¹ Yezu atshinde n'ombimi e olive. ² Ne suka-suka enagn akea ntsa ne tempelo, mby oluy o vear wasayia; agneme mby s'alongiki nde ³ Mby walong i nsiku ti wafarise wojie onkear omog emitshung wo n'itaay. Woky ne ngnina e vear ankum. ⁴ Watuba wa nde wuwun: "Long, onkear one watotshung n'itaay. ⁵ N'onkwon, Moize amitepea mbug na ndjag oshin o vear ane n'atari. Mby yie, otuba yiyen nge djwi na nde?" ⁶ Atubikiwo vii anagn djwi n'ontsug ilung djwi waviy mbug esotshung wo. Kansi Yezu atsur ote ngie, afugnike n'epign ende ne buu. ⁷ Wo, waloyue ko vii, mby ayima s'atubinde nda wo: "Ne kati egnu, wur eli atokii disumu obug itari i nteang." ⁸ Akea mbaba, akea mfugn ne buu n'epign ende. ⁹ Ntangu emiyug wo otuba onagn, itura iwo itakeamfugn, s'alur wo emog-emog, yim antsuru tii ko aman alieng. Mby Yezu asatsuga ko nde ti onkear onagn eyike ne ngnina. ¹⁰ Yezu ayima, atuba nda nde: "Onkear one, vear ayofugnike yie nendien wando? Kaku wur emobag ewu?" ¹¹ Akeara ndenden: "Kaku, Nkum." Yezu s'atubinde: "Me mpi, mpo bag ewu, tshwag, kansi oyafikie disumu ve." ¹² Mby Yezu akea ntuba nda wo: "Me ndi mwinda e buu; wur esisandjie me mby apayen mpib ve, kansi asiyia nde na mwinda e luzingu." ¹³ N'otuba onagn, wafarize watuba wa nde: "Opea ntiegn eyie yemie, ntiegn eyie epa eli masonga ve." ¹⁴ Yezu akeara ndenden: "Ata ndapea ntiegn e vii ame memie, ntiegn eme eli masonga, djwi ndajia etay eyim me, ti etay eletshime. Kansi gnu, opijiagni etay eyim me ti etay eletshime. ¹⁵ Gnu, atsagnu mbag vii oshin oyen gnu na viy, kansi me, mpabag ewu e wur ve. ¹⁶ Yug me ndabag vii, ewu ebag me eli e masonga, djwi epa ndi memie ve, Tea eyiintum ali nda me. ¹⁷ N'enkean egnu enkwon wamifugn wuwun ntiegn e vear ape eli masonga. ¹⁸ Me ndi wur epea ntiegn eme memie, ti Tea eyintum mpi apea ntiegn e vii ame." ¹⁹ Watuba wa nde: "Tea yie ewo ali nonkagn?" Yezu akeara ndenden: Opinjiagni me, opijiagni ata Tea me. Yug otonjiagni me, anajiagnu mpi Tea me." ²⁰ Atubikinde vii ane, along ne tempelo, n'ondii oli iteang i makabu, kaku ata wur eyotshung, djwi ntangu ende ayiwo etokug. ²¹ Mby akea ntuba nda wo: "Ndetsu, ayasagnu nding, ayawagnu ko na masumu ignu, opakugagni ngya etay eletshime ve. ²² WaYuda watuba wuwun: "Nge ayadjag nde djuung ndemie, djwi etuba nde:'Opakugagni na ngya etay eletshime?' " ²³ Yezu atuba nda wo: "Gnu, olagni vear a ngie, me ndi wur e dzug. Olagni vear a buu ene, me epa ndi wur e buu ene. ²⁴ Wog enagn eyokabagni me, ayawagnu ko ne masumu ignu." ²⁵ Watuba wa nde wuwun: "Yie oli nagn?" Yezu akeara: "Ko oshin eyokabagni me yim ko n'itsin. ²⁶ Ndi na vii entsign e ntuba djwi na gnu, kansi wur eyintum ali masonga, vii ayiyug me etay ende, wog elekabime vear a buu." ²⁷ Wakajia ve wuwun alatuba djwi na Tea. ²⁸ Yezu atuba: "Ko ntangu eyasiang gnu Mon-wur, mby ayajiagnu nagn eli me, mpikug nkie vim emog memie, ndetubi oshin oyindong Tea. ²⁹ Wur eyintum ali nda me, atonsiangi memie ve, djwi ndekii vii a wuo ntangu enkum ne nteang ende." ³⁰ Ntangu eyitubike Yezu vii anagn, vear entsign wakwikila ya nde. ³¹ Yezu atuba nda waYuda iyikwikili