¹ Me, ndi oshung e djwi-djwi, Tea me ali nkea evur. ² Itab inkum ili ya me kansi epiwur atub ve, asokeaga nde, itab inkum isiwur atub, asitsug nde mafuku djwi elegi mpur atub entsign. ³ Otitiemagni ne djuung ignu djwi otuba emokabagni me. ⁴ Kamagni ya me, me mpi asikama me ma gnu. Oshin omog ti itab, epakug mpur atub ndemie ve, yug akakama ti itsin oshung, gnu mpi, opakugagni ve ata itaang, yug okakamagni gna me. ⁵ Me ndi oshung, gnu olagni atab. Esikama nda me, me mpi nkami ma nde, asipur nde atub entsign, djwi yug oyinkwonagni me, opakygagni nkie ata vim emog ve. ⁶ Wur ekakama nda me, asotwomo wo nelien, kamsi itab, asiyum nde, asotingo wo, wotwomi ne tshiya, alungi. ⁷ Yug otikama ya me, yug otuba ome mpi etikama ya gnu, wignagni vim enkum eleang gnu, asopeagni wo. ⁸ Yug otipuragni atub entsign, oshin onagn, Tea me asivey nde lokumu, mby gnu, asikum gnu walongoki ime. ⁹ Oshin oyindeang Tea, me mpi oleangagni me. Satsugagni na ngaagn eme. ¹⁰ Yug owumagni onkwon ome, asisagnu tsuga na ngaagn eme, oshin oyiiwum me onkwon o Tea me, misatsuga na ngaagn ende. ¹¹ Ntokabagni vii ane djwi osiang ome eyii ya gnu, djwi mpi osiang ognu ekug. ¹² Ene wog onkwon ome: 'Yiagni na ngaagn gnug na gnug, oshin eyoleangagni me. ¹³ Ngaagn emuu eninen kaku ve, eli ko empea luzingu eyie djwi n'iwur iyie.' ¹⁴ Gnu, olagni iwur ime, yug okiagni vim etuba me ene. ¹⁵ Mpafoviagni vear otshia ve, djwi wur otshia apijia vim ekie nkum ende ve. Kansi me, ndoviagni iwur, djwi ntokabagni vii ankum ayijiime ya Tea me. ¹⁶ Epa gnu vear ayiinson me ve, kansi eli mug wur eyosonagni, mug wur emotsugagni n'endii enagn, djwi otsagni, opuragni atub, djwi atub awo asatsuga, mby vim eyawignagnu ya Tea ne dzin ime, asopeagni nde. ¹⁷ Vim etuba me okiagni, eli na ngya na ngaagn gnug na gnug. ¹⁸ Yug walotunagni na buu, jiagni gnugnun antun wo me nteang egnu. ¹⁹ Yug oyiagni vear a buu, buu ene anoleangagni nde kamsi vim ende. Kansi djwi epa olagni vear a buu ene ve, osonagni me ne kati e vear a buu, wog enagn vear a buu walotunagni. ²⁰ Kanagni otuba eyokabagni me memen: 'Wur otshia apalenga nkum ende ve. Yug ampiiwo me mpay, ayopeagni wo mpi mpay; yug akir wo otuba ome, ayakir wo mpi otuba ognu. ²¹ Ayokiagni wo vim ankum anagn, ko djwi na dzin ime, djwi wapijia wur eyintum ve. ²² Yug nlwon ngya, yug makwon ankaba, wapinajiaka na masumu ve, kansi opeane kaku vim esifisan wo ve djwi na masumu iwo. ²³ Wur esintun me, atitun mpi Tea me. ²⁴ Yug nkwon nkie etshia ne kati ewo, eli kaku wur emuu iky emikie, wapinayiaka na masumu ve; kansi opeane, wamiyen etshia ewo, wamintun ti me, ti Tea me. ²⁵ Vii anagn amileg djwi n'otuba oyifugn wo n'onkean owo o nsiku ekug: 'Antun wo me kaku ata itsin i djwi ve.' ²⁶ Ntangu eyayia wur eyososhungakagni, ndug eyotumagni me yim ya Tea, Mpeve e masonga, ayim ya Tea, ayakabaka nde ntiegn i vii ame. ²⁷ Gnu mpi, ayapeakagnu ntiegn i vii ame, djwi olagni ti me yim ko n'itsin.