¹ Oyayiagni na ngy n'itura ignu ve. Djiragni ya Nzeam, djiragni mpi ya me. ² N'evuru e Tea me endii eli entsign. Yug ekwon ngya oshin onagn, mpinokabakagni ve. Ndetsu ngwong ondii djwi na gnu. ³ Ntangu eyakien me n'ongwongagni ondii owo, ayakeame, ayoveyagni me, ondii oyayiame, gnu mpi ayayiagnu neti. ⁴ Ojiagni etay eletshime, ojiagni ti mbug ewo. ⁵ Toma atuba nda Yezu ndenden: "Nkum, sipijia etay ewo eletshi yie, mby oshin onkagn esijia su ko mbug ewo?" ⁶ Yezu okaba ndenden: "Me ndi mbug, ndi masonga, ndi mpi luzingu; kaku wur esiyia etay e Tea ve, yug akaleg ya me. ⁷ Yug ko otonjiagni me, anajiagnu ti Tea me. Opeane wean otojiagni, otoyenagni." ⁸ Filipu atuba nda Yezu ndenden: "Nkum, otyegni Tea, vii ashir." ⁹ Yezu atuba nda nde: "Nding eli me ti gnu nendien, Filipu, otonjii me ve? Wur emingyen me, atiyen Tea, oshin onkagn etuba yie yiyen:'Oteyegni Tea?' ¹⁰ Opidjir ve yiyen me ndi ne kati e Tea, Tea mpi ali nda me? Vii alokabagni me ene, epa eyim ya me memie ve, eli Tea elepier ne kati eme, ndug wur elekii etshia ene. ¹¹ Ondjiragni, me ndi ne kati e Tea, Tea mpi ali nda me, djiragni ata n'etshia ene. ¹² Vi-a-vii, vi-a-vii, mokabagni, wur ekwikila nda me, asikie nde etshia elekii me ene, ayakiende etshia enen-enen elenga ene, djwi me ndetsu etay eli Tea. ¹³ Mby vim enkum eyawignakagnu ne dzin ime, ayakieme, djwi Tea avey lokumu ende ya Mon. ¹⁴ Yug otiwignagni vim enkum enagn ne dzin ime, ayakieme. ¹⁵ Yug ansagnu ndeang, wumagni onkwon ome. ¹⁶ Mby me, ayasamame ya Tea, ayopeagni nde wur emuu eyoshungagni, djwi asatsuga nda gnu otshwag-otshwag, ¹⁷ Mpeve e masonga, eli vear a buu wapakug mvea ve, djwi wapoyen ve, wapojia ve. Kansi gnu, olojiagni, djwi ali nda gnu, ayasande pier nda gnu, ayayiande ne kati egnu. ¹⁸ Mpososugnagni aman etsigi ve, ayakeame etay eli gnu. ¹⁹ Etisatsuga ivim i ntangu fioti, buu ene wapafingyen ve, kansi gnu, ayangyenaka gnu, djwi ndi ne luzingu, gnu mpi, ayayiagnu ne luzingu. ²⁰ Eshuu enagn, mby ayajiagnu gnugnun ndi ne kati e Tea me, gnu olagni ne kati eme, me ndi ne kati egnu. ²¹ Wur eli n'onkwon ome, amikir wog, ndug enagn wur endeang me; wur endeang me, Tea me mpi asoleang nde, asoleang me, asinjia nde." ²² Yude (epa Iskarioti ve), nda Yezu ndenden: "Nkum, oshin onkagn ko su, sojii yie, kansi epa vear a buu ve?" ²³ Yezu okeara ndenden: "Wur endeang asiwum nde otuba ome, Tea me asoleang nde, asiyiasu etay ende, asikiesu evuru esu etay ende. ²⁴ Wur epindeang me ve, apakir ptuba ome ve. Ata otuba oyug gnu ene, epa eyim ya me ve, eyim ya Tea eyiintum. ²⁵ Ntokabagni vii ane en ntangu elime ma gnu. ²⁶ Kansi wur eyoshungagni, Mpeve-Santu, eyotumagni Tea ne dzin ime, ayolongagni nde vii ankum, ayokeande onkanagni vii ayokabakagni me. ²⁷ Ntososugnagni ngemba, ndopeagni ngemba eme. Epa mopeagni oshin otsampea vear a buu ve. Oyayiagni na ngy n'itura ignu ve, oyagnieagni n'itura ignu ve. ²⁸ Ayug gnu, okabagni me memen: 'Ndtsu, ndekey etay egnu. Yug ondeangagni, asiyiagnu n'osiang wuo nkien etay e Tea, djwi Tea andenga me. ²⁹ Opeane, mean ntokabagni vii ane nteang, etokum ve, djwi ntangu esikum wo, oledjiragni. ³⁰ Mpafituba ma gnu ve, djwi nkum e buu ene ndean aleye. Kaku nde n'ekub ne dzug ime ve; ³¹ kansi djwi vear a buu wajii wuwun atsame ndeang Tea, atsame nkie n'oshin onsande ntum, yimagni silimagni nendien."