¹ Atwung ame, ne kati egnu, ekwon ngya na vear entsign elong. Djwi sijia susun ayabag wo vear ewu elenga biu. ² Atsasu njing vii sankum eshin n'eshin. Yug eli na wur epitsinjing n'otuba onde, ali wur e wuo, akug na ndir djuung inde inkum, apalog n'ipwo ve. ³ Opean, yug sititshung odzum o wampunda, na nkori djwi alemfuki ya su, enagn silevari djuung iwo inkum. ⁴ Mbanu mpi kamsi ashwa, ata eli vim eninen, opepe eninen elegnug ashwa, kansi imon i yina ekieg elenong mbug, n'oshin oletum wur elevari. ⁵ Oshin omog ti elim, eli imon i vim e fioti ne djuung, kansi atsande nkie vii anen-anen. Liragni mpi kamsi ivim i tshiya, asikug nde mbwo okwun oninen. ⁶ Elim mpi eli tshiya, eli itsin ondii oyim ipwo inkum. Elim eli ikab i djuung isu, atsande ntsug djuung inkum mbin, atsande mbwo luzingu esu enkum tshiya. Nde ndemie mpi asawa ne tshiya e bilungi. ⁷ Wagnam inkum eshin n'eshin, wamfuru, wagnam ikeara n'ipfugn, ti wagnam ili ne vay, atsawo angwunga ne wiya ya vear. ⁸ Kansi djwi n'elim, kaku wur emikug n'ongwunga ve. Eli vim emog epwo, emiyuo to na ndikila. ⁹ Ko djwi n'elim, atsasu mpea Nkum mpi Tea lokumu, atsasu nshing mpi vear ayikii Nzeam n'ignignig inde. ¹⁰ Ko n'odzum omog enagn, ti lusakumuna, ti nkuu, ilepwi ko neti. Atwung, epikug ve eyii oshin onagn. ¹¹ Nge ne nto e vay emog asiku wo mpwe na vay a wuo na vay oluu? ¹² Atwung ame, oshung o nsuu asikug wo nta mbeam olive? Vay a wuo epikug mpwe ne vay okwa ve. ¹³ Wur nagn ne kati egnu eli n'ontiegn ti waagn? Ayegni etshia ende ne bifu i wuo, okwog-okwog ti ontiegn. ¹⁴ Kansi, yug n'etura eyie oli na dzua ti nginu oluu, oyayen osiang ve mpi oyadjim ne nteang e masonga ve. ¹⁵ Ontiegn enagn epa eyim dzug ve, kansi eli waagn eyim ne buu, ne djuung, ya ontshung. ¹⁶ Djwi ondii oli nginu oluu ti ashia, oshuru oli kog, ti vii apwo eshin n'eshin. ¹⁷ Kansi waagn e dzug eli nteang-nteang kaku mbin ve, mby elapea ngemba, eli wuo djwi na wur enkum, elatetsug ondii omog, eli na ngy e vear, elawur mbeam i wuo, kaku oyang ve, eli masonga. ¹⁸ Vear aleling ngemba wamifuy mbeam i masonga ne kati e ngemba.