¹ Ne mby ewo, Yezu s'asab nde nky emuu e nzey e Galilea etsamviewo mpi Nzey e Tiberiasi. ² Olwi o vear wodjie djwi na bidimu iyenikiwo alekii ya vear a nkeang. ³ Yezu avean n'ombim, akeanse nda balongoki inde. ⁴ Kansi Pake, okina o Wayuda ayiwo etivanga. ⁵ Emiseang nde viy, ayen olwi o vear waleye etay ende, Yezu atuba nda Filipu ndenden: "Asishum su mampa n'onkagn djwi vear ane waviy vim a nda ?" ⁶ Kansi Yezu atubinde ngwign djwi na meka Filipu, djwi ajinde ndemie vim nge eling nde nkie. ⁷ Filipu okeara ndenden: "Ata simishum mampa i nkam ipe ekri e deniye, epakug ve djwi wur enkum aviy ata itse-itse. ⁸ Longoki ende emog, Andre, otwung o Simoni Petelo, atuba nda Yezu ndenden, ⁹ "Onkwo ompeam omog nendien ali na mampa itean na nse ipe, kansi enagn asikiewo nge djwi n'olwi o vear ane?" ¹⁰ Yezu akeara ndenden: "Peagniwo ondii o nkeanse. Ayiwo n'adjiu entsign n'ondii owo. Vear s'agnemiwo, ayiwo vear etitign awugu atean. ¹¹ Mby Yezu s'aveynde mampa iwo, akeara nsag-na-viye ya Nzeam, apea vear ankum ayignemi. Akie oshin omog na nse, apea wur na wur n'oshin oyileang nde mvey. ¹² Ntangu emiyur vear, Yezu atuba nda walongoki inde: "Tongagni itign i mampa imisatsiga djwi ikatsa ntu." ¹³ Ntangu emishir wo nda wankum, watongo mpi wayura isag djum n'ipe n'itign i mampa iyisashuna mpi iyiyum ne mampa itean i nteang. ¹⁴ Mbiy, ntangu emiyen vear anagn kidimu enagn emikie Yezu, s'atubiwo wuwun: "Ene eli djwidjwi ngunsa efwete ngya ne buu." ¹⁵ Ntangu emijia Yezu ndenden vear anagn waling omvey djwi watsu wande mpi wotsug na biuu ayii nkum, s'alurnde ne dzug ombimi ndemie. ¹⁶ Ntangu ekum wo epiekwo, walongoki i Yezu wakra n'ikri i nzey. ¹⁷ Washwe ne war, wabag nzey djwi na ntsa Kapernaum. Otshuu ayiwo otilog mpi Yezu atokum ntete ondii oliwo ve. ¹⁸ Opepe oninen eleleg mpi nzey elegnug biuu. ¹⁹ Ntangu emilug wo nkey mp emikiewo kitamina e kilometele itean to isom, wayen Yezu alekien ne dzug i vay mpi alevangi pipi na war. Wayug wom. ²⁰ Yezu s'atubinde nda wo ndenden, "Eli mug! Oyayugagni womo ve." ²¹ Mby s'aling wo ongyama neti e war, kansi ko ne ntangu enagn war ekum ne nky, ondii oletsukiwo. ²² Olwi o vear ayisatsiga ne nky emuu e nzey, wayen wuwun etisatsiga ko war emog mpi Yezu akashwe ne war e walongoki ve mpi walongoki atshiwo wo wemie. ²³ Mpimpign enagn, kamsi viar imuu iyiyum Tiberiadi itiyia nshem n'ondii oyiliwo mampa ne mby e bisamu eyikii Yezu djwi na nkeara nsag-na-viye ya Nzeam. ²⁴ Ntangu emiyen olwi o vear anagn wuwun Yezu ti walongoki inde kaku ata wur emog kog ve, s'akwuniwo ne viar inagn mpi watsa Kapernaum djwi na ntsa nding Yezu. ²⁵ Ntangu emiyen wo Yezu ne nky e nzey, woywe wuwun: "Rabi, ayiyie ondu ntangu enkagn "? ²⁶ Yezu akeara ndenden: "Vi-a-vii, vi-a-vii, mokabagni, elending gnu me, epa eli djwi otiyenagni bidimu ve, kansi eli djwi otilagni mampa mp otiyuragni. ²⁷ Kiagni otshia, epa ve djwi n'oliu atsawompwon, kansi djwi n'oliu otsanzira djwi na luzingu ekwon nsuka mpi eyopeagni Mon-Wur; djwi Tea Nzeam abeam nde kidimu ende ya nde. ²⁸ Mby s'atubiwo wa Yezu wuwun: "Nge efwetesu nkie djwi na nkie etshia e Nzeam?" ²⁹ Yezu akeara mpi atuba nda wo ndenden: "Otshia o Nzeam eli okwikilagni ya wur eyitum nde." ³⁰ Mby s'etubiwo wa Yezu wuwun: "Kidimu nge esikieyie djwi siyen mpi sikwikili ya yie. Vim nge esikieyie? ³¹ Atea asu aliwo mana ne buu enzum, oshin omifugn wo wuwun, 'Apinde mampa iyum dzug na nda.'" ³² Mby Yezu s'akearinde ndenden, "Vi-a-vii, vi-a-vii, mokabagni, epa Moize wur eyopeagni mampa iyum dzug ve, kansi eli Teame wur elopeagni mampa ikieleka iyum dzug. ³³ Djwi mampa i Nzeam eli mampa iyum dzug olung ilekri mpi ilepii luzingu ne buu." ³⁴ Watuba wa Yezu wuwun: "Nkum, otepii mampa iwo ntangu enkum." ³⁵ Yezu atuba nda wo