¹ Ne nteang okina e Pake, emijia Yezu ndenden ntangu ende etikug, alim ne buu ene aletsu etay e Tea, ntangu emileang nde vear ande ali ne buu tii ne nsuka. ² Ne ntangu eyilikiwo epiyekwo, kog ontshung ayiwo atitsug nginu i nsar Yezu n'etura e Yudasi Iskarioti, mon e Simoni. ³ Ajiikinde ndenden Tea amipea vim ankum ne mbwo inde, mpi nde ayim ya Nzeam mpi alekey ntsa etay e Nzeam. ⁴ Alim ne mesa, alima ileama inde, avey etay eleama emog atshung nikini inde. ⁵ Mby atsug vay n'ilongo, s'asuyikinde nkuu i walongoki inde, adjue vay n'eleama eyitshung nde n'ikini. ⁶ Emikum nde etay e Simoni petelo, Petelo atuba nda nde ndenden: "Yie wur eli Nkum, onsuy me nkuu!" ⁷ Yezu okearar ndenden: "Vii akieme ene, otojii wog ve, ayasayie jia ko mby." ⁸ Petelo atuba nda nde ndenden: "Opansuy me nkuu ve." Yezu okeara ndenden: "Yug nkosuy yie nkuu ve, opavea ikab iyie etay eme ve." ⁹ Simoni Petelo atuba nda nde ndenden: "Nkum, oyansuy ko nkuu ve, onsuy ti mbwo ti ote." ¹⁰ Yezu atuba nda nde ndenden: "Wur emisuy wo nkuu kaku nde na mfunu esifiyog nde djuung inkum ve, djwi djuung inde ititiem, gnu otitiemagni, kansi epa gnankum ve." ¹¹ Djwi Yezu ajiinde wur esosar, mby s'etuba nde ndenden gnankum ototiemagni ve. ¹² Ntangu emishir nde nsuy nkuu iwo, akea ndwer eleama, s'akey nde nda ne dzug i mesa, atuba nda wo ndenden: "Ojiagni vim emokiagni me? ¹³ Olemviagni Long, Nkum, eli wuo, ndi oshin onagn. ¹⁴ Yug me long, Nkum, ntosuyagni nkuu, gnu mpi suyagni nkuu gnug na gnug. ¹⁵ Djwi ene eli mbanu emopeagni me, djwi gnu mpi okiagni oshin emokiagni me. ¹⁶ Vi-a-vii, vi-a-vii, mokabagni, wur otshia apilenginkum ende ve, ata ntumwa apilengi wur eyotum ve. ¹⁷ Yug ko omijiagni vii anagn, olagni na lusakumunu, kansi ekug wuo okiagni wog. ¹⁸ Ntuba vii ane, epa djwi na gnu gnankum ve; ndajia vear ayiison me. Kansi wuo vii ayifugn wo n'enkeana ekug: 'Wur ela mampa nda me, atisiang ibuu ekuu djwi na naang me.' ¹⁹ Ntangu ene, mokabagni, vii awo wean atokum ve, djwi ntangu esikum wo, odjiragni nagn eli me. ²⁰ Vi-a-vii, vi-a-vii, mokabagni, wur esivey wur eyatum me, atimvey me; wur esimvey me, ativey wur eyintum." ²¹ Ntangu emituba nde ngean, ayug ngy n'etura ende, mby s'atubinde ndenden: "Vi-avii, vi-a-vii, mokabagni, emog ne kati egnu asinsar nde." ²² Walongoki wakeandir wog na wog, wapijia wur ewo nagn etuba nde. ²³ Longoki emog, Yezu oleangikinde entsign, avur n'ipeo i Yezu. ²⁴ Simoni Petelo opfuna na ngyue wur ewo nagn etuba nde. ²⁵ Mby longoki enagn alogo ote n'ebimi e Yezu, atuba nda nde: "Nkum, wur ewo nagn?" ²⁶ Yezu akeara ndenden: "Wur esipeame etign e mampa emitsug me ne vay. Mby ntangu emitsug nde etign e mampa ve vay, s'apiinde Yudasi Iskarioti, mon e Simoni. ²⁷ Emopeande etign e mampa enagn, satana ashwe n'etura ende. Mby Yezu okaba ndenden: "Kagn nkie vim eling yie nkie." ²⁸ Kaku ata wur emog eyilikiwo ne dzug i mesa eyijii vii anagn ayitubi Yezu ve. ²⁹ Amuu abansiwo, n'oshin oyiwumike Yudasi iteang ekri, wuwun Yezu atotum na nshum vim djwi n'okina, go atotum na mpea vim ya emva. ³⁰ Ko ntangu emivey Yudasi etign e mampa enagn, s'akagni nde mpwe eveang-eveang. Ayiwo mpi watikum otshu. ³¹ Emipwe Yudasi, Yezu atuba ndenden: "Opeane Mon-wur ativey lokumu ende, Nzeam mpi ativey lokumu endene kati ende. ³² Nzeam ndemie ayopeande lokumu ende, mpi ayokagn nde ompea lokumu ende. ³³ Aman ame, ndi n'ivim i ntangu fioti ne kati egnu. Ayansagnu nding, oshin oyitubi me ya waYuda: 'Opakugagni ngya etay eletshime ve', mean ko mokabagni opeane. ³⁴ Mopeagni nsiku emog empa: Yiagni na ngaagn gnug na gnug, oshin eyoleangakagni me, gnu mpi, yiagni na ngaagn gnug na gnug. ³⁵ N'oshin onagn, vear ankum asijiawo wuwun olagni walongoki ime, yug olagni na ngaagn gnug na gnug. ³⁶ Simoni Petelo atuba nda nde: "Nkum, oletsu nonkagn?" Yezu okeara ndenden: "Opakug nsadjie me opeane ve etay eletshime, kansi ayasayiedjie ko mby." ³⁷ Petelo atuba nda nde: "Nkum, mokwon onsodjie yie opeane djwi na nge? Ayapeame luzingu eme djwi na yie." ³⁸ Yezu okeara ndenden: "Ayapeayie luzingu eyie djwi na me? Vi-a-vii, vi-a-vii, mokaba yie, nkogo apatovug ve, asinsan yie mbala isar."