¹ Wur emog, dzin inde Lazare, alognde na nkeang. Ayum nde Betani, wea e Maria nda otwung onde Marta. ² Eli Maria eyimwang Yezu ananay a nsu, mbiy eyikey ndjwe nkuu i Yezu na awuu ande, nkignam nde Lazare wur eyi na nkeang. ³ Atwung a nkear s'atum wo wur nkaba Yezu wuwun : " Nkum, yen wur etsayie ndeang ali na nkeang." ⁴ Ntangu emiyug Yezu vii anagn atuba ndenden : " Nkeang ewo epa esoveara n'ewa ve, kansi eli djwi na nkembo e Nzeam, djwi mon e Nzeam avii nkembo ende ne mbug e nkeang ewo. ⁵ Djwi Yezu aleangiki nde Marta na otwung onde onkear ti Lazare. ⁶ Yo yina, ntangu eyiyugnde ndenden Lazare atilog na nkeang, afikeankie ntshuu ipe n'ondii oyikinde. ⁷ Mbiy, s'atubinde nda walongoki inde ndenden : " Sikeagni buu e Yudea." ⁸ Walongoki s'atubiwo na Yezu : "Kaku etean ve Wayuda alelingikiwo n'ombug yie atari, kansi oleang ko nkea mpiug ! ⁹ Yezu akeara ndenden : nge n'eshuu emog epitsu ngya na ntangu djum n'ipe ve ? Yug wur emog alakien mbii enkum apalog ve djwi ayen mwinda e buu ene. ¹⁰ Kansi wur elekien otshuu onkum, asilognde djwi mwinda kaku yande. ¹¹ Ne mbiy otuba onagn, atuba nda wo ndenden : "Ewur esu Lazare ativur, kansi asobeyame. ¹² Walongoki wa nde wuwun : " Nkum, yug ativur, asivugnde." ¹³ Yezu atubinde djwi n'ewa e Lazare, kansi wo, abansiwo wuwun atuba djwi na lwong. ¹⁴ Mbiy Yezu s'akabinde wuo wuo ndenden : " Lazare atiwa. ¹⁵ Djwi na gnu, djwi okwikilagni, nde n'osiang n'oshin okayiame ne tii ve. Nswagni etay ende. ¹⁶ Toma eyivikiwo Didime, atuba nda walongoki imuu ndenden : " Nso so ko siwagni ti Yezu." ¹⁷ Ntangu eyikum Yezu, ayen Lazare wamopfugn n'alum etikie nshuu inign. ¹⁸ Betani ayiwo mbeama na Yeruzalem, etitign e kilometele isar. ¹⁹ Wayuda entsign ayiwo ndir Marta na Maria djwi n'ewa e nkignam wo. ²⁰ Ntangu emijia Marta ndenden Yezu atikum, atsa nsanga ti nde, Maria asagneme n'evuru. ²¹ Marta atuba nda Yezu ndenden : " Nkum, yug otoyia nendien, nkignamme apinawaka ve. ²² Kansi me ndajia memen vim enkum esiwignayie ya Nzeam, asopeande." ²³ Yezu okeara ndenden: " Nkignam yie asibey nde n'ewa." ²⁴ Marta okeara ndenden : " Ndajia, ayakeande mbey ntangu eyabey vear amiwa n'eshuu ensuka." ²⁵ Yezu atuba na nde ndenden : " Me, nde lufutumuku ti luzingu. Wur esidjir ya me, asivugnde ata atiwa ; ²⁶ mpi wur esivug mpi esidjir ya me, apafiwa ve. Odjir vii anagn ?" ²⁷ Marta nda Yezu ndenden : Ee, Nkum, ndadjir memen oli Kristu, Mon e Nzeam, eyitubiwo wuwun aleye ne buu. ²⁸ Emishirnde ntuba, Marta akien. Atsamvie otwung onde Maria n'oziy ndenden : "Longi ali nendien mpi alovie". ²⁹ Ntangu emiyug Maria otuba onagn, ayima eviang eviang mbiy s'atswinde etay e Yezu. ³⁰ Yezu ayiwo atoshwi ne wiya ve, ali ko n'ondii oyoyen Marta. ³¹ Wayuda eyiki ti Maria n'evuru, ntangu emoyen wo atiyima eveang eveang, atipwe, wosodjie wuwun aletsu ndiye n'alum. ³² Ntangu