¹ Nshu isom ne nteang okina o Pake, Yezu akum ne Betania, ondii oyike Lazare eyibiyinde n'ewa. ² Wopea olio epiekwo enagn, Marta wur eyapiike vim anda, Lazare mpi ayinde ti vear ayii wa Yezu ne dzug i mesa. ³ Maria avey oleanga ananagn a nsuu, eli isuu i dzug, litele emog na ndamu, akwe ne nkuu i Yezu mby akea ndjuwe nkuu iwo na awuu ande.Evuru eyuo na nsuu ananagn. ⁴ Longoki ende emog dzin inde Yudasi Iskariotimon e Simoni, wur eyii afwete onsar nde, atuba ndenden: ⁵ "Djwi na nge ekasar gnu ananagn a nsuu ene ne nkam isare ekri djwi wapii ekri enagn ya emva?" ⁶ Atubikinde ngean, epa djwi ayinde na ngy emva ve, kansi djwi ayinde nkea wumu, n'oshin oyikirikinde iteang ekri, aleveyikinde ekri eyitsugikiwo neti. ⁷ Mby Yezu atuba ndenden: "Sianga nde awum ananagn a nsuu ene djwi eshuu eyampfugn wo n'aluma. ⁸ Emva, olagni ti wo nshuu inkum, kansi me, epa ndi ma gnu nshuu inkum ve." ⁹ WaYuda entsign wayug wuwun Yezu ali ne Betania, s'ayiiwo, epa ko djwi na Yezu ndemie ve, kansi ayiiwo mpi djwi wayen Lazare eyibiyinde n'ewa. ¹⁰ Ankum a wanganga-Nzambi s'akaniwo mpi na ndjag Lazare; ¹¹ ko djwi na nde, mby waYuda entsign wakum nkwikila ya Yezu. ¹² Mpimpign enagn, oluy o vear ayii okina wayug wuwun Yezu aletsu Yeruzalem, ¹³ wavey veang ava, watsa ne nteang ende, wadzama wuwun: "Hozana! Osiang ya wur eleye ne dzin i Nkum, Vuy e Israel!" ¹⁴ Yezu ayen imon i mpunda emog, akwuna ne dzug inde n'oshin oyifugn wo n'enkeana: ¹⁵ "Mon onkear e Sioni, oyayug womo ve, yen, Vuy ndean aleye, atigneme nimon i mpunda." ¹⁶ Walongoki inde wakatojia vii awo ve, kansi ko ntangu eyivey Yezu nkembo ende, s'ayiwo nkana wuwun vii ane afugn wo djwi na nde, mpi vii awo watikie ya nde. ¹⁷ Vear ankum ayii ti Yezu ntangu eyiiviinde Lazare n'aluma, mpi eyobiyinde n'ewa, alekabikiwo ntiegn i vii ande. ¹⁸ oluy o vear anagn s'ayiiwo ne nteang ende djwi na kidimu eyiiyug wo eyiikinde enagn. ¹⁹ Wafarize s'atubikiwo wog na wog wuwun: "Oyenagni, kaku ata vim esifiveagnu ve, oluy o vear ane ankum wean watikum ne mby ende." ²⁰ WaGreki imuu ayiiwo ne kati e vear ayii nsama n'okina e Pake. ²¹ Vear ane watsa etay e Filipu e Betsaida ne buu e Galilea, watsug inaagn wuwun: "Nkum, siling sitoyen ko Yezu." ²² Filipu atsa nkaba Andre; Andre ti Filipu s'atshiwo nkaba Yezu. ²³ Yezu akeara ndenden: "Ntangu eikug, esivey Mon-wur nkembo ende. ²⁴ Vi-a-vii, v-a-vii, mokabagni, yug nkeni antu etilog ne buu ekawa ve, asisatsuga nde ko ndemie; kansi yug emiwa, asipur nde mbeam entsign. ²⁵ Wur eleang luzingu ende, ayatsawo ntu, kansi wur etun luzingu ende ne buu ene, ayawum nde luzingu ende djwi na luzingu ekwon nsuka. ²⁶ Wur ekie otshia ome, asadjiye