V 1 Ne mby ewo, ayiwo n'okina omog e wayuda, Yezu atsa Yeruzalem. ² Ne Yeruzalem enagn, mbeama n'epfug ameme, ayiwo na zanga emog eviewo n'otuba e hebre Betesda, mpi eyiyii n'ipfug itean. ³ Ne ngie ipfug inagn, vear a nkeang entsign avurikiwo kog; na vear amibuye viy, ankea ikom ne nkuu, vear amibeam wo mbwo na nkuu, akwungikiwo ko vay agnug; ⁴ djwi wanzio emog akrikinde mbala na mbala ne zanga enagn, agnugikinde vay, mby wur enteang esilog ne vay yug ko wanzio atishir gnug vay, ndug enagn esivug, ata nkeang ewo ayiwo oshin onkagn. ⁵ Wur emog ayinde kog na nkeang, amikie na wo mvwe osar n'ineanign. ⁶ Yezu ntangu emoyen nde ngivur, ajinde ndenden amikie na nkeang mvwe entsign, aloywe ndenden: "Oleang ovug ?" ⁷ Wur enkeang okeara ndenden: "Nkum, kakume na wur esintwomo ne vay ve yug vay atignug, yug nding ntsandog, asiyen me wur emuu aletsu ndog nteang eme. ⁸ Yezu nda nde ndenden: "Yima, vey ntir eyie mpi kien." ⁹ Ko ne ntangu enagn, wur ewo avug, avey ntir ende, akien. Ayiwo eshuu e sabat (obing o Wayuda). ¹⁰ Wayuda s'atubiwo ya wur emivug wuwun: "Lwo eli eshuu e sabat, opikug mvara ntir eyie ve." ¹¹ Akeara ndenden: "Wur eyimvugi atubinde nda me ndenden: "Vey ntir eyie, kien." ¹² Woywe wuwun: "Wur ewo nagn emituba nda yie ndenden 'Vey ntir eyie, kien ?' ¹³ Kansi wur eyivug akajia wur ewo eyovugi ve, djwi Yezu ashwinde n'oziy ne kati olwi o vear ayi kog enagn. ¹⁴ Mby ntangu Yezu emokeande ongyen ne tempelo, atuba nda wur ewo ndenden: "Yen wean otivug, oyafikie masumu ve, yug kaku, djwi ipwo kuluta asikug wo ndog ya yie." ¹⁵ Wur enagn akien, atsankaba wayuda ndenden eli Yezu wur eyovugi. ¹⁶ Wog enagn, Wayuda s'ayug wo nkier wa Yezu djwi akinde vii anagn eshuu e sabat. ¹⁷ Kansi Yezu akeara ndenden: "Teame akie tii opean, me ko ndakie." ¹⁸ Djwi n'otuba onagn, Wayuda waling diaka oshin osidjag wo Yezu, epa ko djwi n'oshin omilog nde ne nsiku i sabat ve, kansi eli mpi djwi alevii Nzeam Teande penza, mpi nde ndemie aleyer nda Nzeam. ¹⁹ Yezu akeamvey otuba mpi alakaba ngean: "Vi-a-vii, mokabagni, kaku vim esikug nkie Mon ndemie ve, alekii ko vii aleyen nde Tea alekii; vii ankum alekii Tea, Mon alekii k'oshin onagn. ²⁰ Djwi Tea atsande ndeang Mon, atsande ongyegne vii ankum atsande nkie, mpi ayoyegnende vii anen anen alenga ane djwi gnu oyenagni ngituka. ²¹ Oniang k'oshin o Tea olebiyinde vear n'ewa mpi elepinde luzingu ya wur eleangnde. ²² Tea apitsu mbag ewu e wur ve, kansi amipea ya Mon ekub e mbag vii a vear. ²³ Djwi vear ankum walemfuki ya Mon kamsi elemfukawo ya