¹ Atwung ame, oyakiragni lukwikilu egnu ya Nkum esu Yezu kristu n'onshiey ve ne nteang e vear amuu. ² Sivey mbanu, kamsi ne ntangu elignu ondii omog djwi na bisamu, wur emuu ayi nshwe na epete e wolo ti ileam isuu ne djuung, wur emuu mpi eli omva ayi nshwe, nileam i mbin. ³ mby yug otitshimagni viy etay e wur emilwer ileam i wuo enagn gnugnun: "Yie, gneme n'ondii e wuo ene!, mby ya nkea omva gnugnun: "Yie, yima nompign!" to, "Gneme n'ondii omimeara me!" ⁴ Enagn epa otikieagni onshiey? Epa otikumagni vear abag ewu e vear na nginu ignu ipwo? ⁵ Yugagni, atwung ame a ngaagn, Nzeam akason ankea omva ne nteang e vear a buu, djwi wakum ankea otsun ne lukwikilu, wakum mpi vear ayasavey oleama-nzoe ekub e eyitubinde ya vear oleang nde? ⁶ Kansi gnu, oyenagni omva wur e mpama! Epa ankea otsun vear alopiagni mpay ve, wog vear alotumagni ne nteang e tuminar? ⁷ Epa wog vear atsantwe entieng e dzin elignu na wo enagn? ⁸ Kansi, yug olekiagni oshin otuba nsiku i vuy, oshin omifugn wo wuwun: "Leang otwung oyie kamsi yie yemie", enagn okiagni wuo. ⁹ Kansi yug otikiagni onshiey, enagn otikiagni disumu, mpi nsiku asobagagni wo ewu, djwi otipiyagni onkwon. ¹⁰ Ognagn wur elemfuka nsiku inkum, kansi yug atilog ne disumu emog, enagn atipiy nsiku inkum. ¹¹ Ognang, wur eyitubi ndenden: "Oyakie itaay ve", ko ndug enagn eyitubi ndenden: "Oyajdag wur ve". Kansi yug opikii itaay ve, kansi oledjag ko vear, enagn otipiy onkwon onkum. ¹² Tubagni, mpi kiangi kaigni kamsi vear afwete wo mbagewu ne wansiku imopubagni wo n'eshing. ¹³ Djwi, ewu epea ngy ve ya wur ekayia na ngy otwung. Ngy atsande nunga n'ewu. ¹⁴ Atwung ame, mfunu nge ya wur na ntuba ndenden ali na lukwikilu, yug kaku nde n'etshia? Lukwikilu enagn asovuga wo nde? ¹⁵ Mbanu, yug kamsi otwung omog ompeam to onkear atilwer ileam ipwo, kaku nde mpi na vim a nda ve esila nde konso eshuu ve. ¹⁶ mby emog ne kati egnuatubi nda nde ndenden: "Tshwag na ngemba, yor tshiya wuo, yura ipfugn iyie to." Yug okapeagni vear anagn vim a mfunu djwi na djuung iwo, enagn mfunu ewo eli nge? ¹⁷ Eli oshin omog ti lukwikilu: yug kaku etshia ewo ve, lukwikilu eli ngiwa nkeanga wo. ¹⁸ Kansi wur emuu mpi asikug nde ntuba: ''yie oli na lukwikilu, kansi me, ndi n'etshia.". Ongyegni lukwikilu eyieeli kaku etshia, mby me, asoyegneme lukwikilu eme n'etshia eme." ¹⁹ Atsayie nkwikila yiyen eli ko na Nzeamemog; Eli wuo. Kansi ata entshung mpi wakwikila ko ngwign, kansi wali n'ekukuma. ²⁰ Obwunu one, oling njia yiyen lukwikilu ekwon etshia kaku wo na mfunu? ²¹ Abrama Tea su anunginde epa djwi n'etshia, ntangu eyitshinde mpea mon nde djwi n'empeab ne kunda? ²² Otiyen, lukwikilu alekikiwo ya wur ti etshia ewo, mby lukwikilu ende afwi wo djwi n'etshia. ²³ Oshin onagn, vii ayifugn wo s'akug wo, wuwun: "Abrama adjir nde Nzeam, mby s'akum nde wur eminunga, s'ovikiwo ewur e Nzeam." ²⁴ Oyenagni gnugnun wur atsande nunga djwi n'etshia, kansi epa ko djwi na lukwikilu e mpama ve. ²⁵ Oshin omog mpi, Rahab, epa ayinde onkear o nduma, anunginde ko djwi n'etshia, ntangu eyiyaminde vear ayimpea esiang, alag nde na nkea mpwe ne mbug emuu iky? ²⁶ Djwi djuung yug etikwon mpeve, atsawo ngwa, oshin omog ti lukwikilu, yug etikwon etshia eli ngiwa.