¹ Ne mby ewo, Yezu akienikinde ne buu e Galilea, akafileangaka nkie nshuu ne buu e Yudea ve, djwi waYuda alelingikiwo oshin esodjag wo. ² Okina e waYuda, okina e Tabernacle ayiwo etikum pipi. ³ Mby atwung ande watuba wa nde wuwun: "Lim nendien, tshwag Yudea, djwi walongoki iyie wayen etshia elekiiyie. ⁴ Wapitsinkie otshia n'oziy ve yug oling mpwe ne viy a vear. Yug olekii vii ane, pwe vear woyen." ⁵ Djwi ata atwung ande wakakwikilaka ya nde ve. ⁶ Yezu atuba nda wo ndenden: "Ntangu eme etokug; kansi gnu, ntangu egnu eli ya gnu ntangu enkum. ⁷ Vear a buu wapotunagni, kansi me, walantun djwi ndakabi etshia ewo eli epwo. ⁸ Gnu, tshwagagni okina onagn, me mpatsa ve, djwi ntangu eme etokug." ⁹ Mby ntangu emishir nde ntuba nda wo, asatsuga ne Galilea. ¹⁰ Ntangu emitsa atwung ande okina owo, mby nde mpi asatsa ndemie n'oziy, apa ne viy a vear ve. ¹¹ WaYuda alolingikiwo n'okina onagn, wuwun: "Ali nonkagn?" ¹² Ne kati oluy o vear anagn, atubikiwo wog na wog, amuu wuwun: "Ali wur e wuo." Amuu wuwun: "Kaku, atidjim vear entsign." ¹³ Kaku wur eyitubike n'oshin oleang nde, aleyugikiwo womo e waYuda. ¹⁴ Ntangu emikum ikagn biu, Yezu atsa nshwe ne tempelo, apea along. ¹⁵ WaYuda wayen ngituka, wuwun: "Wur ene ajia vii entsign ngean oshin onkagn, nde wur ekakie nzo nkanda?" ¹⁶ Yezu akeara ndenden: "Along ame epa eyim ya me, kansi eyim ya wur eyintum. ¹⁷ Wur eleang nkie luzolo ende, asijia nde yug along alepiime eyim ya Nzeam, go ndatuba djwi na me memie. ¹⁸ Wur etsantuba n'oshin onde ndemie atsande nding lokumu ende ndemie, kansi wur etsanding lokumu e wur eyotum, ndug enagn ali wur e djwi-djwi, kaku vii oyang ya nde. ¹⁹ Epa Moize wur eyopiagni wansiku? Kansi kaku ata wur emog ne kati egnu ekir wansiku iwo. Djwi na nge eleling gnu ndjag me?" ²⁰ Oluy o vear anagn wakeara: "Oli n'etwon. Wur ewo nagn eloling n'ondjag yie?" ²¹ Yezu akeara ndenden: "Ntikie ko otshia emog, otiyenagni ngituka gnankum. ²² Moize opiagni nde mbug e mbag djuung ampeam, enagn ekayim ya Moize ve, kansi eyim ya atea asu, kansi olebagagni djuung ampeam eshuu e sabat. ²³ Yug olebagagni djuung ampeam eshuu e sabat djwi na nkwon mpiy enkwon e Moize, djwi na nge eleyug gnu nkier ya me djwi avugime opfugn o wur eshuu sabat? ²⁴ Oyabagagni vii n'oshin oyen gnu na viy ve, kansi bagagni vii na masonga." ²⁵ Vear amuu a Yeruzalem s'atubikiwo: "Ene epa wur eleling wo na ndjag? ²⁶ Yenaka ndean awung ntuba oshin oleang nde, wapitubi ata djwi wa nde. Nge vi-a-vii, ankum ane wajia wuwun wur ene ali Kristu? ²⁷ Wur ene, ndean silajia etay eyim nde, kansi