Tea. Wur ekalemfuka ya Mon ve apilemfuki ve ya Tea eyotum. ²⁴ Vi-a-vii, vi-a-vii, mokabagni, wur esiyug otuba ome mpi esidjir ya wur eyintum, ali n'evug e mvwe na mvwe, wapayobag ewu ve, kansi ayum n'ewa mpi atikum ne luzingu. ²⁵ Vi-a-vii, vi-a-vii, mokabagni, ntangu eleye, ntangu wean emiyia, eli vear amiwa ayayug wo otuba o Mon e Nzeam, mpi vear ayayug otuba owo ayayiawo na luzingu. ²⁶ Djwi, k'oshin oli Tea na luzingu ende ndemie, amipea ko Mon mbug e ngya na luzingu ende ndemie. ²⁷ Amopea ekub e mbag ewu e vear, djwi nde ali Mon-wur. ²⁸ Oyayenagni ngituka ve ne vii anagn; djwi ntangu eleye eli vear ankum ali n'aluma ayayug wo otuba onde, mby ayapwewo n'alum. ²⁹ Vear ayikii vii a wuo ayafutumukawo djwi na luzingu. Kansi vear ayikii ipwo ayafutumukawo djwi wabag ewu ewo. ³⁰ Mpikug nkie vim emog memie ve: asibag me ewu oshin oleyug me, mpi ewu eme eli e masonga. Djwi mpiki luzolo eme ve, kansi ndeki luzolo e wur eyintum. ³¹ Yug eli me wur elepi ntiegn e vii ame memie, ntiegn eme epayia e masonga ve. ³² Eli na wur emuu elekab vii ame, ndajia memen vii atubande djwi na me, eli masonga. ³³ Atum gnu vear etay e Yoane mby nde apinde ntiegn e masonga. ³⁴ Kansi me, ntiegn esiveame epa eyum ya wur ve. Kansi yug ntuba ngean eli djwi ovugagni. ³⁵ Yoane ayinde mwinda epiey mpi epea oveanga mby gnu, aling gnu ko ngyen osiang e ntangu emog n'oveanga e mwinda ewo. ³⁶ Me ndi na ntiegn enen elenga ntiegn e Yoane, djwi etshia eyimpi Nzeam na nkie, etshia ewo kibeni elekime epea ntiegn djwi na me memen eli Tea wur eyintum. ³⁷ Mpi, Tea eyintum apinde ndemie ntiegn eme. Ototignagni ngyug otuba onde ve, otoyenagni elung ende ve. ³⁸ Otuba onde kakuwo ya gnu ve djwi opidjiragni wur eyitum nde ve. ³⁹ Olelingagni njia vii ayifugn wo ne Masonama Masantu djwi obansagni gnugnun asiveagnu neti luzingu e mvwe na mvwe. Kansi elapea ntiegn eme. ⁴⁰ Mpi otun ngyagni etay eme djwi na mvea luzingu. ⁴¹ Nkembo eme epitsu ngyum ya vear a buu ve. ⁴² Kansi njia memen lutondo e Nzeam kakuwo ya gnu ve. ⁴³ Ayime ne dzin i Teame, mby gnu opingyamagni ve, yug wur emuu amiyia ne dzin inde ndemie, asoyamagnu. ⁴⁴ Oshin onkagn osidjirgnu, gnu vear aleling lokumu gnug na gnug mpi aletunagni nding nkembo eyum ya Nzeam ndemie ? ⁴⁵ Oyabansagni gnugnun me ayofugnagnime ne nteang eTea. Wur elofugnagni eli Moize eyitsug gnu ekaagn ya nde. ⁴⁶ Djwi yug otokwikilagni ya Moize, anadjirgnu mpi ya me, djwi nde afugn nde vii andir me. ⁴⁷ Kansi yug opikwikilagni ne vii ayifugn nde ve, oshin onkagn osidjirgnu otuba ome ?"