¹ 1 Ne mby e nshuu isar, ayiwo n'okina ivea ne Kana, ne buu e Galilea. Mea e Yezu ayinde kog. ² Yezu mpi oviwo n'okina onagn nda walongoki inde. ³ Ntangu emishir vinu, mea e Yezu atuba nda nde ndenden: "Kakuwo diaka na vinu ve." ⁴ Yezu akeara ndenden: "Onkear, djwi nge yie ya me? Ntangu eme etokug ve." ⁵ Meande s'akabinde vear otshia ndenden: "Kiagni vii asitubande nda gnu." ⁶ Kog ayiwo n'awung asom eyitsugiki Wayuda vay neti djwi na ngyog nteang e nshwe evuru e Nzeam. Iwung imog ashwikiwo mezire ipe to isar. ⁷ Yezu nda wo ndenden: "Yuragni vay n'awung anagn. Wayura awung tii vay ayuo to. ⁸ Atuba diaka nda wo ndenden: "Togagni vay mpi varagni wog etay e nkum aleam." Mby s'akiwo ko ngwign. ⁹ Ntangu e nkum aleam emiseynde, vay atitshim vinu. Akajia etay eyum vinu inagn, kansi vear otshia ayitog vay ajiwo wuwun eli vay. Nkum aleam avie wum ¹⁰ mpi okaba ndenden: "Wur enkum atsande mpea nteang vean a wuo, vear wagnwi, mby veana ali ivim i wuo wasapea mby, ntangu enagn vear watiyuy. Kansi yie, otisawum veana a wuo ti opean." ¹¹ Enagn kidimu enteang eyiki Yezu ne Kana, ne buu e Galilea. Ayegninde nkembo ende, mpi walongoki inde s'akwikiliwo ya nde. ¹² Ne mby ewo, Yezu akri nde ne Kapernaum nda meande, akwomande ti walongoki inde mpi akiwo ko ndamu e nshuu. ¹³ Okina o Pake e Wayuda oshin oyiwo etivanga, Yezu s'avean nde Yeruzalem. ¹⁴ Ayen neti e tempelo, vear wasar wangombe, ameme na wankodima, vear asongo ekri mpi ayiwo watigneme kog. ¹⁵ Wog enagn s'aveynde okori, akie ikoy na wo mpi akma wankum ne tempelo, n'ameme, na ngombe. Apay ekri e vear ayisongiki, apfuma wamesa. ¹⁶ Nda vear asar wankodima, atuba nda wo ndenden: "Limagni vim anagn nendien, oyakitulagni evuru e Teame ilag." ¹⁷ Walongoki inde wakeankana vii ayifugn wo: "Ngaagn evuru eyie ebvuna n'etura eme." ¹⁸ Wayuda s'avey wo otuba, wa Yezu wuwun: "Ekie yie oshin one, kidimu nge eteyegne yie?" ¹⁹ Yezu akeara ndenden: Bvuoagni tempelo ene, ne mby e ntsuu isaar, asikeame ntwung wog." ²⁰ Ankum a Wayuda wuwun: "Akiwo mvwe onign n'isom djwi na ntwung tempelo ene, yie yiyen asikeayie ntwung ne nshuu isar?" ²¹ Kansi Yezu atubikinde tempelo e djuung inde. ²² Wog enagn, ntangu eyifutumukinde n'ewa, walongoki inde akey wo nkana vii ayitubinde, mby s'adjir wo vii ayifugn wo ti otuba oyakabiki Yezu. ²³ Ntangu eyi Yezu ne Yeruzalem, n'okina o Pake, vear entsign adjir wo ne dzin inde, ntangu eleyenikiwo bidimu ilekikinde. ²⁴ Kansi Yezu akapeaka etura ende ya wo ve, djwi ajikinde oshin oliwo wankum, ²⁵ djwi akayia na mfunu ve wokabi vii alir vear anagn, djwi ndemie ajikinde oshin oli itura i vear awo.