ntangu eyayia Kristu, kaku ata wur emog eyajia etay eyim nde." ²⁸ Ntangu eyilongike Yezu ne tempelo, adzama na biu: "Gnu wog onjiagni me, ojiagni ti etay eyim me. Me, nkayia memie ve, kansi wur eyintum ali kieleka, gnu ko opojiagni ve. ²⁹ Me, ndojia nde, djwi ngyim etay e nde, eli ndug wur eyintum." ³⁰ Olingikiwo n'ontshung, kansi kaku wur eyokir djwi ntangu ende ayiwo etokug. ³¹ Kansi n'oluy o vear anagn, vear entsign akwikiliwo ya nde, atubikiwo wuwun: "Ntangu eyayia Kristu, ayakie nde bidimu ilenga wur ene." ³² Wafarize wayug vii ayitubike oluy o vear anagn djwi na Yezu, mby nkum e wanganga-Nzambiti wafarize s'atum wo ayer-nkuu djwi n'ontshung nde. ³³ Mby Yezu s'atubinde: "Ndi ma gnu diaka ivim i nshuu, mby ndekey ntsa etay e wur eyintum. ³⁴ Ayasagnu nding gnu kansi opafi ngyenagni ve; etay eletshime, opakugagni na ngya mpi ve." ³⁵ Ne djwi inagn, waYuda s'atubikiwo wog na wog: "Etay enkagn eyatsande sikwon ongyen? Ayatsande etay e vear amipagn ne buu e waGreki djwi atsi ndong waGreki? ³⁶ Otuba one eling nkab nge: 'Ayasagnu nding gnu mpi opafi ngyenagni ve, opakugagni na ngya etay eyayiame?' " ³⁷ Eshu e nsuka, eshu okina, Yezu ayima, adzama, ndenden: "Wur eli na mpuy e vay, aye etay eme, aye gnua vay. ³⁸ Wur ekwikila ya me, nzey enen ayapwewo n'ipfugn inde." ³⁹ Atubinde ngean djwi na Mpeve efwete mvey vear asikwikila ya nde; djwi Mpeve atokri ve, djwi Yezu ayiwo atovey nkembo ende ve. ⁴⁰ Oluy o vear anagn, emiyug wo otuba onagn, watuba wuwun: "Vi-a-vii, ene ali ngunsa." ⁴¹ Amuu watuba wuwun: "Ene eli Kristu." Kansi amuu wuwun: "Nge Kristu afwete ngyim Galilea? ⁴² N'enkean e Nzeam wakafugn wuwun Kristu ayayim nde n'okuu e David, ne Beteleyem, wiya eyike David?" ⁴³ Ko djwi na nde, oluy o vear anagn ekum akab-akab. ⁴⁴ Vear amuu ne kati ewo anotshung wo, kansi kaku ata emog eyokir ve. ⁴⁵ Mby ayer-nkuu wakea etay e ankum a wanganga-Nzambi ti wafarize, watuba wuwun: "Djwi na nge ekojie gnu nendien?" ⁴⁶ Ayer-nkuu wakeara wuwun: "Kaku wur etsa ntuba kamsi wur enagn." ⁴⁷ Mby wafarize wavura wuwun: "Nge ti gnu mpi watodjimagni? ⁴⁸ Eli na long e nsiku emog go farize emog emidjir ya nde? ⁴⁹ Kansi oluy o vear apijia ata onkwon o Moize wali n'epie epwo." ⁵⁰ Nikodeme, emog e wafarize eyiike otshu-otshu etay e nde s'atubinde nda wo ndenden: ⁵¹ "Nge n'onkwon osu elatum vear na mbag ewu e wur yug otoyug wur enagn djwi na njia vim nge emikiende?" ⁵² Wokeara wuwun: "Nge ti yie oli wur e Galilea? Ling wuo-wuo asiyen yie kaku ngunsa emog esiyim Galilea ve." ⁵³ Mby wur na wur s'akey nde n'evuru ende.