¹ Nzeam akea nkana Nowe ti wagnam inkum iyinde na wo ne ashwa; mby Nzeam s'atum nde opepe emog ne buu, vay s'abaniwo nkra. ² Nto i vay, ti vay ayim ne olung etshung, mpi mvuye ekafiteang ve. ³ Vay s'ayum wo ne buu, eletsu mpi elelim etey, mby ne nshuu nkama emog na otean, vay akra. ⁴ Ne ngwon ishambia, ne nshuu djum n'ishambia e ngwon enagn, ashwa ashem ne dzug embimi e Ararati. ⁵ Vay aletsu, aleyum tii ko ne ngwon djum. Ne ngwon djum, eshuu enteang e ngwon enagn, nsor i embimi ibana mpwe. ⁶ Ne nshuu onign, Nowe angama madikisi iyikinde ne ashwa. ⁷ Asianga inkea-nkea apwe, atsa mpi akea tii ko ntangu eyiyum vay ne buu. ⁸ Asianga mpi nkodima djwi na ndir yug vay atikra ne buu. ⁹ Kansi nkodima akayen ata ondii osikug nde nkuba ve, mby s'akey nde nshwe ne ashwa, djwi vay ayiwo eliko ne buu opfugn. Nowe ashima ewuo , ovey, mby s'okearinde ne ashwa ondii oli nde. ¹⁰ Akea nkwung nshuu ishambia imuu, mby akea nsianga nkodima, opur ne ashwa. ¹¹ Nkodima akea etay eli nde epiyekuo; ayara etay ekaya olive, akea na wo ne nshob ende. Mby Nowe s'ajiinde ndenden vay atikra. ¹² Akea nkwung nshuu ishambia imuu, mby akea nsianga nkodima. Kansi akafikea etay eli nde ve. ¹³ Ne mvwe nkama isom n'emog, ngwon enteang, eshuu ontete e ngwon enagn, vay ayiwo etiyum ne buu. Nowe s'aliminde nseam ashwa, alir, ayen buu wean etiyum. ¹⁴ Ne ngwon ozole, ne nshuu omab n'ishambia e ngwon enagn, buu ayiwo etiyum. ¹⁵ Mby Nzeam s'atubinde nda Nowe ndenden: ¹⁶ "Pweagni ne ashwa yie ti wear yie, aman ayie ti aveari awo mpi. ¹⁷ Pur mpi wagnam inkeankum ili ti yie, wamfuru ti wagnam inkeankum, ti wagnam itsankeara n'ipfugn: wapagn ne buu, wawur mpi wakum entsign ne buu." ¹⁸ Mby Nowe s'apwinde ti aman ande, wear nde ti aveari aman ande. ¹⁹ Wagnam inkeankum, wagnam ikeara n'ipfugn, wamfuru, inkeankum itsanda ne buu eshin n'eshin, s'apwiwo ne ashwa. ²⁰ Nowe atwung kunda djwi na Yaweh; s'avey nde wagnam inkum i wuo, ti wamfuru inkeakum i wuo s'apinde empeab ne kunda. ²¹ Ntangu emiyug Yaweh nsuu emog e wuo, mby s'atubinde n'etura ende ndenden: "Mpafishing buu diaka ve djwi na wur, ogniang nginu ili n'etura e wur ili ko ipwo yim ko olieng onde, mpi mpayafi djagaka diaka ve vim enkeankum ezinga, oshin omikieme ene. ²² Ntangu enkum eyayia okiri eliko, wambeam i fuy wo ti wambeam iyakeaga wo, mpio ti mbiiy, owah ti mvuye, mbiiy ti otshuu epayashir ve."