¹ Ne ntangu enagn, vear amuu ayiike kog okabikiwo vii vii ayileg ya vear a Galilea, Pilato adjag nde mby s'atshib nde aluung awo ondii omog ti empeab eyiikiwo. ² Yezu akeara ndenden: "Gnu, obansagni gnugnun vear anagn wali na masumu ilenga vear amuu ankum a Galilea n'oshin oyadjag gnu enagn? ³ Kaku ve, mokabagni! Kansi gnu, yug okatshimagni itura ignu ve, ayawagnu ko oshin omog. ⁴ Ata vear djum n'iniani eyiwi ntangu eyivbui evuru eninen e Siloe, obansagni gnugnun wo wamikie ipwo ilenga vear ankum a Yeruzalem? ⁵ Kaku ve, mokabagni! Kansi gnu, yug okatshimagni itura ignu ve, ayawagnu ko oshin omog." ⁶ Akea mpea etsig ene: "Wur emog ayiinde n'oshung o nsuu eyiifuy nde n'evur ende. Atsa ndeir eshu emuu yug oshung owo emita, kansi akayen ata vim ve. ⁷ Mby s'akabinde wur ekie n'evur enagn: 'Yen mvwe isar itikug, yim ko eyiifuy me oshung one, yug ntiyia ndir, epite nsuu ve. Bag oshung owo, djwi kaku vim ekiewo n'evur ve.' ⁸ Wur ekie n'evur akeara ndenden: 'Nkum, tokea ndir ko mvwe ene; ayatsum me n'itsin iwo, ayatsug me mafuku. ⁹ Mbala emuu ne nshu ileye, ayatawo; yug kaku mby obag.' ¹⁰ Eshu emog e sabat, Yezu alongikinde along ne sinagoga. ¹¹ Neti, ayiiwo n'onkear emog ayiinde na mpeve epwo, amifeme n'okwongo, amikie mvwe djum n'iniani, apikug nkea ntshima okwongo ve. ¹² Yezu ntangu emoyen nde, oviye, ndenden: "Onkear one, otivug n'ekom eyie." ¹³ Oyab mbwo n'ote, ko ntangu enagn okwongo eshim, s'akearinde Nzeam lokumu. ¹⁴ Kansi nkum e sinagoga, na nkier djwi n'oshin omivuga Yezu onkear onagn eshu e sabat, atuba nda oluy o vear anagn ndenden: "Sili na nshu isom inkie otshia. yagagni nshu inagn djwi wovugagni na wankeang ignu, kansi epa eshu e sabat ve." ¹⁵ Yezu akeara ndenden: "Ankea eyang ene! Nagn ne kati egnu eli eshu e sabat apitsimpuba ngombe ende, ata mpunda ende n'oshing djwi opii vay a gnua? ¹⁶ Mby onkear one wur eli mon Abrama, satana ndean amotshung mvwe djum n'iniani, mpokug n'ondima n'eshing enagn ve djwi n'eshu e sabat?" ¹⁷ Ntangu eyitubikinde vii anagn, oluy o vear ayitunike wafiyia n'osiang, djwi aleangikiwo vim ankum alekikinde, wambeni inde s'ayiwo na nsogn wankum. ¹⁸ Yezu akea ntuba ndenden: "Ekub e Nzeam eli kamsi nge, asiyer me na nge? ¹⁹ Eli kamsi ebeam e seneve, wur atitwomo n'evur ende, ebeam enagn etifuye, etikum oshung, wamfuru ne dzug waleye mpier n'atab ande." ²⁰ Akea ntuba ndenden: "Asiyer me ekub e Nzeam na vim nge? ²¹ Eli oshin omog ti ete e mampa, onkear ativey atitsug n'akop a fufu emitsug nde ne vay djwi poto-poto ekum entsign." ²² Yezu alelongikinde ne viya inen ti viya ikieg ne mbug eletsikinde Yeruzalem. ²³ Wur emog ayia ntuba ndenden: "Nkum, eling ntuba wuwun ko isuu i vear fioti ayavug wo?"Mby akeara ndenden: ²⁴ "Kiagni biu na nshwe n'epfug ekieg, mokabagni, vear entsign ayaling wo ashwi kansi wapakug ve. ²⁵ Ntangu eyayima nkea evuru, eyashwende, mby asatshung epfug, gnu, ntangu eyasagnu tsuga nelien, osakokolagni, gnugnun: "Nkum, nkum, otengami epfug!" Nde, asokearagni nde ndenden: "mpijia etay eyim gnu ve." ²⁶ Mby osatubakagni gnugnun: "Alisu, agnuisu ne nteang eyie, atelong yie n'iyawiya isu." ²⁷ Mby nde, asikeara nde ndenden: "Mokabagni, mpijia etay eyim gnu ve; limagni nendien gnankum, vear otshia apwo!" ²⁸ Kog, ayasawoyia ko aluu ti agnere n'akagu, ntangu eyayen gnu Abrama, Izaka ti Yakob, na wangunsa inkum, n'ekub e Nzeam, kansi gnu, ayotwomagni wo nelien. ²⁹ Vear ayayiawo, wayim etay epwe vuna ti etay elog vuna, ayim etay e dzug ti etay e ngie, ayayiawo nda ne dzug i mesa ekub e Nzeam. ³⁰ jiagni gnugnun vear a nteang ayakum wo vear a nsuka, mpi vear a nsuka ayakum wo vear a nteang." ³¹ Etean kaku, wafarize wayia ntuba wa Yezu wuwun: "Lim nendien, tshwag, djwi Erodi aling n'ondjag yie. ³² Akeara ndenden: " Tshwag, kabagni okieng enagn, me mean ndekmi ensthung, ndevugi vear ankeang ti lwo ti nampign, eshu otatu ayashira me. ³³ Ekug nkien lwo, nampign ti eshu emuu eleye egni; djwi epikug ve djwi na ngunsa awe nelien e Yeruzalem. ³⁴ Yeruzalem, Yeruzalem, yie, oledjag ko wangunsa; vear alotumiwo, olabug atari. Atsame nding mbala na mbala, ntsug aman ayie ankum ondii omog, kamsi nkogo abub aman ande ne ngie apabu ande, kansi gnu opileangagni ve. ³⁵ Evuru egnu wean emisatsuga. Ntuba ma gnu, opafingyenagni ve, tii ko eshu eyatubagnu: 'Lokumu ya wur eleye ne dzin i Nkum.' "