1
Nkum ajinde ndenden Wafarizi watiyug wuwun alepii mbotika ya vear entsign ndenga Yoane.
2
Kansi Yezu ndemie akapeaka mbotika ve, walongoki inde vear alepiki mbotika.
3
Yezu s'alimnde Yudea mpi s'akey nde diaka ne Galilea.
4
Ayiwo ekug aleg ne buu e Samaria,
5
s'akumnde ne wiya enen e Samaria eviewo Sishar, mbeama n'evur e Yakob eyipinde mon nde Yozefo.
6
Etog e vay e Yakob ayiwo kog. Yezu, n'olem ekien ende, agneminde n'ikri etog enagn. Ayiwo wativanga mbeama na ntangu isom (midi esu).
7
Onkear omog o Samaria ayinde ntog vay. Yezu atuba nda nde: "Ompii vay a gnwa."
8
Oniang walongoki inde ayiwo watitsa nshum vim a nda ne wiya enen.
9
Mby onkear o Samaria atuba nda nde ndenden: "Oshin nge yie wur eli oyuda engwigna yie me vay a gnwa, me onkear o Samaria?" Djwi Wayuda ti vear a Samaria wapitsu ngyokana ve.
10
Yezu akeara ndenden: "Yug eyi ojia kabu etsampea Nzeam mpi eyi ojia nagn eli wur etuba nda yie ndenden ompii vay, yie yemie wur enawigna vay ya nde mby anopeande vay a luzingu."
11
Onkear okeara ndenden: "Nkum, kaku yie ata na vim e ntog vay, ibulu etog ene eli ngie ngie. Mby vay a luzingu ewo anavea yie n'onkagn?
12
Nge yie olenga Teasu Yakob eyitepii etog e vay ene. Nde ndemie agnwikinde vay awo, aman a nde, ti bitwisi nde ko agnwikiwo vay ane."
13
Yezu s'okearinde ndenden: "wur esignwa vay ane asikeande ngyug mpwi e vay;
14
kansi wur esignwa vay asopeame, apafiyug mpwi ve; vay asopeame asisawokum ne kati ende etog e vay esisapweka tii ko luzingu e mvwe na mvwe.
15
Onkear owo ndenden: "Nkum, ompiki vay awo djwi nkwoniki ngyug mpwi e vay mpi nkwoniki ngya ntog vay nendien."
16
Yezu atuba nda nde ndenden: "Tshwag, vie wum yie, mby okey nendien."
17
Onkear akeara mpi atuba nda Yezu: "Me kakume na wum ve."
18
Yezu ndenden: "Otituba djwidjwi, omivea awum atean, ata ompeam oli yie ya nde ene apa ali wum yie ve."
19
Onkear onagn s'atubinde ndenden: "Nkum, ndayen oli ngunsa."
20
Ateasu asamikiwo ne dzug ombimi one. Kansi gnu, gnugnun ondii onsama eli ne Yeruzalem."
21
Yezu s'okearinde ngean: "Onkear, ondjir me, ntangu eleye, opafisamagni diaka Nzeam n'ombimi to mpi ne Yeruzalem ve.
22
Gnu, osamagni Nzeam epijiagnu, su siyasama Nzeam ejiasu. Oniang evug eyum ya Wayuda.
23
Kansi ntangu eleye, ntangu etikum, eli vear asama Nzeam e kieleka, ayasamakawo Tea na Mpeve ti na masonga, djwi eli oshin o vear asama ngwign eleang Tea Nzeam.
24
Nzeam ali Mpeve, ekug mpi vear osama nde wosami na Mpeve ti na masonga.
25
Onkear owo ndenden: "Ndajia, Mesiya afwete ngya (ndug eviewo Kristu); ntangu eyayiande, ayatekabande vii ankea ankum.
26
Yezu okeara ndenden: "Mesiya eli mug etuba nda yie ene."
27
Kog enagn, walongoki inde wayia nkum, wayen ngituka n'oshin osulikinde ti onkear onagn. Kansi kaku ata wur oyoywi ndenden: "Ng'eling yie? to mpi vii nge esulayie ti nde?"
