¹ Opeane, ntangu elekienike Yezu, ayen wur emog emibuye viy yim ko eyowur wo. ² Walongoki inde woyue: "Rabbi, wur nagn eyiiki disumu djwi mon ene wowur viy ngibuye, tea nde go mea nde?" ³ Yezu akeara: "Epa nde, go vear ayowur wamikie disumu ve, kansi djwi wayen etshia e Nzeam ne kati ende. ⁴ Opeane sili mbiiy enkum, ekug wuo nkii etshia e wur eyintum, otshu ewean eleye, kaku wur esifikug nkie otshia ve. ⁵ Ntangu elime ne buu, ndi mwinda e buu." ⁶ Ntangu emishir ntuba Yezu vii anagn, atwomo asuy ne buu, akie poto-poto na asuy anagn. Akwe poto-poto iwo ne viy a wur enagn. ⁷ Atuba nda nde: "Tshwag oyog ne zanga e Silowe (dzin ine ekab wuwun: watotum). Wur ewo mpi atsa ngyog, elekeyikinde, ayen yele. ⁸ Vear opeang eli mbeama na nde, ti vear amuu ayoyenike ntangu elewigniki nde, wuwun: "Ene, epa wur eyignemike nendien, elewignike?" ⁹ Amuu wuwun: "Eli ndug." Amuu wuwun: "Epa nde, kansi atomwegn ko nde." Kansi nde ndemie ndenden: "Eli mug." ¹⁰ Watuba wa nde: "Mby viy ayie atingam oshin onkagn?" ¹¹ Akeara ndenden: "Wur eviewo Yezu, amikie poto-poto na buu, s'ankwinde ne viy. Mby amintum ndenden: 'Tshwag oyog ne zanga e Silowe. Mitsa ngyog mpi, otshwag emiyen me." ¹² Watuba wa nde: "Wur ewo ando?" Akeara ndenden: "Mpijia." ¹³ Wavara wur eyike viy ngibuye etay e wafarize. ¹⁴ Ayiwo eshu e sabat, eyiiki Yezu poto-poto eyingami nde viy a wur enagn. ¹⁵ Wafarize wokea ongyue oshin onkagn emikeande ngyen. Akaba ndenden: "Ankwinde poto-poto ne viy, mitsa ngyog mby s'amiyen me." ¹⁶ Mby wafarize imuu wuwun: "Wur ene apa ayim ya Nzeam, djwi apilemfuki n'eshu e sabat ve" Amuu wuwun: "Oshin onkagn wur e masumu asikug nde nkie bidimu oshi one?" ¹⁷ Wakum akab-akab ne kati ewo. Wakea ngyue wur enagn: "Djwi na yie, otuba yiyen nge n'oshin emongama nde viy?" Wur eyii viy ngibuye akeara ndende ali ngunsa. ¹⁸ WaYuda wakakwikila ve wuwun wur enagn ayikinde viy ngibuye, mby s'atshiwo mvie tea nde ti mea nde. ¹⁹ Wayue wuwun: "Ene eli mon gnu, otubagni gnugnun owur wo ko viy ngibuye? Mby oshin onkagn emikeande ngyen opeane?" ²⁰ Mby tea nde ti mea nde wakeara wuwun: "Sijia eli mon su, owur su viy ngibuye. ²¹ kansi djwi na oshin omikeande ngyen, sipijia, ti wur emongama viy ko sipijia ve. Yueangi nde ndemie, ali ebuu intsuru, asokabagni nde vii ande ndemie." ²² Tea ti mea nde atubiwo oshin onagn djwi alurikiwo waYuda. Djwi waYuda awong wo wuwun yug wur emog amijia ko ndende Yezu ali Kristu, asokma wo ne sinagoga. ²³ Wog enagn tea ti mea nde atubiwo wuwun: "ali ebuu intsuru, yueagni nde ndemie." ²⁴ Wafarize wakea mvie wur enagn mbala ozole, wa nde wuwun: "Pea lokumu ya Nzeam, djwi su, sijia wur enagn ali wur e masumu." ²⁵ Mby akeara ndenden: "Yug ali wur e masumu, mpijia ve, kansi ndajia ko vim imog, eli, ayiikime viy ngibuye, opeane ntikea ngyen." ²⁶ Mby watuba wa nde: "Vim nge eyokinde? Oshin onkagn eyongami nde viy?" ²⁷ Akeara ndenden: "Ntokabagni, opiyugagni ve! Djwi na nge eling gnu nkea ngyug diaka? Ti gnu, olingagni okumagni walongoki inde? ²⁸ Wotwe, wuwun: "Eli yie wur eli longoki ende. Su, sili walongoki i Moize. ²⁹ Sijia, Nzeam atubinde ya Moize, kansi wur ene, sipijia ata etay eyim nde." ³⁰ Wur enagn akeara ndenden: "Eli ngituka yug opijiagni etay eyim nde, kansi nde, ndean atingama me viy. ³¹ Sijia, Nzeam apitsi ngyug bisamu i vear a masumu, kansi yug wur alemfuka ya nde, akie ko vii aleang nde, mby ayug bisamu inde. ³² Yim ko eyibani buu, sitoyug ve wur angami viy a wur eyiwur wo ngibuye viy. ³³ Yug wur enagn akwon ngyim ya Nzeam, apinakieaka ata vim. ³⁴ Wokeara wuwun: "Yie wur emiwur wo ne kati e masumu, otelong su!" Mby s'okmi wo. ³⁵ Yezu ayug watikma wur enagn, ntangu eyisangi nde nda wur ewo, oyue: "Okwikila ya Mon e Nzeam?" ³⁶ Akearandenden: "Nkum, nagn eli Mon e nzeam ewo djwi me m'odjir nde?" ³⁷ Yezu atuba nda nde: "otoyen wur etuba nde yie ene, eli ndug." ³⁸ Wur enagn akeara: "Nkum, ndakwikila", mby sofukimini nde. ³⁹ Yezu atuba ndenden: "Ayime ne buu ene djwi na mbag ewu, djwi vear apiyen wayen, mby vear ayen wabuyi viy." ⁴⁰ Wafarize imuu iyike wa nde, ntangu emiyug wo vii anagn, watuba wa nde: "Ti su, sili viy ngibuye?" ⁴¹ Yezu nda wo ndenden: "Yug otoyiagni viy ngibuye, opina yiakagni na masumu ve. Kansi gnu ntangu ene, otubagni gnugnun: 'Siyen.' Wog enagn osatsugagni ko ne kati e masumu.