¹ Kansi ne kati e Wamfarizi, ayiwo na wur emog, dzin inde Nikodeme, ayinde emog e wankum e wayuda. ² Ayinde otshuu otshuu etay e Yezu mpi s'atubinde ya nde ndenden: "Rabi, sijia yie oli long eyum ya Nzeam, djwi kaku wur emog esikug nkie bidimu ilekiyie ine ve yug Nzeam apa ali nda nde ve." ³ Yezu s'okearinde ndenden: "Vi-a-vii, vi-a-vii, ndawong onkabagni, oyen wur wakakea ongwur mbala ipe ve, apayayen ekub e Nzeam ve." ⁴ Nikodeme akeara Yezu ndenden: "Oshin onkagn wur atikum intsuru, wakey ongwur? Asikug nde nkeanshwe n'ipfugn i meande mby wokey ongwur?" ⁵ Yezu okeara ndenden: "Vi-a-vii, vi-a-vii, ndokaba, yug wur wakowur ne vay ti ne Mpeve ve, apakug nshwe n'ekub e Nzeam ve. ⁶ Wur emiwur wo n'osugn ali osugn, kansi emiwur wo ne kimpeve ali Mpeve. ⁷ Oyayituka ve djwi ntokaba memen wofwete onkea ongwur mbala ozole.' ⁸ Opepe eleleg, eletsu etay eleangnde, osayug k'oshuru, kansi opijia etay eyumnde ve, ata etay eletsunde. Oshin omog ti wur enkum emiwur wo ne Mpeve." ⁹ Nikodeme atuba nda Yezu ndenden: "Oshin nge vii anagn asikug wo nsalama? ¹⁰ Yezu okeara ndenden: 'Yie, oli long e nsiku e Israel, oshin onkagn opijiayie vii ane ve? ¹¹ Kieleka, kieleka, mokaba, situba vii ajiasu, mpi sikab ntiegn e vii amiyen su, kansi gnu, opileangagni ngyug vii akabsu ve. ¹² Yug opikwikilagni vii a buu alokabagnime, oshin onkagn esidjirgnu yug mokabagni vii a dzug? ¹³ Kaku wur emog emivean dzug olung ve, eli ko Mon-wur eyi yum dzug mpi eyikri. ¹⁴ Oshin oyisiang Moize ndjwa ne dzug ne buu engiyum (oshwi), ekug ko wasiang Mon-wur ne dzug, ¹⁵ djwi wur enkum esidjir ya nde, aviy evug e mvwe na mvwe. ¹⁶ Oniang Nzeam amileang vear a buu, mby s'apinde Mon nde k'emog, djwi wur enkum esidjir ya nde akwon ngwa, kansi aviy evug e mvwe na mvwe. ¹⁷ Nzeam akatum Mon nde ne buu djwi na mbag ewu e vear ve, kansi djwi vear wavug ne mbug ende. ¹⁸ Wur esidjir ya nde, wapobag ewu ve, kansi wur ekaleang nkwikila ya nde, asobag wo ewu djwi akadjir ve ne dzin i Mon k'emog e Nzeam. ¹⁹ Wog enagn, ntangu emiyia mwinda ne buu, vear aleang wo mpib n'ondii o mwinda, djwi etshia ewo ayiwo epwo. ²⁰ Djwi wur enkum ekie ipwo apileang mwinda ve, apileang ko ve aye ondii oli mwinda oniang wakayen etshia ende epwo. ²¹ Kansi wur elekii vii ande na masonga, asiyiande ne mwinda djwi wayen etshia ende enkum oniang alekii etshia e Nzeam. ²² Ne mby ewo, Yezu ti walongoki inde atshiwo ne buu e Yudea, mpiug Yezu agneminde ndawo, s'apikinde vear mbotika. ²³ Yoane ko alepikinde vear mbotika n'Enoni, mbeama na Salim, djwi n'ondii onagn vay ayiwo entsign. Vear aleyikiwo mvey mbotika neti, ²⁴ oniang kog ayiwo watotshung Yoane ne bolog ve. ²⁵ Esiy elog ne kati e walongoki i Yoane ti Yuda emog eyiliriki vii a nsuy djuung ne nteang e ntshwe bisamu. ²⁶ S'atshiwo ngyen Yoane, wa nde wuwun: "Long, wur eyiki nda yie ne nky e Yordani, eyipiki yie ntiegn, sitoyen alepii vear mbotika, vear entsign waletsu etay ende." ²⁷ Yoane okeara ndenden: "Wur atsande mvea ko vim emopeawo yum dzug. ²⁸ Gnu gnemie ayugikignu eyitubikime memen 'epa nde Mesiya ve, kansi me nde wur eyitum wo nteang ende.' ²⁹ Nkea wear eli wum, kansi ewur e wum, yug atiyima kog, asiyiande n'osiang entsign djwi n'otuba osiyug nde ya wum. Osiang onagn eli wog elime na wo, osiang ome eli entsign. ³⁰ Ekug nde avean, me nkri ngie. ³¹ Wur eyum dzug ali ne dzug i vim ankum; wur eli ne buu ali ne buu, ata vii atubande ali ko vii a wur e buu. Wur eyum dzug olung ali ne dzug i vim ankum. ³² Akab vii ayiyen nde ti ayiyug nde, kansi kaku wur okwikila ve. ³³ Wur emikwikila vii akab nde ajia ndenden Nzeam ali masonga. ³⁴ Djwi wur eyitum Nzeam alekab otuba o Nzeam, oniang Nzeam atopii Mpeve e ndamu ve. ³⁵ Tea aleang Mon mpi amipea vim ankum ne mbwo inde. ³⁶ Wur ekwikila ya Mon, ali n'evug e mvwe na mvwe, wur epidjir ya Mon ve apayen evug ve, kansi nkier i Nzeam asilog wo ne dzug inde."