ne mby eme; mpi ondii oli me, wur eme otshia mpi asiyiande. Wur ekie otshia ome, Tea asopeande lokumu. ²⁷ Ntangu ene, moyo eme kaku wo na ngemba ve.Nge esifituba me? Tea, ondimi ne vii aleye opeane? Kansi me, ayiime djwi na vii asiyia ntangu ene. ²⁸ Tea, pea nkembo ne dzin iyie!" Mby, otuba omog eyim dzug etuba wuwun: "Ntopea nkembo, ayopeaka me nkembo." ²⁹ Mby oluy o vear ayii kog, ntangu emiyug wo vii anagn, wuwun ayiwo nzari atibean, amuu wuwun: "Wanzio emog atituba nda nde." ³⁰ Yezu akeara ndende: "Otuba onagn etopwi djwi na me ve, kansi djwi na gnu. ³¹ Opeane eli ntangu e mbag ewu e buu ene, opeane nkum e buu ene asobug wo nelien. ³² Mby me, ntangu esivean me yim ne buu, asibin me vear ankum ya me." ³³ Etubikinde ngean, ayiiwo akab oshin okagn eyawa nde. ³⁴ Oluy o vear anagn wokeara wuwun: "N'onkeana o nsiku wamifugn wuwun Kristu ayayia nde otshwag-otshwag. Mby oshin onkagn etuba yie yiyen: 'Ekug wuo Mon-wur ayavean nde dzug'? Mon- wur ewo eli nagn?" ³⁵ Yezu atuba nda wo ndende: "Mwinda eliko ne kati egnu ivim i ntangu. Kienagni ntangu elignu na mwinda djwi mpib ekologagni: wur elekien ne mpib apayen etay eletshinde ve. ³⁶ Ntangu elignu an mwinda, djiragni ya mwinda." Ntangu emishir nde ntuba vii anagn, Yezu s'akien nde, atsa nzuba etey na wo. ³⁷ Ata Yezu akiinde bidimu entsign ne nteang ewo, kansi wakadjir ya nde ve, ³⁸ djwi vii ayiitubi ngansa Ezai ekug: "Nkum, nagn eyidjir n'along asu, mpi Nkumatiyegne ewuo ende y nagn?" ³⁹ Wapikug ndjir ya nde ve, djwi Ezai atubinde mpi ndenden: ⁴⁰ Amibuye viy awo, amapea itura biu; djwi wakayen ne viy awo, wakajia n'itura iwo, wakatshima itura iwo, wakavug." ⁴¹ Ezai atubinde vii ane djwi ayiiwo amiyen nkembo e Yezu mby s'atubikinde djwi na nde. ⁴² Wog enagn, ata ne kati e ankum amuu entsign adjir wo ya nde, kansi djwi na womo e wafarize, wakaleangaka nkab ve, djwi wakakma ne sinagoga. ⁴³ Aleangikiwo lokumu eyim ya vear, elenga lokumu eyim ya Nzeam. ⁴⁴ Kansi Yezu atubikinde na biu ndenden: "Wur edjir ya me, epa adjir ya me ve, kansi adjir ya wur eyintum, ⁴⁵ mpi wur esingyen, atiyen mpi wur eyintum. ⁴⁶ Ayiime kamsi mwinda ne buu, djwi wur enkum esidjir ya me akwon mfiyia ne mpib. ⁴⁷ Yug wur atiyug otuba ome akaleang nkir wog ve, epa mug wur esobag ewu ve, djwi me nkayia mbag vear ewu ve, kansi djwi na mvuga vear a buu. ⁴⁸ Wur esintun, akavey ata otuba ome ve, eli ko otuba emilong me enagn ayobag nde ewu n'eshuu e nsuka. ⁴⁹ Djwi me, ntotubi djwi na me memie ve, kansi Tea wur eyintum, ankabinde vii afwete me na ntuba ti efwete me na nkab. ⁵⁰ Ndajia nsiku ende eli evug e mvwe na mvwe. Wog enagn, vii aletubime, ndetubi ko oshin oyinkabi Tea."