lweragni nde, lweragni nde ti epete n'epign, ti antwum ne nkuu. ]v 23 Yagagni na ngombe e vir-vir enagn, djagagni nde, silagni, siyiagni n'osiang! ²⁴ Djwi mon me ompeam ene awinde, atikea ne luzingu. Atsinde ntu, sitokea ongyen." Mby s'ayenikiwo osiang owo. ²⁵ Mon nde ompeam intsuru atsinde evur. Ntangu emikea nde, emikum nde mbeama n'evuru, ayug oshuru o vear wakagn. ²⁶ Avie wur otshia emog, ojue djwi nge emipwe. ²⁷ Wur otshia okaba ndenden: "Okwom yie atikea, mby tea yie atodjaga ngombe e vir-vir enagn, n'oshin omikeande ongyen na djuung i wuo." ²⁸ Jii nde s'ayug nde nkier, akaleang nshwe ata n'evuru ve. Tea nde apwe nelien, aleang mon djwi ashwi n'evuru. ²⁹ Mon atuba nda tea nde ndenden: "Ndekii otshia etay eyie nendien mvwe na mvwe, ntopiy ata otuba oyie ve. Kansi kaku eshu emimpea yie ata ngombe ve na nda ti iwur ime, siyii n'osiang. ³⁰ Mon yie ndean atiyia, nde wur emitsampiy vim ayie etay e ankear a nduma, otodjaga ngombe e vir-vir." ³¹ Tea okeara ndenden: "Mon me, oli ya me ntangu enkum. Vim ankum alime na wo, eli eyiyie. ³² Kansi wuo sile, siyii n'osiang, djwi okwom yie eyen yie ene, awinde atikea ne luzingu, atsinde ntu sitokea ongyen."