emikum Maria ondii oli Yezu, mpi emoyen nde, alog ne nkuu inde, atuba na nde ndenden : " Nkum, yug otoyia nendien, nkignam me apinawaka ve." ³³ Yezu, ntangu emoyen nde aliye, na Wayuda imiyia wa nde, ayug ngiy n'etura ende. ³⁴ Mbiy atuba ndenden : "Otopfugnagni nonkagn ?" Wokeara wuwun ; "Nkum, yag oyen." ³⁵ Yezu aliye. ³⁶ Mbiy Wayuda wuwun : " Yenagni oshin oleangikinde Lazare entsign." ³⁷ Kansi amuu ne kati ewo watuba wuwun : " Nde wur eyingami viy a wur eyikayenaka, apinakiaka ve ko wur ene akwon ngwa ?" ³⁸ Yezu akea ngyug ngiy, mbiy s'atswinde n'alum. Ayiwo ondii oli atari, watitsug itari imog ne mbwung ewo. ³⁹ Yezu ndenden : " Limagni itari ine." Marta, nkignam e wur emiwa, akeara ndenden : " Nkum, atibana mpwe nsuu, djwi etikie nshuu inign elinde kog." ⁴⁰ Yezu atuba na nde ndenden : "Nkatuba ma yie memen yug omidjir, asiyen yie nkembo e Nzeam?" ⁴¹ Mbiy s'alimiwo itari iwo. Yezu aseang viy dzug, atuba ndenden : "Tea, mokeara nsag na viye djwi otingyug. ⁴² Djwi na me, ndajia, yie antsayie ngyug ntangu enkum, kansi yug ntituba ngean, eli djwi n'olwi o vear amidjing ene waji wuwun eli yie wur eyintum." ⁴³ Emishirnde ntuba vii anagn, adzama n'otuba o biuu : " Lazare, pwe !" ⁴⁴ Odjuu apwe, nkuu na mbwo ngitshung n'ileam ; ye mpi watodzub eleam tii n'elung. Yezu nda wo ndenden : Pubagninde, seangagninde akien." ⁴⁵ Wayuda entsign eyindir Maria, emiyen wo vii anagn amikie Yezu wadjir ya nde. ⁴⁶ Kansi amog amog ne kati ewo watsa ngyen Wafarize, wakaba vii ayikii Yezu. ⁴⁷ Ankum a wanganga-Nzambi na wafarize washwe mfug, wuwun : " Sikiagni esinge? Djwi wur ene alekii bidimbu entsign. ⁴⁸ Yug simoseangagni akiiki, vear ankum asidjirwo ya nde, vear a Roma asiyiawo mpiy na wiyasu enen ene, na buu esu." ⁴⁹ Emog ne kati ewo, dzin inde Kaifa, ayinde nkum e wanganga-Nzambi ne mvwe enagn, atuba ndenden : " Opijiagni ata vim emog ve. ⁵⁰ Opiyenagni ne waagni egnu gnugnun wuo wur emog awe djwi na vear ankum, djwi vear ankum wakwon ngwa." ⁵¹ Enagn, akatuba vii ayum n'etura ende ndemie ve. Kansi djwi ayinde nkum e wanganga-Nzambi ne mvwe enagn, abikula ndenden ekug Yezu awe djwi na vear a buu. ⁵² Ekayia ko djwi na vear a buu ve, ayiwo mpi djwi na nkea ntshib aman a Nzeam ayipagn etay n'etay wakei wur emog. ⁵³ Yim k'eshuu enagn, s'alelingikiwo oshin osidjag wo Yezu. ⁵⁴ Wog enagn, Yezu akafileangaka mpwe n'endii eli Wayuda ve, alim nde, s'atswinde ne buu enzum, ne wiya eviewo Efraim. S'asandetsiga nda walongoki inde mpiug. ⁵⁵ Okina o Pake e Wayuda ayiwo etikum pipi. Vear entsign e buu ewo atswiwo Yeruzalem ne nteang e Pake djwi na nsuy djung iwo. ⁵⁶ S'alelingikiwo Yezu, watuba wog na wog ne tii evuru e Nzeam wuwun: " Oyenagni esinge ? Asiyiande okina go apayia?" ⁵⁷ Djwi ankum a wanganga-Nzambi na wafarize akabiwo vear wuwun wur ejia ondii olinde akab djwi wotshung.