¹ "Vi-a-vii, vi-a-vii, mokabagni, wur epashwe n'epfug opeang ameme, kansi aletsu mvean etay emuu, ali nkea wumu ti wur epwo. ² Kansi wur eshwe n'epfug ali nkea ameme. ³ Wur elir epfug asangama nde, mby ameme wayug otuba onde, asiviende ameme ande ne vin awo, mby apur nelien. ⁴ Ntangu esipur nde ameme ande nkeanga nde nelien, mby alekienike nteang ewo, ameme walosodjii djwi wajia otuba onde. ⁵ Wapasadjie ongingien ve, kansi asikim wo etey na nde, djwi wapijia otuba angingien ve." ⁶ Yezu apea etsig ene kansi wakajia vii awo ayiitubikinde nda wo ve. ⁷ Mby Yezu akea ntuba nda wo: "Vi-a-vii, vi-a-vii, mokabagni, me ndi epfug opeang ameme. ⁸ Vear ankum ayii nteang eme wali ankea vimu ti vear apwo, ameme wakayug wo ve. ⁹ Me, ndi epfug. Wur esishwe ya me asivug nde. Asishwe nde, mpi asipwe nde, asiyen nde adjiu asila nde. ¹⁰ Nkea wumu atsande ngya ko djwi na nkama, djwi na mbag nking, djwi na mpiy; me, ayiime djwi ameme wayii na luzingu, wayii na luzingu entsign. ¹¹ Me, ndi wur e wuo elir ameme. Wur e wuo elir ameme atsande mpea luzingu ende djwi n'ameme ande. ¹² Kansi wur epwo epa eli nkea ameme ve, ntangu esiyen nde nkuy aleye, asasianga ameme, alur; mby nkuy asakuma asapagna ameme. ¹³ Wur epwo enagn asisande sianga ameme djwi ali wur otshia epwo, apiyen ata mpay djwi n'ameme ve. Me, ndi wur e wuo elir ameme. ¹⁴ Ndajia ameme ame, wo mpi wanjia, ¹⁵ oshin oli Tea anjia, me mpi ndajia Tea, atsame mpea luzingu eme djwi na ameme ame. ¹⁶ Ndi na ameme amuu epa wali n'opeang ene, ameme anagn, ekug wuo mavari , ayayug wo otuba ome, mby ayayiawo ko itwung imog, ti wur emog elir. ¹⁷ Tea antsande ndeang me, djwi atsame mpea luzingu eme, djwi nkey mvey wog. ¹⁸ Kaku wur esinkuma wog ve, kansi atsame mpea luzingu eme nkeanga me; ndi n'ekub e mpea luzingu eme, ndi n'ekub e nkeamvey wog. Enagn eli nswa eyivey me ya Tea me." ¹⁹ Ko n'otuba onagn, waYuda wakea nkum akab-akab. ²⁰ Vear entsign ne kati ewo wuwun: "Ali n'etwon, ali n'ifara, djwi na nge eleyug gnu vii ande?" ²¹ Amuu wuwun: "Enagn epa otuba etwon ve, etwon asikug nde ngama viy a wur ayii ngibuye?" ²² Ayiwo ne ntangu e mpio (Hiver), ne Yeruzalem ayiwo n'okina e (dedicace). ²³ Yezu alekieniki nde ne tempelo, ne ngie epfug e Salomoni. ²⁴ Mby waYudawodjing, wa nde wuwun: "Tii nsuka nonkagneyatsugaka su esiy djwi na yie? Yug oli Kristu, otekabi." ²⁵ Yezu atuba nda wo ndenden: "Ntokabagni, kansi opidjiragni ve. Etshia elekii me ne dzin i Tea me elapea ntiegn djwi na me. ²⁶ kansi gnu, opidjiragni ve, djwi epa olagni ameme ame ve. ²⁷ Ameme ame atsawo ngyug otuba omendajia wo, wo mpi walesendji me mby. ²⁸ Atsame ampea evug e mvwe na mvwe; wapawa ve, kaku ata wur eyasakuma n'ewuo eme ve. ²⁹ Tea me eyiimpi ameme ane alenga vear ankum n'onen, kaku ata wur esikug na nkuma wo n'ewuo e Tea me ve. ³⁰ Me ti Tea me sili ko wur emog." ³¹ Mby waYuda wakea mvey atari djwi wobug awe. ³² Yezu akeara: "Moyegnagni etshia e wuo entsign eyim ya Tea me. Djwi n'otshia onkagn eling gnu mbug me atari?" ³³ WaYuda wuwun: "Silobug atari epa djwi n'etshia e wuo ve, kansi djwi otituba epwo ya Nzeam. Djwi yie wur, otuba yiyen otikum Nzeam." ³⁴ Yezu akeara ndenden: "N'onkeana egnu e nsiku wamifugn wuwun: "Atubime: 'Olagni wanzeam?' " ³⁵ Yug n'onkeana e nsiku, eli vii a masonama epikug ngwa ve, aviinde 'wanzeam' vear ayipinde otuba o Nzeam, ³⁶ mby djwi na wur eyisakumuni Tea, eyitum Tea ne buu, otubagni gnugnu alatwe Nzeam djwi emituba me: "ndi Mon e Nzeam?" ³⁷ Yug mpikii otshia e Tea me ve, oyakwikilagni ya me ve. ³⁸ Kansi yug ndakie wog, ata opidjiragni ya me ve, djiragni ko djwi n'etshia ene, djwi ojiagni gnugnun Tea ali ne kati eme, me ndi ne kati e Tea. ³⁹ N'otuba onagn, wakea nding diaka oshin ontshung nde, mby s'apfuy nde ne mbwo iwo. ⁴⁰ Akea ntsa ne nky e Yordani, n'ondii eyipike Yoane mbotika, s'asande tsuga mpiog. ⁴¹ Vear entsign s'ayiiwo etay ende, wuwun: "Yoane akakie ata kidimu emog ve, kansi vii ankum ayiitubike Yoane djwi na wur ene, eli vi-a-vii. ⁴² N'ondii onagn, vear entsign s'akwikiliwo ya nde.