ya nde: "Yug omisatsugagni n'otuba ome, enagn olagni kieleka walongoki ime; ³² mpi ayajiagnu masonga, mby masonga inagn ayolimagni wo n'ampfumi." ³³ Wokeara wuwun: "Su, sili n'okuu Abrama, sikayia ampfumi ve. Oshin onkagn etuba yie: 'Ayalim gnu n'ampfumi?' " ³⁴ Yezu akeara: "Vi-avii, vi-avii, mokabagni wur enkum esikie disumu atikum mpfumi e disumu enagn. ³⁵ Mpfumi apitsingya otshwag n'evuru ve, kansi eli mon wur esatsuga otshwag n'evuru. ³⁶ Kansi yug Mon amopubagni eshing, kieleka kaku vim esokiragni diaka ve. ³⁷ Ndajia, olagni n'okuu Abrama, kansi olelingagni na ndjag me, djwi otuba ome epivey ondii n'itura ignu. ³⁸ Ndatuba vii ayiyen me ya Tea me. Gnu mpi, olekiagni vii ayiyug gnu etay e tea gnu." ³⁹ Wokeara wuwun: "Tea su eli Abrama." Yezu nda wo ndenden: "Yug otoyiagni aman Abrama, anakiegnu vii Abrama. ⁴⁰ Kansi gnu ntangu ene, olelingagni na ndjag me, me wur emokabagni masonga eyiyug me etay e Nzeam. Vii anagn, Abrama akakie wog ve. ⁴¹ Olekiagni ko otshia e tea gnu." Watuba wa nde: "Su, apa sili aman a makangu, sili na Tea su emog: Nzeam." ⁴² Yezu atuba nda wo: "Yug Nzeam atoyia Tea gnu, anandeang gnu me, djwi me, mipwe ya Nzeam, ngyim etay ende, nkayia n'oshin ome memie ve, eli ndug wur eyintum. ⁴³ Djwi na nge epijiagnu otuba ome? Djwi opileangagni ngyug otuba ome ve. ⁴⁴ Tea gnu eli satana, s'aleling gnu nkie oshin oleang tea gnu. Yim ko n'itsin, ayiinde wur edjag vear, apitsintuba ata djwi i masonga, djwi ya nde kaku masonga ve. Ntangu etsande mpur oyang n'odzum onde, atsande ntuba vii ayim ne ngie etura ende, djwi ali nkea oyang, ali tea ankea eyang. ⁴⁵ Mby me, djwi ntuba masonga, opikwikilagni ya me ve. ⁴⁶ Ne kati egnu, nagn esikug ntuba ndenden ntikie disumu? Yug ndetubi masonga, djwi na nge epileang gnu ndjir vii ame? ⁴⁷ Eli wur e Nzeam, asiyug nde otuba o Nzeam; opiyugagni ve djwi epa olagni vear a Nzeam ve." ⁴⁸ WaYuda wokeara wuwun: "Sikatuba susun oli wur e Samaria mpi oli n'etwon?" ⁴⁹ Yezu akeara ndenden: "Kaku me n'etwon ve, ndalemfuka ya Tea me, gnu opilemfukagni ya me ve. ⁵⁰ Epa ndaling lokumu eme ve, eli ko na wur emog eling lokumu, ndug wur ebag vii. ⁵¹ Vi-a-vii, vi-a-vii, mokabagni, yug wur atiwum otuba ome, apayen ewa ve." ⁵² WaYuda watuba wa nde: "Opeane sitijia susun oli n'etwon. Abrama ti wangunsa wamiwa, mby yie otuba yiyen: 'yug wur atiwum otuba ome, apayen ewa.' ⁵³ Olenga tea su Abrama emiwa? Wangunsa mpi wamiwa, yie obansa oli nagn?" ⁵⁴ Yezu akeara: "Yug nding lokumu djwi na me memie, lokumu ewo eli e mpama. Eli Tea me wur empea lokumu enagn, ndug eletubignu ali Nzeam egnu. ⁵⁵ Kansi gnu, otoojiagni nde ve. Djwi na me, mojia nde, yug ntituba memen mpojia, asikum me nkea oyang, oshin omog ti gnu. Ndjia, mikir mpi otuba onde. ⁵⁶ Tea gnu Abrama ayinde n'osiang djwi na ngyen eshu eme; ntangu eyiyen nde, ayinde n'osiang entsign." ⁵⁷ WaYuda watuba wa nde: "Otokug ata mvwe otean ve, otuba yiyen ayen yie Abrama?" ⁵⁸ Yezu atuba nda wo: "Vi-a-vii, vi-a-vii, mokabagni, Abrama nantoyia, me ndeko." ⁵⁹ N'otuba onagn, s'atongiwo atari djwi wobug, mby Yezu s'azubinde, s'apwinde ne tempelo.