28
Mby onkear owo s'asandekey iwung inde, atsankaba vear ne wiya enen ndenden:
29
"Yagagni oyenagni wur emog, atinkaba vii ankum amikieme, ng'epayia Kristu?"
30
Vear s'apwiwo ne wiya enen enagn mby s'ayiwo etay e Yezu.
31
Ne ntangu enagn, walongoki atsignikiwo Yezu na nda wuwun: "Rabi, tola ntete."
32
Kansi nde atuba nda wo ndenden: "Mfwete nda olio opijiagnu ve."
33
Walongoki s'atubikiwo wog na wog wuwun: "Ng'eli na wur emojie vim a nda nendien?"
V 34 Yezu nda wo ndenden: "Olio ome eli na nkie luzolo e wur eyintum, ti na nkie otshia onde.
35
0pitsintubagni ve gnugnun etisatsuga ngwon inign djwi na ndima vim n'ivur? Yenagni, mokabagni, liragni ivur dzug, liragni vim ali n'ivur oshin omitsun wo, djwi na wakeagi.
36
Wur esikeaga ali n'ifutu inde, ndug wur ewum vim ivur djwi n'evug e mvwe na mvuwe, djwi na wur emifuy evur na wur ekeaga vim evur wayen osiang owo ondii omog.
37
Djwi vii atubawo ane, ali vi-a-vii: 'Emog atifuy evur, emuu amogo vim awo.
38
Otumagnime ntsa nkeaga vim ivur n'endii ekakiegnu ata otshia omog ve, eli vear amuu vear akii otshia, kansi gnu, otishwagni ko n'otshia owo oyikiwo.
39
Vear a Samaria entsign ayi ne wiya enen enagn s'adjir wo Yezu n'oshin eyakabi onkear onagn ndenden: "Antinkaba vii ankum amikieme."
40
Ntangu e vear a Samaria emiyiawo ngyen Yezu, watuba wa nde atukayia nda wo. Yezu s'asande kie kog nshuu ipe.
41
Vear entsign wodjir djwi n'otuba onde;
42
Watuba wa onkear onagn wuwun: "Epa diaka djwi na vii ayitekabiyie mby s'amidjirsu, kansi sitoyug su semie mpi sitijia susun ali wur emiyia mvuga okiri one.
43
Ne mby e nshuu ipe inagn, Yezu s'alim nde kog, atsa Galilea;
44
djwi ndemie atubikinde ndenden ngunsa enkum wapitsu onkwikila n'itsin i wiya nde ve.
45
Emikum nde ne Galilea, vear a Galilea wovey wuo, djwi ayen wo vii ankum ayikinde n'okina oyi ne Yeruzalem; djwi wo ko ayiwo n'okina onagn.
46
Akea tii ne Kana, ne buu e Galilea, ondii oyitshiminde vay ekum vinu. Ayiwo na nkum emog iyer-nkuu ne wiya e Kapernaum, mon nde ompeam ayinde na nkeang.
47
Ntangu emiyug nde ndenden Yezu atiyum buu e Yudea mpi atikum ne buu e Galilea, s'atshwinde etay ende, aling atsu mvuga mon nde eling ngwa na nkeang n'evuru ende.
48
Yezu atuba nda nde ndenden: "Yug okayenagni bidimu, opadjiragni ve."
49
Nkum iyer-nkuu ndenden: "Nkum, mon me na ntowa, yie tokum n'evuru eme."
50
Yezu okeara ndenden: "Tshwag, mon yie ali na luzingu." Wur enagn adjir n'otuba o Yezu, s'akien nde.
51
Elekeyikinde ne mbug, asanga nda vear ande otshia waleye ompea esiang wuwun: "Mon yie ali na luzingu."
52
Aywe ndenden ntangu enkagn eyiyug nde djuung wuo; wokeara wuwun: "Lii, jing ashirwo ne ntangu otatu (e djum n'isaar).
53
Teande akana ndenden eli ko ne ntangu enagn eyitubi Yezu ndenden: "Mon yie ali na luzingu. Mby s'adjirnde, nde ti opeang onde onkum.
54
Ene kidimu ozole eyikii Yezu ntangu emiyum nde buu e Yudea mpi emikeande buu e Galilea.