ndenden: "Me ndi oliu o luzingu; wur esiyia etay eme apafiyug nzia ve, mpi wur ekwikila ya me apayayug mpuy e vay ve. ³⁶ Kansi motigna onkabagni gnu, ontingyenagni, mpi opikwikilagni ve. ³⁷ Wur enkum esimpea Tea asiyiande etay eme, mpi wur esiyia etay eme, mpotwomo ne lien ve. ³⁸ Djwi me akrime yum dzug, epa djwi na nkie oshin oleang me ve, kansi djwi na nkie luzolo e wur eyintum. ³⁹ Mpi luzolo e wur eyintum eli, wur emog ne kati e vear ayimpinde akwon ntsa ntu, mpi mabiyi n'ewa n'eshuu e nsuka. ⁴⁰ Luzolo e Teame eli wur enkum esiyen Mon mpi esikwikila ya nde aviy luzingu e mvwe na mvwe mby me mobiyi n'ewa n'eshuu e nsuka. ⁴¹ Mby Wayuda s'agnikiwo n'itura iwo djwi na Yezu n'oshin oyitubinde ndenden: "Ndi mampa eyiyum dzug olung." ⁴² Mpi watuba wuwun: "Ene epa Yezu mon e Yozefo, mon ejiasu tea nde na mea nde? Oshin nge etubande opean ndenden: 'Ntikra yim dzug olung'?" ⁴³ Yezu akeara: "Oyagniagni gnug na gnug ve. ⁴⁴ Kaku wur esikug ngya etay eme ve, yug Tea eyintum akobin ve, nde mpi ayokeame ombiya eshuu e nsuka. ⁴⁵ Wamifugn n'enkeana e wangunsa: 'Wankum ayazig wo vii a Nzeam. Wur eyayug Tea me, eyavey along a nde, ayayiande etay e me.' ⁴⁶ Etuba wuwun kaku wur emiyen Tea, eli ko wur eyim etay e Nzeam, ndug enagn emiyen Tea. ⁴⁷ Vi-a-vii, vi-a-vii, mokabagni, wur ekwikila ya me ali n'evug e mvwe na mvwe. ⁴⁸ Me, ndi mampa i luzingu. ⁴⁹ Atea agnu aliwo mana ne buu e ndzum, wamiwa. ⁵⁰ Ene eli mampa eyim dzug, wur esila wog apayawa ve. ⁵¹ Ndi mampa e luzingu emikra yim dzug. Yug wur atila mampa inagn, asiyia nde n'evug e mvwe na mvwe, mpi mampa iwo isipeame, eli djuung ime esipeame djwi na luzingu e vear a buu." ⁵² Ne mby ewo, waYuda washia wog na wog, wuwun: "Oshin onkagn esipea nde djuung inde djwi sile?" ⁵³ Yezu nda wo ndenden: "Vi-a-vii, vi-a-vii, mokabagni, yug okalagni djuung i Mon-wur, yug okagnuagni mpi aluung ande, opayiagni na luzingu egnu gnemie ve. ⁵⁴ Wur esila djuung ime, esignua aluung ame, ali na luzingu e mvwe na mvwe, ayokeame ombiya n'ewa eshuu e nsuka. ⁵⁵ Djwi djuung ime ili vim a nda e kieleka, aluung ame ali vay a gnua a kieleka. ⁵⁶ Wur esila djuung ime, wur esignua aluung ame, asipier nde nda me, me mpi asipier me ma nde. ⁵⁷ Oshin oyintum Tea e luzingu, mpi oshin olime na luzingu djwi na Tea, wur eyanda me ayazinga nde djwi na me. ⁵⁸ Ene eli mampa eyim dzug, epa eli kamsi mana eyili atea agnu ve, mpi wamiwa. Wur esila mampa ine, asiyiande na luzingu e mvwe na mvwe." ⁵⁹ Kansi Yezu atubinde vii ane ne sinagoga ntangu eyilongikinde ne Kapernaumi. ⁶⁰ Walogoki inde entsign eyiyug vii ane, watuba wuwun: "Along ane ali biu; nagn eyakug ndjir wog?" ⁶¹ Yezu ndemie ntangu emijia nde oshin ognie walongoki inde djwi n'otuba onagn, atuba nda wo ndenden: "Etopeagni etura mpay? ⁶² Mby yug otiyenagni Mon-wur alekey mvean dzug etay eyiikinde nteang, ayayiawo esinge? ⁶³ Eli Mpeve wur etsampea luzingu; djuung epea mfunu. Vii amokabagni me eli Mpeve, eli mpi luzingu. ⁶⁴ Kansi ne kati egnu, amuu wapikwikili." Djwi Yezu atigninde njiaka, yim ko eyibaniwo, vear akadjiraka, ti wur esosar. ⁶⁵ Akea ntuba ndenden: "Wog enagn eyitubime memen kaku wur esikug ngya etay eme yug Tea akopea mbug." ⁶⁶ Yim kog enagn, walongoki inde entsign s'alur wo, wakafitsaka ti nde. ⁶⁷ Mby Yezu atuba nda walongoki djum n'ipe inagn: "Mby gnu, nge ekwung gnu, opakienagni?" ⁶⁸ Simoni Petelo okeara ndenden: "Nkum, asifitsasu etay e nagn? Eli ko yie wur eli n'otuba e luzingu e mvwe na mvwe, ⁶⁹ sikwikila, simijia susun yie oli Kristu, osantu e Nzeam." ⁷⁰ Yezu akeara ndenden: "Epa mug wur eyosonagni, gnu gnankum djum n'ipe? Kansi emog ne kati egnu ali etwon!" ⁷¹ Yezu atubikinde djwi na Yudasi Iskarioti e mon e Simoni, eyii ne kati e walongoki djum n'ipe, eyii afwete nsar Yezu.